Cha̍p goe̍h ê chi̍t nn̄g hāng sū
Phian-chhip-jîn siá
1958年10月838期 3-4
Hē-thiⁿ koè liáu, chhiu-kuì ê thiⁿ koân koh liâng-sóng. Chhin-ài ê tho̍k-chiá m̄-chai ū siūⁿ tio̍h kuí hāng thang saⁿ-kap chò bián-lē? Pit-chiá tī chia chiàu lē ài koh siá kuí hāng.
Chi̍t hāng: Cha̍p goe̍h thâu chi̍t lé-pài sī Sè-kài kong-tông Sèng-chhan ji̍t, chit chân sū kuí nî lâi tī pún Pò lóng ū teh thê-chhiòng. Taⁿ kok kàu-hoē he̍k-chiá bô lóng chiàu chit ê ū-tēng teh kú-hêng Sèng-chhan. Chóng-sī tāi-ke nā siú Sèng-chhan ê sî, só͘ tit-tio̍h chē-chē ê kám-sióng, tiong-kan ê chi̍t hāng ún-tàng sī tâng-sim chi̍t-ì ê sū. Sèng-chhan ê Eng-gú ū sî kiò-chò (Holy communon), chit ê ì-sù, chiū-sī sîn-sèng ê ha̍p-it kap siong-thang. Sió-sió ê ki-tok-tô͘ ka-têng tio̍h ha̍p-it, sió-sió chi̍t keng kàu-hoē tio̍h ha̍p-it, sió-sió ê Tâi-oân kàu-hoē iā tio̍h ha̍p-it, kî-si̍t chéng-kò sè-kài ê kàu-hoē to í-keng ū chin chhut-la̍t teh kó͘-bú, Phó͘-sè kàu-liân ūn-tōng beh kiû sè-kài kàu-hoē ê ha̍p-it.
Pit-chiá chit kuí ji̍t kàu Hoa-liân chham-ka choân-séng Thoân-kàu-su Chóng-hoē, kàu Thài-ló͘-kok chham-koan kàu-hoē kap hū-kīn ê kéng-tì, chai-iáⁿ chia ê kàu-hoē , tit-tio̍h Tiúⁿ-ló kàu-hoē ê poê-iúⁿ put-chí hoat-ta̍t, m̄-kú thiaⁿ kóng ū Sèng-kàu-hoē lâi siat kàu. Koh Chin I^a-so͘ kàu-hoē, Thian-ch2 kàu-hoē iā lâi siat-kàu, chit 2 ê sī kap Tiúⁿ-ló kàu-hoē teh kēng-cheng, sīm-chì sī hông-hāi ê khoán. Nā-sī Chin Iâ-so͘ kàu, Thian-chú-kàu-hoē che to bô oē thang kóng, nā-sī kî-ū sin-kàu chèng kàu-hoē iû-goân sio-cheⁿ kàu san-tē, lí iā siat kàu-hoē, goá iā siat kàu-hoē, án-ni kiám bô chin uî-hām. Chit hō sū sui-jiân bē thang chi̍t-ji̍t, nn̄g ji̍t ē tit kái-koat, m̄-kú Tâi-oân ê kàu-hoē, chhin-chhiūⁿ hiān-sî Chóng-hoē sêng-li̍p liáu, m̄-chai tāi-ke ū teh siūⁿ , tī Tâi-oân lāi sin-kàu kok kàu-phài kan ê Phó͘-sè kàu-liân ūn-tōng thang khai-sí khoàⁿ-bāi bô, nā án-ni ǹg-bāng kàu-phài ê loān-li̍p, kàu-hoē ê loān-li̍p ē thang tit-tio̍h oān-hô tiau-chéng. Goá siong-sìn chit khoán ê hi-bāng , tī pa̍t kàu-phài ê tiong-kan kiám-chhái í-keng ū lâng pí lán koh-khah jia̍t-sim teh kî-kiû. Tng tī 10 goe̍h kok kàu-hoē kè-e̍k beh siat chhiu-kuì Sèng-chhan ê sî, ǹg-bāng ū chē-chē iú-sim ê lâng ē thang tàu siūⁿ , tàu thê-chhiòng chit hāng.
Koh chi̍t hāng: Cha̍p goe̍h tē 3 pài kok kàu-hoē lóng sī siat chò Chú-ji̍t-o̍h kì-liām sèng-ji̍t, tī chit ji̍t uī Chú-ji̍t-o̍h ê sū kó͘-bú tāi-ke ê koan-sim kap hōng-hiàn. Taⁿ Chú-ji̍t-o̍h ê ì-gī kè-ta̍t sī lán choân-thé tho̍k-chiá só͘ chhim chai. Put-kò chit chhù ū chē-chē lâng khì Ji̍t-pún hù Sè-kài Ki-tok-kàu kàu-io̍k tāi-hoē , in ê pò-kò í-keng ū ê chhut tī pún Pò, iā ū chhut tī hù-khan " En̂g-kong" nih. Koh tuì Ji̍t-pún tńg-lâi liáu iā ū Phó͘-sè kàu-liân Chóng-kàu kàu-io̍k-pō͘ ê chóng-kàn-sū Dr. Chappel lâi Tâi-oân káng-ián, iā 8 goe̍h 11─16 tī Hoa-liân kàu-hoē khui Thoân-kàu-su Chóng-hoē ê sî, ā ū thó-lūn tio̍h chit hong-bīn ê sū, án-ni chong-ha̍p khí-lâi, ū thang tit-tio̍h chē-chē kiàn-sek kap chí-chiam, chiū-tiong chi̍t hāng, chiū-sī sêng-jîn kàu-io̍k ê sū. Chiah ê sêng-jîn , he̍k-sī chò pē-bó, in lóng sī tio̍h siū kàu-io̍k ê. Koh in lóng sī ū hū kàu-io̍k ê chek-jīm ê. Lán chū kú-kú chiū chai, beh kà gín-á tio̍h seng kà toā-lâng , kīn-lâi Ki-tok-kàu kàu-io̍k kài koh khah chù-tiōng chit chân sū. M̄-nā án-ni, tī kàu-hoē Chú-ji̍t-o̍h tam-tng kàu-oân ê chhin-chhiūⁿ lóng sī chheng-liân it-chhiú pau-pān, iā tiong-liân í-siōng ê chha-put-to lóng m̄-bián. he̍k-chiá beh kóng tiong-liân í-siōng ê tì-sek ha̍k-būn to lóng khah su lah, só͘-í bē kham-tit tng; chóng-sī kî-si̍t sī bô iáⁿ, chū-jiân tiong-liân lâm-lú tī ka-têng, tī chit-gia̍p siōng chek-jīm chē, kang-chok chē, só͘-í chin oh-tit chhiâu sî-kan, iáu-kú sui-jiân án-ni, kèng koh khah ài in kòng-hiàn in hong-hù ê keng-giām lâi tàu poê-iúⁿ chiah ê hō͘-tāi.
I-siōng 1-2 hāng te̍k-pia̍t kì tī chia chò chu-uī chham-kó, thang saⁿ-kap bián-le̍k ēng-kang chiū-sī,
