Má-chó͘ hui-hêng.
Sì nî chêng Ji̍t-ji̍t sin-pò kì-chāi tī Káu-tōng-ia̍h hū-kūn "Bí-jîn hui-hêng". Goá khoàⁿ liáu kî-koài teh siūⁿ ná ū Bí-kok lâng tiàm hia hui-hêng, kàu tha̍k chi̍t-piàn liáu, chiū chai sī chi̍t ê siàu-liân ê hū-jîn-lâng, teh kè a-iân-soaⁿ kiô, kàu kiô-tiong, hut-jiân tī tuì-bīn ū thô͘-thoàⁿ-chhia kín-kín teh lâi, chin guî-hiám bô teh siám, put-tek-í thiàu-lo̍h kiô kha; kai-chài chhiú kia̍h hō͘-soàⁿ, só͘-í bān-bān tuī-lo̍h nn̄g-tn̄g chhim ê kiô-kha bô siong-hāi; chiah hō choè "Bí-jîn hui-hêng".
Kin-nî la̍k-ge̍h poeh-ji̍t Má-chó͘ iā tī chia hui-hêng! Chit-tiâu kiô tī Kâu-tōng thêng-chhia tiûⁿ kuí-nā pah-pō͘, goân-chiân sī choè thoàⁿ-khòng ê lō͘-ēng, kūn-lâi kái-choè peh-sìⁿ kau-thong ê kiô. Chóng-sī chit-tiâu kiô kū-kū bô ún-tàng, chiū tuì pa̍t-uī koh chō sin ê thih-kiô. Tī la̍k-ge̍h poeh-ji̍t beh khai-thong-sek, tāi-ke beh choè lāu-jia̍t, chiū gī-tiāⁿ sūn chit ê ki-hoē lâi ngiâ Má-chó͘, ǹg-bāng oē khah lāu-jia̍t. Hit-ji̍t ngiâ Má-chó͘ iû-goân tuì kū ê kiô keng-kè, chit-tiâu kiô tn̂g iok ū nn̄g-pah chhioh, lī chuí-bīn iok ū jī-cha̍p chhioh, hit-sî ū kuí nā pah lâng tè Má-chó͘ sì-koè ûn, ēng saⁿ-pé kiō toé la̍k-sian Má-chó͘, tī thāu-chêng sī lô-kó͘-tīn, chú-tē, gē-koh lóng kè kiô, Má-chó͘ kap suî-hiuⁿ ê, ū sì-gō͘-cha̍p lâng. Kàu kiô-tiong hut-jiân kiô ê thih-soàⁿ tn̄g chi̍t-poàⁿ, Má-chó͘ kap suî-hiuⁿ ê lâng choè chi̍t ē piàⁿ-lo̍h kiô-ē, tī chuí-bīn phû-lā-sa̍h, ū ê tîm lo̍h chuí, ū ê tī ta-toē kiò-khó͘ liân-thian, hiān-sí chi̍t ê ,tāng-siong, la̍k lâng, khin-siong put-chí choē, saⁿ-téng sîn-kiō chhuì-chhuì--chhuì, m̄-chai kiù lâng ê Má-chó͘ tī tó-uī! Kai-chài hit-sî ū kéng-koaⁿ, chòng-teng, jîn-bîn lóng tī hia kín-kín khì kiù--in. Má-chó͘ hō͘ chuí lâu kè saⁿ ê khut, nn̄g-ê loà, peh boē khí, tē-chú chiah kín khì kiù--in. Kim-pâi, thâu-khoe, i-chiûⁿ lóng bô khì. Pak-káng Má-chó͘ kha-kut tn̄g chi̍t-ki, Kiⁿ-á-liâu-má, bīn-phê liù chit-niá, chng-bîn chin put-hēng, sí-siong bián kóng koh pê-kêng: thiaⁿ-kìⁿ kóng pê Kiⁿ-á-liâu-má ê bīn-phê cha̍p-goā-kho͘, pê Pak-káng-má chi̍t-ki kha jī-saⁿ-cha̍p-kho͘, sîn-kiō kuí-ná pah-kho͘. Beh kiû pêng-an, hoán-tńg tú-tio̍h chai-hāi.
Tī nn̄g-nî chêng Kim-pau-lí lâng ngiâ Má-chó͘ iā sí kuí-nā cha̍p lâng. Chhin-chhiūⁿ chit-khoán ê lē, chat-chat boē tit-thang siá.
Tuì che-sū thang chai;－
1. Má-chó͘ bô lêng-siàⁿ.
2. Ngiâ-chhiáⁿ ê lâng ū chai-hāi.
3. Hòⁿ-sū ê lâng beh chioh Má-chó͘ ê la̍t hō͘ toē-hng hoat-ta̍t, kî-si̍t sī hāi toē-hng sit-pāi.
4. ài tuì lāu-jia̍t lâi chhú ka-kī ê lī-ek--ê, tio̍h chhim-chhim kéng-kài.
