「羊九十九」的由來
這首是英國蘇格蘭某市的市長Khu-le̍k phêng 的查某囝伊莉莎白作的。伊寫這首，是做基督徒了後無若久。咱若吟這首詩，就知伊有囥滿滿的歡喜佇伊的心內。伊起頭所囥的歡喜佮這款無相同。伊是市長的查某囝，見若伊所愛--的，逐項攏通快快得著；所以伊想平常的人是真下賤，無有親像伊所囥的歡喜。伊拍算伊的快樂無有別項通比。總是到伊捌耶穌了後，這款的快樂予伊袂滿足，知這是外皮暫時的歡喜nā-tiāⁿ毋是真實久長的福氣。所以伊決意愛欲揣出實在久長的快樂。後來果然得著，因為伊讀著約翰第十章所記迷羊的故事，明白伊本身tú-tú是親像迷路的羊，今已經予耶穌揣著；彼時對伊的真心寫出這首詩來顯明伊所得著永遠無變的歡喜。
伊所做的詩毋但這首，有人編輯伊所作的做有一本，號名叫「家庭的寶典」關係這首詩，佇彼本的頭序有按呢講：
「這幾choā 的詩是表現；最近得著tháu放，年少基督徒的經驗，向望佮伊的欣慕。就是徛佇這个人生的 lím-kîⁿ，目睭向佇信仰上所明明看見的仙境來寫--的。遮个經驗，向望佮欣慕比並是ná親像跤跡印佇時間的沙埔，這个沙埔有thàng到永遠的大洋」。綴好牧者經過這个荒野，所印遮的跤跡通做後來紲接欲行的人的慰安佮指南」。 |
