Má-kai i-īⁿ kūn-sìn.
(Soà-chiap chêng-hō)
5. Ji̍p-īⁿ ê hoān-chiá,－ toā-lâng, gín-á lóng ū saⁿ-khò͘ thang hō͘ in chhēng, che chin lī-piān, pīⁿ-lâng m̄-bián lēng-goā chhiàⁿ lâng soé saⁿ.
6. Hoān-chiá nā khah siong-tiōng m̄ hō͘ lâng khì thàm i. Tâi-oân lâng chit-hāng m̄ koàn-sì, si̍t-chāi sī chin tio̍h. Goá ê bó͘ kap kiáⁿ chit-pái tú-tio̍h phoà-pīⁿ chin siong-tiōng hó tńg-lâi, kóng, tng siong-tiōng ê sî ū chiah-ê chhin-lâng, hoē-iú khì khoàⁿ I, I chin kan-khó͘, mn̄g-tang mn̄g-sai chin kan-khó͘ chin m̄ ài, chin bô ài thiaⁿ lâng kóng oē, bô thiaⁿ sím-mi̍h siaⁿ, tiām-tiām tó khah khoàⁿ-oa̍h, 2 lâng só͘ kóng saⁿ-tâng, kàu taⁿ goá chiah chai, tāi-seng goá m̄ chai, só͘-í siá phoe kiò chhin-lâng lâi khoàⁿ I; i-seng m̄ chún in hoē-biān goá thau chhoā in khì khoàⁿ, taⁿ chai sī m̄ tio̍h.
Pīⁿ-īⁿ tuì koh khui í-lâi, kok-uī ê kàu-hoē siū put-chí lī-ek, chiū chiah-ê thoân-kàu-su ū ê ia̍h tit-tio̍h chin toā lī-ek, ia̍h ū put-chí choē tuì i-pīⁿ tńg-khì soà sìn tō-lí, khoàⁿ chit-ê pīⁿ-īⁿ tuì pīⁿ-lâng chīn-la̍t i-tī chiàu-kò͘, tuì Siōng-tè tō-lí chhut-la̍t pò-iông, 2 hāng lóng chīn-la̍t, si̍t-chāi sī Kàu-hoē kiù lâng ê ki-koan.
(oân).
