首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 聽候主閣來
聽候主閣來 影像(4)
卷期：第 10 號 本次： 日期：1926/11 刊名：芥菜子 頁數：4-7
篇名：聽候主閣來 [ Thèng-hāu Chú koh lâi ]
作者：陳清忠 Tân Chheng-tiong
  顯示 : 漢羅 全羅 並列  

聽候主閣來。

 基督教信仰的基礎是真單純，親像囡仔款，若將教理抑是神學上的裝飾共伊提開，就按呢提出佇理智抑是常識的面前來看，實在是親像一款的神話，抑是一款的故事而已。

佮上帝saⁿ-kap佇teh，尚且有份佇創造萬有的耶穌，來化做人，來成人的聖，人的肉；伊做一个平常的人，行佇湖邊，食麵包；後來流血，死了三日復活，四十日就上天；後來欲閣來。信者忍受萬項的艱苦，teh向望伊閣來；所以世間的學者，有智識的人teh袂了解，算是無奇怪的事。

若是將基督的昇天佮再臨，想做是kan-ta 的形容，抑是夢想；教會隨時失力，信者就tuh-bîn，佇遐就加添地上佮肉體的向望。

若是將這个信做親像加利利討海人所信--的，抑是Tāi-sò͘造天幕的人所信--的，就真奇怪teh欲加添能德，道德上的氣力，到路尾予咱佮伊平平昇天；teh欲顯現高貴的品性，清麗的感情，佮上帝親像的人格。所以欲thái會得通看做是一種的神話，抑是故事ah！

I、閣來的預言。

但以理第七上十三節有按呢的預言：－ 「我半暝夢見看見有人坐雲，面親像人子，到自古以來無移易的主的面前。見若有國家權柄榮光攏予伊得去，閣百姓眾人服事伊；伊的國無盡，代代袂廢去」。

主本身預言末世的事按呢講：－ 「彼時人子的兆頭欲出現佇天裡；佇地裡遮个族類攏欲啼哭，也欲看見人子用權能佮大榮光坐天的雲臨到」。(馬太24：29)。

「你是基督，上帝的囝抑毋是？」祭司頭按呢問基督的時，伊應講，－ 「你已經講lah；若是我共恁講，對這tia̍p了後恁欲看見人子坐佇有權能的的大pêng，坐天的雲來」。(馬太26：64)。

使徒也saⁿ-kap講起閣來的事：－ 「......予安樂的日期會對主的bîn-chêng來；閣主欲差為著恁代先定著的基督，就是耶穌......天的確著接納伊，到萬物復到的時」。(使徒行傳3：20)。

「所以恁的心著hâ腰，著節制，專心向望佇耶穌基督顯現的時，所欲賞賜恁的恩典。」(彼得前書1：3)

「......就是佇主耶穌佮伊有權能的天使，佇火燄中，對天顯現的時。」

(II 帖撒。1：7)。

「干證遮个事的講，著，我緊緊到。阿們；主耶穌ah，你著來」。

(默示錄 22：20)。

「加利利人ah，啥事徛teh看天？」

這个耶穌離別恁受chih接上天，恁看伊按呢上天，伊也欲照按呢來」。

(使徒行傳1：11)。

II、  閣來的款式。

(1). 將榮光佮權威來做人的奴僕，做有罪的人予人thâi死。無久欲做王，做審判萬民的主閣再來。彼个光景的壯大，的美麗，毋是咱想會到！

「因為人子用伊的爸的榮光，佮伊的天使欲來」。(I馬太16：27)。

「......佇咱的主耶穌佮伊攏總的聖徒閣來的時」。(I 帖撒 3：13)。

因為主欲本身對天落來，有大喉叫，有至大天使的聲，也有上帝的哨角，......」。(I 帖撒4：16)。

無論是「大喉叫」「至大天使的聲」「上帝的哨角」遮个攏是顯出上帝的權威。

(2). 忽然來，親像賊，佇信者teh睏的時，佇油焦的時。

  「恁也著備辦便，因為恁無拍算的人子來lah」。(路加12：49)。

III、        閣來的目的。

(1). 欲審判的因端。

    尊嚴的主，贖罪的耶穌，teh欲佇世界一般猶未悔改的代先，閣來這个地上，佮伊的天使，用大的榮光佮氣力來拍破所有不正不義的教會佮政治，振動全地，將這个地欲永遠hē佇伊的 phoè下。

  「所以是未到，恁莫得批評啥物，聽候主到......(哥林多前書4：5)。

  「我佇上帝的面前佮欲審判活人死人的基督耶穌的面前，為著伊的顯現佮伊的閣來，吩咐你著傳道理」......(提摩太後書4：1)。

(2). 欲做王來治理。

佇彼時主閣再建築老爸大衛的王位，舉起天的榮光，將 Sûn 的山做神國的帝都，世界一統佇一千年的久；猶太的國民歸還祖國，順服佇耶穌。照亞伯拉罕、以賽亞、米迦所預言來成上帝的約束。

佇這个時陣，聖徒欲復活，彌賽亞的王國欲實現，成做無病無死的時代，真正的 Utopia (理想境)。

(3). 欲完成救聖徒。「......欲第二擺，對向望伊的人出現，來救in；(希伯來9：28)。

  「恁是對信予上帝的權能保護，到得著拯救，是便便佇末期欲顯明的 」。

(彼得前書1：5)。

(4). 對聖徒得著榮光。「主臨到的日，就是伊欲佇遮个聖徒得著榮光，也佇彼日伊欲佇攏總信的人得著呵咾」。(II 帖撒。1：10)

IV、聖徒的特權。

千年王國的款式。

論佇彌賽亞王國，咱的生活，狀態，有幾若說：－有的講是實在佇這个地上一千年久，有的講是親像天使，無踮佇地上，總是咱著信主建築彌賽亞的王國實在是佇這个世界。彼tia̍p信徒攏欲復活，照以前的款式，欲佮主親身食桌，saⁿ-kap做堆。

(1) 親像基督。

有份佇彌賽亞王國的聖徒，心神teh欲親像基督。咱肉體的歹看欲消滅，來入佇上帝的榮光。

  「伊既然有權能會予萬物降服伊本身，就欲用彼个權能來變換咱卑賤的身軀，佮伊榮光的身軀同款。(腓立比3：21)。

  「所疼的兄弟ah，現今咱做上帝的囝，將來怎樣，猶未顯明。咱知伊若顯明，咱就親像伊，因為咱欲看見伊，照實在的款」。(I約翰3：2)。

(2) 欲受榮光。

  「就大牧者顯現的時，恁欲得著袂衰退榮光的冕旒」。(彼得前書5：4)。

(3) 欲做王

  「咱若吞忍，也欲佮伊做王」；(提摩太後書2：12)。

  「In也欲做王佇地上」(默示錄 5：10)。

論一千年福氣的年，這款的信仰，現代出名的學者濟濟按呢信；無按呢信的人也袂少。

學說無論是怎樣，學者有贊成，無贊成，凊采好；咱應該著忠實來信主的話趁使徒所傳的話，予彼款「超越tek希望」 共咱chhiō 光來經過這世間。成做囡仔，成做戇人來信伊的話。

人欲嫌講是迷信，是戇，出在伊，不過著知，啥物人，用啥物款的權威佮確信會通來毋承認這款的事ah！！？

這款靈界的奧妙，佮屬佇未來的向望，世間人的智慧是空虛。欲信，抑是欲hiat-ka̍k，兩款姑不將著揀一款。這款欲批評彼款是毋著的事。
 
 
 
 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461