Lūn Poē-ka ūn-tōng
(P.K.U.)
Loā Jîn-seng
1958年11月839期 6-8
Chú-pit Lí Bo̍k-su kóng pún-goe̍h beh chhut lán Tâi-oân soan-kàu chín-tián ê te̍k-khan; kiò goá siá lūn P.K.U. ê sū, taⁿ goá chiàu só͘ hoan-hù lâi siá kuí-kù tī chia, lâi lūn-khí P.K.U. ê koè-khì, hiān-chāi, kap chiong-lâi ê tián-bōng(望展)
1. Lūn P.K.U. ê koè khì.
P.K.U. chit ê miâ tuì lán í-keng m̄-sī sin ê bêng-sû lah, í-keng sī lán chi̍t ê chin se̍k-sāi ê bêng-sû. Jī-chhiáⁿ sī lán chèng-lâng só͘ koan-sim, chù-ì teh khoàⁿ ê bo̍k-phiau chiah tio̍h. Chóng-sī uī-tio̍h sū sī chiah-nih koan-tiōng, só͘-í lán m̄-thang ū chi̍t-khek-kú ê so͘-hut . Lán èng-kai lia̍h i choè sin, iū ji̍t-sin, ji̍t-ji̍t sin lâi kì-tit chiah tio̍h.
(1) P.K.U. ê khí-goân kap ì-gī. P.K.U. ê khí-goân sī tuì A.D. 1954 nî 7 goe̍h chhe 5 ji̍t, tē 13 kài ê Lâm-pō͘ Tāi-hoē, chū-chi̍p tī Tâi-lâm Sîn-ha̍k-īⁿ ê kū lé-tn̂g. Tī Gī-tiúⁿ Khó͘ Iú-châi Bo̍k-su ê léng-tō hā, chiòng-gī it-koat lâi hoat-chiok ê sū-gia̍p.
(2) Hit ê ì-sù chiū-sī kóng Lâm-pō͘ siat-kàu sī tuì A.D. 1865-1965 ê 6 goe̍h chí, tú-tú sī siat-kàu 100 chiu-nî. án-ni tī hit ê 100 chiu-nî ê kì-liām-ji̍t nā kàu ê sî, lán ū sím-mi̍h thang chò phang-phang ê chè, lâi hiàn tī Siōng-chú ê bīn-chêng á-bô? Siūⁿ-lâi siūⁿ-khì chiū koat-gī ēng kàu-hoē poē-ka lâi hiàn hō͘ Chú sī tē-it hó ê koé-chí.
(3) "Kàu-hoē poē-ka ūn-tōng" pún-lâi chin ê ì-sù m̄-sī kóng pài-tn̂g ê kiàn-bu̍t poē-ka, sī kóng jîn-sò͘ ê poē-ka. Ì-sù chiū-sī beh kó͘-bú hoē-iú chi̍t ê chio chi̍t ê, chit khoán ê sìn-gióng ho̍k-heng, kiù-lêng ê toā ūn-tōng. Kàu-hoē-tn̂g ke têng-poē , che sī piān-gî-siōng án-ni kóng, lâng khah khoài lí-kái.
Tio̍k-chhiú hit nî tú-tú sī A.D. 1954 nî 7 goe̍h , ān-kàu 100 chiu-nî A.D 1961 nî ê 8 goe̍h, tú-tú sī iáu 11 nî. Lán phó͘-thong lóng sī kóng 10 nî , iā kóng tī chit 10 nî tiong, kàu-hoē ūn-tōng beh tuì 150 keng hō͘ i chìn kàu 300 keng. Che sī tong-sî ê bo̍k-phiau kap ì-sù(Si̍t-chāi sò͘ sī 149 keng, kàu 298 keng chiah tio̍h)
