首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 基督的疼
基督的疼 影像(3)
卷期：第 13 號 本次： 日期：1927/2 刊名：芥菜子 頁數：3-5
篇名：基督的疼 [ Ki-tok ê thiàⁿ ]
作者：雪峰逸嵐 Soat-hong Iat-lâm
  顯示 : 漢羅 全羅 並列  

基督的疼

(雪峰逸嵐)

 請看這篇的朋友，未看的代先hian 羅馬 8：35－39來讀，紲詳細想，「Chī-chuī欲隔斷咱佇基督的疼？......阮為著你的緣故終日受死看做親像欲thâi的羊.........攏袂會隔斷咱佇上帝的疼。就是咱的主基督耶穌所有的疼」。

    到底基督的疼佇佗位？按怎疼？按怎才欲疼咱？愛小可saⁿ-kap談論。

真神的救主無罪的耶穌刁工降世，出世就包佇冷 ki-ki 的幼布，睏佇tēng khok-khok 的馬槽，伊敢應該著按呢？無。是為著咱的罪。伊疼咱。

佇世間三十外年，食、睏袂照時，世間人毋信伊，反對伊，致到予伊悲傷啼哭佇耶路撒冷城外。伊毋限定為著彼時的人啼哭，也為著現時佮後代毋信的人teh啼哭。狐狸有孔，飛鳥有siū，獨獨疼的主無khoà頭殼的所在，伊thsài著行到這號地步？就是為著咱的罪，伊疼--咱。

伊佇世間雖然遐艱苦iáu-kú是影 nā-tiāⁿ，伊實在的大艱苦是佇十字架，伊來，毋是欲來活；是欲來死。伊若是欲來活，就佮咱無干涉。伊是欲來死，主耶穌ah！你太遐戇，無愛來活，thài欲來死？Ai-ah！咱有罪，耶穌若無死，來出世是無路用，對伊的死來救咱才會成救贖的功勞，就是為著咱的罪，伊疼--咱。

咱來共伊想佇客西馬尼彼暝的光景是非常的寒，人teh 烘火 (可 14：54；加 22：55)。雖然佇遮爾寒的烏暗暝，伊蹛佇冷冷靜靜的園內，祈禱到流汗親像血滴落地 (加 22：44)。Ai-ah！伊真艱苦伊真悲哀，伊真慘chheh到流汗親像血。佇這tia̍p伊親像一面看著世間人的罪惡重疊疊，一面看著上帝威嚴會大受氣，兩項攏掛佇伊的身軀。列位ah，這款的景況，伊心內的悲慘到按怎 ah？Há！是為著咱的罪。伊疼咱。

你看！掠伊的人來lah。(太26：47)。伊雖然有法度通求爸差 12營的天使來救--伊。(太26：53)。一營是6000人12 營有七萬兩千人。以賽亞 37：36；有記上帝的使者(雖然無記偌濟人)thâi死亞述人18 萬外，若按呢，12 營的天使，敢毋是將耶路撒冷的人攏thâi死了了？總是受縛，予人看做賊頭，也甘願；是按怎thài按呢？是為著咱的罪。伊疼咱。

伊代先受掠到A-ná 的所在，就受一个無路用的差役siàn (喙phoé) (翰 18：22)。到Kai-a-hoat的所在；受人戲弄，cheng、拍、phuì涎。(可；14：65加 22：63)。Ai-ah！遮爾侮辱！！伊是犯著啥物罪？毋kú總督，三擺干證伊無罪。既然無罪thài欲按呢受苦leh？是為著咱的罪，伊疼咱。

    比拉多愛欲閃避責任，將伊送交希律，閣受in 目地無，戲弄--伊。(加 23：11)。才閣送倒轉。Ai-ah！耶穌敢真實遐爾臭人？真寒的烏暗暝，予人拖--遮，拖--遐，連行二十外里，受這款的虐待，攏無一句iⁿh-ngi̍ⁿh。Ai-ah！是按怎thài按呢？是為著咱的罪。伊疼咱。

你看！人teh用鞭拍伊lah。(可 15：15)。羅馬的鞭是啥物款的鞭ah？羅馬是出名gâu刑罰人的國，nā-sái 幾若鞭，就肉裂血流 lah，殘忍的羅馬兵有疼惜耶穌抑無佇in 的手頭是偌悽慘ah？總是「對伊的傷，咱得著醫好」。(I比2：24)。是為著咱的罪伊疼咱。

穿紫色的袍，tì刺仔的冕旒，蘆竹 sut--伊，phuì涎拜--伊。(可 15：17－19)。紫色的袍是啥物ah？敢毋是真凌辱的事？世間人獻予耶穌的冕旒，是刺仔--的，刺仔偌尖偌利ah？毋若按呢，閣用蘆竹sut伊的頭殼。試想尖閣利的刺仔，閣kòng落去，敢毋是鑿入肉內mah？你看！！耶穌的頭殼有血滴出來lah。Ai-ah！耶穌ah！你都無罪thài欲遮受苦leh？無別物，是為著咱的罪，伊疼咱。

請想十字架偌重ah？毋是兩枝phàⁿ杉仔nā-tiāⁿ， 會載規个人佇彼頂面，敢毋是著幾十斤的力！！你看規暝無睏，無罪的耶穌，家己著giâ十字架，（翰19：17）。（佳哉出去的時，遇著古利奈人替伊giâ）。（加23:26）。假好意的兵，用苦膽、bu̍t藥酒欲予伊lim（太27:34;可15:23）予伊欲釘的時較毋知疼。總是耶穌毋肯一屑仔閃避堅苦。是為著咱的罪。伊疼咱。

你看！耶穌倒佇十字架leh。你看！！鐵釘掛佇手lah；你看！！鐵槌 kòng落去lah。Ai-ah！欲裂開lah，血流出來lah，彼爿手也是按呢，兩枝跤也是按呢。你看！！十字架ián徛起來lah。Ai-ah；無罪的主耶穌規身軀的重攏吊佇四枝鐵釘lah。Ai-ah！十字架跤teh滴彼啥物ah？寶血！寶血！！寶血！！！Ai-ah！耶穌ah！你的血thàiteh滴ah？Ah！耶穌的血洗除咱攏總的罪。(I約1：7)。是為著咱的罪，伊疼咱。

你看，上帝也放sak lah，伊的肉體斷氣lah。(可 15：34，37)。殘忍的兵閣對hia̍p下共伊ui一空lah，血水流出來lah。Hàiⁿ-ah，無善終死甚至死了閣著受鎗鑿，是為著咱的罪。伊疼咱。

列位朋友ah，你看伊流汗親像血。伊的頭殼予刺仔所鑿的血，伊的 ka-chiah予鞭拍的血，伊的跤手有鐵釘所釘的血。伊的 hia̍p下有鎗鑿的血。伊有全身所流的心血，攏總是為著咱的罪。伊疼咱。

    Ha！基督的疼ah！你遮懸、遮深，我袂曉閣寫lah，kan-ta用熱熱的心，感謝你。

親愛的兄姊ah！基督的疼遮爾大，啥物會共咱隔斷ah？咱浸佇基督的疼的內面，是偌福氣ah！敬愛的兄姊ah！上帝既然疼咱到按呢，就咱也著相疼。(伊翰 4：11)。阿們。
 
 
 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461