Pîⁿ-nâ kàu-hoē sin-bûn.
Goá chit pài sûn Pìⁿ-nâ kàu-hoē pí kū-nî ū chìn-pō͘ têng-pē.
Pîⁿ-nâ ê só͘-chāi sī lāi-soaⁿ, tō-lō͘ chin oán-sia̍p, tī Tâi-pak kap Gî-lân 12 phò͘ ê tiong-kan, chûn chhia boē tit kàu. sió koe chhī ū peh-sìⁿ 300 goā lâng, soaⁿ-lūn ê peh-sìⁿ chin sòng-hiong, chāi-toē bí chia̍h bô kàu tio̍h phoè han-chû, oá-khò han-chû khah choē. 4 nî chêng ū siat káng-gī-só͘, kàu taⁿ put-chí hó sêng-chek, peh-sìⁿ chin him-bō͘ tō-lí, hiān-sî ū 20 hō͘ thàn tō-lí jîn-sò͘ 94 miâ. Chit-pang toā-lâng 15 miâ ài niá soé-lé chiap-la̍p 9 miâ koh gín-á 5 miâ Tīⁿ Seng-ḿ chit-ke ū 10 lâng lâi teh lé-pài, Tīⁿ Seng pún hoán-tuì, taⁿ ta̍k lé-pài ū thiau-kang lâi lé-pài. Chit-pang I ê toā sim-pū niá soé-lé, tāi-seng ji̍p Thian-kok ǹg-bāng āu-ji̍t choân-ke 30 lâng oē lóng thàn tō-lí.
Kàu-hoē teh chìn-pō͘ ê in-toaⁿ ū kuí-nā-hāng.
1. Ū Siōng-tè ê sîn-jiah teh pang-chān. Chit-lâng miâ Lîm Hé tuì soè-hàn he-ku, lâi pài Siōng-tè he-ku soà hó, chit-lâng chin jia̍t-sim sì-koè chio-ho͘ pa̍t-lâng, gô͘ Iú-thô͘ sī thiàu-tâng khoàⁿ-miā 29 hè oē sí, tio̍h-kiaⁿ lâi sìn tō-lí, taⁿ í-keng 31 hè, I ê bó͘ khoàⁿ-miā boē siⁿ, taⁿ ia̍h beh siⁿ lah. Koh chit ê Chiong Sàm-mn̂g tài chi̍t ê kú-tn̂g pīⁿ, Tâi-pak 2 keng toā pīⁿ-īⁿ I boē-hó, tuì sìn tō-lí pīⁿ chiām-chiām hó, chiah-ê lâng pún chin sàn-hiong khiàm lâng chîⁿ, tuì sìn tō-lí chè hêng liáu koh chhun-chîⁿ, in pún sàn sī hō͘ kuí-sîn hāi, nā phoà-pīⁿ chiū mn̄g pu̍t choè sai, muí-nî sī án-ni, pài Siōng-tè bô lâm-sám khai-ēng koh kut-la̍t thàn, chū-jiân khah khoàⁿ-oa̍h.
2. Má-kai i-īⁿ chin toā pang-chān in, nā ū Thoân-tō ê phoe lâi i-pīⁿ ê lâng tńg-khì, nā thiaⁿ tō-lí ê, khah jia̍t-sim, nā sè-sio̍k soà sìn tō-lí.
3. Chiah-ê peh-sìⁿ hō͘ kuí-sîn hāi chin chhiⁿ-chhám chin chhìn-sim, khah bô kò͘-chip ê sim, só͘-í khoài chiap-la̍p tō-lí.
Hiān-sî tuì Ki-tok-kàu lóng bô hiâm pháiⁿ-oē, kan-ta huí-pòng kóng nā ji̍p-kàu āu-ji̍t tio̍h chin choē chîⁿ chi̍t-ge̍h beh khioh 2, 3 kho͘, hia ê lâng lóng chin sàn, kóng tio̍h khioh-chîⁿ put-chí hân-sim.
ia̍h ū-ê lâi sìn sī tuì thiaⁿ-kìⁿ pò͘-tō, só͘-í hiān-sî nā pò͘-tō, ta̍k-pái lâng ia̍h chin ài thiaⁿ, hiān-jīm ê thoân-tō ū 2 hāng put-chí boē siān.
Chiàu khoàⁿ chiong-lâi ū sêng pài-tn̂g ê ǹg-bāng.
