Sèng-ji̍t

 Sèng-ji̍t à-sī An-hioh-ji̍t, Lé-pài-ji̍t, chiū-sī chí pó-poè ê ji̍t. Cháiⁿ-iūⁿ kóng sī chí pó-poè ê ji̍t? In-uī ū chi̍t hāng ê in-toaⁿ.

1.  Siōng-tè ū kóng, Lín tio̍h ēng An-hioh-ji̍t, choè sèng ê ji̍t éng-éng kì-tit m̄-thang boē kì-tit. I bēng-lēng lán tī la̍k ji̍t ê tiong-kan tio̍h choè kang, nā-sī kàu tē chhit ji̍t tio̍h hioh-khùn lâi siàu-liām I.

2.  La̍k ji̍t thoa-boâ, la̍k-ji̍t bô êng, la̍k ji̍t khoà-lū, seng-khu ià-lán, sim-sîn siān, kai-chài chhit ji̍t chi̍t pài thang an-hioh: seng-khu tit-tio̍h sóng-khoài, sim-sîn tit-tio̍h iúⁿ-chhī.

3.  Tī Siōng-tè ê Sèng-tiān saⁿ-kap chū-chi̍p lé-pài. Chhit ji̍t chi̍t pái kap sì-hng ê hiaⁿ-tī chí-bē saⁿ-kìⁿ bīn, saⁿ kau-poê, saⁿ-kap chē saⁿ-kap kèng-uì, o-ló thiàⁿ-thàng lán ê Thiⁿ-pē.

  Ki-tok-kàu í-goā bô chit-khoán ê ki-hoē. Ho̍k-sāi sîn-bêng ê lâng bô chhin-chhiūⁿ lán chiâu-ûn thang hioh-khùn: in iā bô tâng sî saⁿ-kap chū-chi̍p, lóng-sī toaⁿ-sin khì kèng-pài. Só͘-í ū lâng bat kóng, Ki-tok-kàu ê sìn-chiá chin chhin-chhiat, chin hô sim. Che chi̍t pō͘-hūn bô m̄-sī tuì tī An-hioh-ji̍t kau-poê ê ki-hoē. Siàu-liân chì kàu lāu, muí lé-pài saⁿ kìⁿ-bīn chi̍t pái, che kiám m̄-sī kek hó ê ki-hoe mah?

4. Siú lé-pài. Tâng-sim chū-chip, tâng-sî kî-tó, chhut siaⁿ gîm-si chheng-siā Siōng-tè. Gîm-si chiū-sī im-ga̍k. Só͘-í lâng teh kóng, Im-ga̍k-ka lóng-sī Ki-tok-kàu ê sìn-tô͘ khah choē. Kóng án-ni iā káⁿ bô chhò. iā lán tī An-hioh-ji̍t ê sî ū thang saⁿ-kap gîm-si, si̍t-chāi lán ê hióng-hok khah toā.

5.  Thiaⁿ soat-kàu, thiaⁿ kóng tō-lí. Lán ê bo̍k-su, lán ê thoân-tō-su ēng choē-choē khó͘-kang pī-pān Thiⁿ ê bí-niû lâi iúⁿ-chhī lán. Put-tàn ke-thiⁿ lán ê sìn, iā hō͘ lán ê tì-sek khah khoah. Thang kóng khì siú lé-pài oán-jiân chhin-chhiūⁿ khì ji̍p ha̍k-hāu, in-uī muí lé-pài tuì tâi-téng tit-tio̍h Chú ê lô͘-po̍k ê kà-sī.

  Chá nî ū chi̍t ê chhut-goā lâng khì tī So͘-kek-lân lō͘-tiong hioh-kha tī chi̍t ê choh-sit-lâng ê ke. Saⁿ-kap chē ê sî tāi-ke tām-lūn choē-choē hāng. Chhut-goā-lâng kî-koài lông-hu ê phah-ha̍h, in-uī i só͘ kóng ta̍k-hāng chin ū lí-khì, gâu pâi-lia̍t, koh chin su-bûn, chiū mn̄g kóng, Lí siàu-liân ū tha̍k sím-mi̍h tāi-ha̍k? Lông-hu ài-chhiò kóng, Goá bô ha̍k-būn, goá sī chho͘-choh lâng. Chhut-goā-lâng kóng, Bô ha̍k-būn, cháiⁿ-iūⁿ, chong-kàu, kho-ha̍k, tō-tek, chèng-tī ê tāi-chì ta̍k-hāng bat, kóng-oē iū-koh ná tha̍k-chheh-lâng. Lí ê ha̍k-būn tàu-tí tuì tah-lo̍h lâi? Lông-hu ìn kóng, Nā-sī goá kó͘-jiân ū ha̍k-būn, goá só͘ bat--ê lóng-sī tuì thiaⁿ-kìⁿ lâi tit-tio̍h. Tī chí 40 goā nî ê tiong-kan goá muí lé-pài ū khì lé-pài. Tī pài-tn̂g-ni̍h thiaⁿ-kìⁿ bo̍k-su ê ián-káng, toā-toā lâi lī-ek goá. Bo̍k-su ê ha̍k-būn ke̍k chhim, i só͘ pī-pān ê tō-lí chin hun-bêng. I iā siông-siông tām-lūn kho-ha̍k í-ki̍p chèng-tī ê sū hō͘ goán thiaⁿ. Goá put-pò sī kì-tit tām-po̍h nā-tiāⁿ.

  Nā-sī hit ê chhut-goā-lâng siū tio̍h toā kám-tōng, sim-lāi ka-kī kóng, Bo̍k-koài Ki-tok-kàu ê sìn-tô͘ pí pa̍t-lâng khah bûn-bêng. Siú An-hioh-ji̍t tio̍h lah! Lī-ek toā lah! Chit ê lông-hu siú lé-pài 40 goā nî kú soà chiâⁿ-choè chi̍t ê ha̍k-chiá. Chi̍t nî 52 lé-pài, muí lé-pài thiaⁿ ián-káng nn̄g-pái, chi̍t nî tiaⁿ pah-goā pái, si̍t-chāi oán-jiân chhin-chhiūⁿ ji̍p tāi-ha̍k. Chit khoán ê ki-hoē tek-khak m̄-thang sit-lo̍h! Tuì hit-sî liáu-āu chit ê chhut-goā-lâng tì-ì chhoā ke-lāi ta̍k lé-pài kàu pài-tn̂g kèng-pài Siōng-tè.

  Chhun, hē, chhiu, tang. bô-lūn koâⁿ-joa̍h, chhit ji̍t chi̍t pái thang an-hioh, thang kèng-uì lán ê Thiⁿ-pē kap siàu-liām I ê toā un. Chit jit chiū-sī Sèng-ji̍t.