Thoân-kàu-su Chóng-hoē ê pò-kò
Pún Pò kì-chiá pò
1958年10月838期 5-6
Chi̍t nî chi̍t pái ê Thoân-kàu-su Chóng-hoē , kin-nî ū koh khui tī Hoa-liân chhī Hoa-liân kàu-hoē ê só͘-chāi. Chá sî nā kóng āu-soaⁿ sī siū chhiong-kun ê lâng chiah ū kàu. Tī āu-soaⁿ chí-ū ē thang khoàⁿ-tio̍h koân soaⁿ, toā khe kap ka-lé(san-tē ê hiaⁿ-tī), chóng-sī hiān-sî sī khah bô chit khoán ê koan-liām, iáu-kú tuì Tang-pō͘ it-poaⁿ ê jīm-sek m̄-sī chin bêng-liâu. Chū tuì kong-ho̍k āu san-tē ê kàu-hoē tuì Hoa-liân chhī, Pîn-tong chhī, Tâi-tang chhī hū-kīn ti̍t-ti̍t hoat-ta̍t liáu-āu , Tang-pō͘ ê thoân-kàu chêng-hêng chia̍p-chia̍p thoân-pò tī lán tiong-kan, uī-tio̍h ài chhiok-chìn choân-thé thoân-kàu-chiá tuì san-tē kap Tang-pō͘ kàu-hoē ê chai-bat, só͘-ì kū-nî tī Po͘-lí khui Thoân Chóng liáu-āu , chiū it-tì koat-tēng kin-nî beh tī Tang-pō͘ Hoa-liân chhī ê só͘-chāi khui hoē. Chóng-sī kàu kin-nî hē-thiⁿ hong-thai lâi si̍p-hek Tang-pō͘ liáu-āu, san-tē , pêⁿ-tē kàu-hoē ha̍p-kiōng tó-hoāi toā phoà sió phoà ê bē sǹg-tit, liáu-āu koh chai-iáⁿ ê chiū-sī uī hong-thai sí ê ū 21 ê, só͘ sún-sit ê ha̍p-kè khah-ke Tâi-pè 500 bān. Chit khoán ê chai-hāi si̍t-chāi sī khong-chiân ê. Só͘-í Hoa-liân chhī-lāi 4 keng Sìn-gī kàu-hoē, kî-û lóng ū siū-tio̍h put-siáu ê chai-hāi, tì-kàu beh khui Thoân Chóng ê ū-tēng soà bô piàn-oāⁿ bē ēng-tit. Chóng-sī kàu hoē-kî jú pek-kīn, tāi-ke tuì Tang-pō͘ ê koan-sim koh-khah chhiat , siūⁿ kóng siū-tio̍h hong-chai chiah tio̍h lâi khì si̍t-tē khoàⁿ-khoàⁿ.
án-ni uī-tio̍h ài chai Tang-pō͘ ài chai san-tē koh ài chai hong-chai, jî-chhiáⁿ thang lêng-siu gián-kiù thó-lūn, chiah koat-tēng tī Hoa-liân khui hoē.
Taⁿ chit chhù khui hoē chha-put-to lóng sī lán kàu-hoē ka-kī siat-hoat. Káng su tû-khì 4 tn̂g hō͘ 2 ê goā-kok lâng káng í-goā, lóng sī chū-tē chhú-niû, koh koè-khì 3 hoê ū Bí-kok Phî-ní-su Phok-sū ê thoân-thé chhut chin chē pó͘-chō͘-kim, chiah àn-chiàu in ê kè-e̍k lâi chìn-hêng, chit chhù keng-huì tuì kok kàu-hoē kap kok thoân-kàu-su saⁿ-kap hū-tam, iáu-kú thang to̍k-li̍p chū-iû lâi ka-kī chi-chhî, tuì án-ni thang tit-tio̍h chē-chē hó ê sêng-chiū.
Hoē-gī sī tuì 11 àm khai-sí, kàu 16 àm beh kàu 11 tiám chiah kiat-sok, in-uī lō͘-tô͘ oán-sia̍p, chē-chē tio̍h keng-koè guî-hiám koh chin hn̄g ê So͘ Hoa kong-lō͘, iáu-kú kàu uī sui-sî khai hoē lé-pài, soà-chiap 6 ji̍t chiok-chiok ê ji̍t-thêng, thang kóng sī chin tio̍h-boâ ê chū-hoē.
Chit chhù loē-iông chù-tiōng tī thoân-kàu-chiá bo̍k-hoē siōng si̍t-chè seng-oa̍h ê būn-tê.
Thâu chi̍t káng Tēⁿ Liân-khun Bo̍k-su kóng thoân-kàu-chiá kap tha̍k-chheh, jiân-āu chiah tāi-ke thó-lūn. Só͘ kóng chē-chē sī kó͘-bú thoân-kàu-chiá tha̍k-chheh ê sū. Chiàu khoàⁿ tha̍k-chheh chìn-siu ê si̍p-koàn tāi-ke khah bô hiah jia̍t-sim; m̄-kú ū sî uī-tio̍h chheh kuì, ū sî uī-tio̍h bo̍k-hoē seng-oa̍h bô sî-kan sèng ê kui-tēng, uī-tio̍h èng-hù bo̍k-hoē-siōng ê kang-chok, tì-kàu tha̍k-chheh ê sî tio̍h chhin-chhiūⁿ àm-chīⁿ thau tha̍k, só͘-í tha̍k-chheh chìn-siu ê hong-khì chin khiàm-khoeh, chiah-ê sū lóng ū su-iàu kái-chìn.
Koh lâi ū Gô͘ Eńg-hoâ Bo̍k-su kóng thoân-kàu-chiá kap káng-toâⁿ ê sū. gô͘ Bo̍k-su ū chin chù-tiōng káng-toâⁿ ê sū, i ū chú-tiun thoân-kàu-chiá kàu tī chiūⁿ káng-tâi èng-kai hō͘ lâng kám-kak i sī oân-choân bô siāng-khoán ê lâng, in-uī i sī moá-moá ū lêng-kám ê lâng.
Jiân-āu ū Chiu iàn-choân Bo̍k-su káng-gī thoân-kàu-chiá kap pò͘-tō ê sū, Chiu Bo̍k-su sī pò͘-tō ê choan-ke , i ê hong-hù ê keng-giām kap kháu-châi, hō͘ hù hoē ê lâng chhim-chhim liáu-kái pò͘-tō ê tiōng-iàu kap pì-koat. In-uī goân-lâi pò͘-tō sī ū in-sù ê lâng teh tam-tng, bô in-sù ê ê lâng á-sī sin chut-gia̍p ê lâng choè phàⁿ chiū-sī chit hāng. Tuì tī Chú Bo̍k-su ê káng-ián hō͘ tāi-ke chin bêng-liâu, bô in-sù ê lâng iā tio̍h tī pò͘-tō chit hāng, tio̍h ka-kiông hùn-liān.
āu-lâi iā ū kóng-khí thoân-kàu-chiá kap kàu-io̍k sū-gia̍p ê sū. Chú-káng chiū-sī Tân Kong-hui Bo̍k-su, thó-lūn ê tiong-kan ū kóng-khí Chú-ji̍t-o̍h phèng kàu-oân ê sū, kok tē hng tng kàu-oân ê chha-put-to lóng sī chheng-liân lâng, nā tiong-liân í-siōng ê chha-put-to lóng bô lâng tng, chit tiám tāi-ke ū teh hi-bōng ē thang tit-tio̍h kái-chìn.
Koh-chài pān Iù-tī-hn̂g ê sū, ū teh gī-lūn m̄-chai ē thang lī-ek kàu-hoē loā toā, kiat-kó lóng khoàⁿ chò sī kàn-chiap, ti̍t-chiap lóng ē thang lī-ek kàu-hoē chiah tio̍h, iû-kî-sī Chiong Chú-sî Bo̍k-su só͘ kóng Ji̍t-pún ê chi̍t ê khai-thok thoân-tō ê lē, oân-choân sī oá-khò Iù-tī-hn̂g lâi chò siat-kàu ê bó-thé.
Lēng-goā ū Chiong Chú-sî bo̍k-su káng-gī thoân-kàu-chiá kap keng-chè, Chóng-kàn-sū N̂g Bú-tong Bo̍k-su káng-gī thoân-kàu-chiá kap kàu-hoē chèng-tī. Í-siōng chiah ê lóng sī káng-ián liáu koh hō͘ tāi-ke tit-tio̍h chē-chē ê khè-hoat kap kó͘-lē. Kî-ū chhin-chhiūⁿ 2 uī goā-kok lâng káng-su ê káng-ián ,chit uī kiò-chò Pó-lô Bo̍k-su(Paul Lindholm). Só͘ káng sī koan-hē Ki-tok ê koán-ke ê sū; kap Chiong Chú-sî Bo̍k-su só͘ kóng chē-chē ū saⁿ koan-liân, só͘-í lēng-goā kì chò chit phiⁿ thang chhut tī pún pò.
Koh Ko Bo̍k-su só͘ káng sī "Thoân-kàu-chiá tuì kàu-hoē lāi goā ê kang-chok:. Tuì Tâi-oân kàu-hoē thoân-kàu ū chē-chē ê chí tiám.
Í-siōng thâu boé 7 ji̍t kú, tiong-kan ū chi̍t choā khì Thài-ló͘-kok oán-chiok, soà hóng-būn san-tē Hù-sè kàu-hoē. Koh lé-pài-ji̍t kok thoân-kàu-su suî-ì hun-piat khì pêⁿ-tē kap san-tē ê kàu-hoē. Chóng-hoē āu iā chē-chē tâng-kang siū chhiáⁿ lâu tī tang-pō͘ kok kàu-hoē pò͘-tō poê-lêng téng-téng.
Chit chhù chhim-chhim kám-kak tio̍h ê chiū-sī Hoa-liân chhī kàu-hoē hoē-iú hoan-gêng thoân-kàu-chiá ê khiân-ì, hō͘ kok thoân-kàu-chiá hun-sàn khì hioh tī kok hoē-iú ê ke, thâu-boé 7 àm hō͘ tāi-ke hó khaón -thāi, si̍t-chāi chin toā kám-siā.
