Sím-mi̍h kiò-choè "Hiàn hō͘ Siōng-tè"
Chiap 9 goe̍h hō tē 11 bīn
Kang Bān-lí
1958年12月840期 11-12
Taⁿ nî-boé í-keng kàu. Lán iā ài kì-liām Sèng-keng ê sū; iā ài chiok Sèng-tān, iáu-kú chi̍t hāng, chiū-sī ài lán nî-boé choè chi̍t pái ê koat-soàn, khoàⁿ lán kin-nî uī Chú hōng-hiàn joā-choē, iáu ū khiàm Siōng-tè ê siàu bô.
Tī chia koh chhut 2,3 phiⁿ koan-hē " Hōng-hiàn" ê kó͘-lē kap pò-kò. Goān tāi-ke tī che nî-boé ke-thiⁿ kám-siā kap hōng-hiàn ê cheng-sîn chiū-sī.
2. Î-chhî chè-si kap Lī-bī lâng ê lō͘-ēng.
In-uī lī-bī chi-phài sī Siōng-tè só͘ kéng-soán beh tam-tng hoē-bō͘ ê kang, ia̍h ài Lī-bī lâng ē thang choan-sim tī hoē-bō͘, ia̍h āu-lâi tī sèng-tiān ê kang, Lī-bī chi-phài bô pun thó͘-toē hō͘ in choè sán-gia̍p. " To̍k-to̍k Lī-bī chi-phài Mô͘-se bô pun gia̍p hō͘ in; Iâ-hô-hoa Í-sek-lia̍t ê Siōng-tè choè in ê sán-gia̍p, chiàu I só͘ kā in kóng ê"(Iok-su-a 13:33), "Tī Í-sek-lia̍t lâng tiong Goá chiū-sī lí ê hūn-gia̍h, sī lí ê sán-gia̍p" (Bîn-sò͘-kì 18:20). Só͘-í Siōng-tè chiong peh-sìⁿ só͘ hiàn ê cha̍p-hūn-chi̍t siúⁿ-sù hō͘ chè-si kap Lī-bī lâng choè gia̍p. "Khoàⁿ ah, tī Í-sek-lia̍t tiong só͘ thiu ê cha̍p-hūn-chi̍t, Goá í-keng siúⁿ-sù Lī-bī ê kiáⁿ-sun choè gia̍p; in-uī in só͘ choè ê kang sī hoē-bō͘ ê kang, só͘-í siúⁿ-sù in lâi pò-tap in ê tio̍h-boâ"(Bîn-sò͘-kì 18:21). Chè-si Lī-bī lâng, thong Lī-bī ê chi-phài, in tī Í-sek-lia̍t tiong bô hūn bô gia̍p, in só͘ beh chia̍h ê chiū-sī Iâ-hô-hoa ê hé-chè kap I ê gia̍p. Chè-si tuì peh-sìⁿ só͘ eng-kai tit-tio̍h ê hūn chiū-sī chiah-ê, tio̍h chiong chêng-thuí kap nn̄g ê chhuì-phoé kap tō͘ hō͘ chè-si(Sin-bēng-kí 18:1-5 ). Tuì téng-bīn ê Sèng-keng chat thang chai î-chhî chè-si kap Lī-bī lâng ê seng-oa̍h chiū-sī hiàn hō͘ Siōng-tè.
3. Khoàⁿ-kò͘ sòng-hiong lâng ê lō͘-ēng.
Sòng-hiong lâng tī Í-sek-lia̍t peh-sìⁿ ê hōng-hiàn tiong ia̍h ē thang chiàm chi̍t hūn, tī kok chióng ê cheh-kî tiong Í-sek-lia̍t lâng tio̍h ài chiong in ê lé-mi̍h sàng hō ko͘-jî koáⁿ-hū kap sòng-hiong lâng. "Lín siu-koah chhân ê ngó͘-kok, chhân ê kak-thâu m̄-thang koah kàu chīn, ka-la̍uh ê iā m̄-thang khioh, phû-tô-hn̂g ké-chí m̄-thang bán liáu-liáu , ia̍h m̄-thang khioh phû-tô só͘ lak ê ké-chí; tio̍h lâu hō͘ sòng-hiong lâng kap chhut-goā lâng"( Lī-bī-kì 19:9,10). In-uī hit ê só͘-chāi sòng-hiong lâng éng boē tn̄g; só͘-í goá bēng-lēng lí kóng tī lí ê kéng-lāi, tek-khak tio̍h tuì lí ê hiaⁿ-tī, sòng-hiong ê, khiàm-kheh ê lâi khui lí ê chhiú"(Sin-bēng-kì 15:11). Ta̍k pái kàu saⁿ-nî moá, lí tio̍h chiong lí hit nî ê thó͘-sán cha̍p-hūn thiu chi̍t-hūn khǹg tī lí ê mn̂g-lāi, in-uī Lī-bī lâng tī lín tiong-kan bô hūn bô gia̍p, i kap chhut-goā lâng, í-ki̍p ko͘-jî, koáⁿ-hū tiàm tī lín mn̂g-lāi ê, lóng thang lâi chia̍h kàu pá, tì-kàu Iâ-hô-hoa lí ê Siōng-tè tī lí só͘ choè ê sū sù-hok lí"(Sin-bēng-kì 14:28,29).
Chóng-sī chiah-ê bēng-lēng beh jû-hô èng-iōng tī Ki-tok-tô͘? Lán lóng chai hiàn hō͘ Siōng-tè sī ta̍k ê sìn-tô͘ ê chek-jīm, chóng-sī lán choè Ki-tok-tô͘ ê tuì-siōng sī sím-mi̍h kiò-choè hiàn hō͘ Siōng-tè , lán kiám ia̍h sī chhin-chhiūⁿ Í-sek-lia̍t lâng mah? Oāⁿ oē lâi kóng, nā chiàu téng-bīn 3 hāng ê tuì-siōng lâi choè chiū oân-sêng chek-jīm mah? Lán choè Ki-tok-tô͘ ê lâng tio̍h m̄-thang boē kì-tit lán sī tī un-tián ē, ia̍h un-tián sī iâⁿ-kè lu̍t-hoat. Lán ia̍h tio̍h ài chai. Í-sek-lia̍t lâng tû-khì cha̍p-hūn-chi̍t ê hōng-hiàn í goā, iáu ū thâu-chuí ê ké-chí, thâu-chiūⁿ ê gû, iûⁿ, í-ki̍p chióng-chióng ê choeh-kî ê hōng-hiàn kap kám-un hōng-hiàn, chhin-chhiūⁿ kì-chài tī Lī-bī kì 7:13-16; Sin-bēng-kì 16:10. Só͘-í chi̍t ê Í-sek-lia̍t lâng tī in ê hōng-hiàn hō͘ Siōng-tè sī in ê chóng siu-ji̍p ê saⁿ-hūn-chi̍t(33%)
Taⁿ lán lâi siūⁿ, choè Ki-tok-tô͘ ê tio̍h jû-hô lâi oân-sêng hiàn hō͘ Siōng-tè ê chek-jīm. Tû-khì kèng-pài Siōng-tè kap î-chhî hok-im ê chek-jīm "Lín tio̍h khì chio bān peh-sìⁿ lâi choè goá ê ha̍k-seng"(Má-thài 23:16).
án-ni lán choè Ki-tok-tô͘ ê lâng tio̍h ài ū chit 4 hāng ê tuì-siōng:-
1. Kèng-pài Siōng-tè ê lō͘-ēng.
2. Î-chhî thoân-kàu-chiá ê lō͘-ēng.
3. Thoân hok-im ê lō͘-ēng.
4. Hōng-sū ê lō͘-ēng.
1.Kèng-pài Siōng-tè ê lō͘ ēng.
Lé-pài-tn̂g sī lán sìn-tô͘ kèng-pài Siōng-tè ê só͘-chāi, kap kó͘-chá Í-sek-lia̍t peh-sìⁿ siāng khoán, tio̍h ài ū chi̍t ê sek-ha̍p ê tiûⁿ-só͘ thang kèng-pài Siōng-tè. Chit ê ì-sù m̄-sī kóng, nā bô lé-pài-tn̂g chiū boē thang chhē tio̍h Siōng-tè, boē thang kèng-pài Siōng-tè. Choa̍t-tuì m̄-sī, "In-uī put-lūn sím-mi̍h só͘-chāi ū nn̄g saⁿ ê lâng tī goá ê miâ chū-chi̍p, goá iā tī in tiong-kan"( Má-thài 18:20). Chóng-sī nā ū chi̍t ê só͘-chāi hun-piat choè sèng lâi choè kèng-pài Siōng-tè ê lō͘-ēng, oē thang hō͘ it-poaⁿ ê lâng kám-kak tio̍h in sī kàu tī Siōng-tè ê bīn-chêng, iā thang pang-chān in ū chun-kèng kap kèng-uì ê sim. Kàu-hoē sī Siōng-tè ê jî-lú, oē tit chhin-chhiūⁿ chi̍t ke ê lâng lâi chū-chi̍p tī chi̍t só͘-chāi saⁿ-kap kau-poê, lâi tit-tio̍h lêng-kám kap lêng-sèng ê poê-ióng. Só͘-í tuì tī kiàn-tiok kàu-hoē tn̂g ê hōng-hiàn sī kiò-choè hiàn hō͘ Siōng-tè. M̄-nā kan-ta ū chi̍t ê só͘-chāi thang kèng-pài, ia̍h tio̍h ài siông-tong ê chîⁿ lâi kè-sio̍k î-chhî kàu-hoē-tn̂g kap kèng-pài, chhin-chhiūⁿ í, toh, tiān-teng, í-ki̍p sèng lé-tián só͘ tio̍h ēng ê mi̍h, chiah ê ia̍h tio̍h ài sìn-tô͘ hōng-hiàn. "Chit ê kang-tiâⁿ chin toā: in-uī chit ê tiān m̄-sī uī-tio̍h lâng, chiū-sī uī-tio̍h Iâ-hô-hoa Siōng-tè khí ê"(I Le̍k-tāi chì lio̍k 29:1).
(Thāi-sio̍k)
