Lō͘-tek Khioh be̍h

 Lō͘-tek-kì 2 chiuⁿ 17 chat.

Lō͘-tek tī hn̂g-ni̍h khioh kàu hōng-hun ê sî, āu-lâi chiong só͘ khioh ê lâi phah, tit-tio̍h toā be̍h ū la̍k táu. Tī Sèng-keng tiong só͘ kì-chài ê hó cha-bó͘-gín-á, Lō͘-tek chi̍t ê chāi-lāi. I ê hàu-hēng si̍t-chāi chin khó-chhú, oē kham-tit choè lâng ê bô͘-iūⁿ, tuì i ê tiōng-hu kè-sin liáu-āu, i kam-goān kap i ê ta-ke saⁿ-kap siū-khó͘ m̄-kam pun-khui. sui-bóng i ê ta-ke chài-saⁿ khó͘-khǹg i tio̍h tńg-khì. I iā kian-sim koat-ì ài kap i choè-tīn, thiaⁿ i só͘ kóng chiū chai. "Bo̍h-tit kah goá lī-khui lí, bô kap lí saⁿ-kap tī-teh, in-uī lí só͘ khì ê goá iā beh khì, lí só͘ khiā ê goá iā beh khì, lí ê peh-sìⁿ iā sī goá ê peh-sìⁿ, lí ê Siōng-tè ia̍h sī goá ê Siōng-tè, Lí sí ê só͘-chāi, goá ia̍h sí tī hia, chòng tī hia, sī goá kàu sí chiah thang saⁿ lī-khui, goá nā bô án-ni, goān Iâ-hô-hoa lâi hêng-hoa̍t goá."

I ê ta-ke Ná-o-bí thiaⁿ-kìⁿ án-ni chiū bô koh khó͘-khǹg i. Nn̄g lâng saⁿ-kap khì Pek-lī-hêng, hit-tia̍p tú sī siu-be̍h ê sî. Lō͘-tek uī-tio̍h ke-lāi ê kan-khó͘, chiū khì be̍h-hn̂g khioh be̍h, lâi hōng-ióng i ê ta-ke, si̍t-chāi thang chheng-choè iú-hàu ê kàu-ke̍k. Taⁿ chiong i khioh be̍h ê chōng-hóng, lâi gián-kiù, choè lán lâng ha̍k-si̍p tō-lí ê kui-kú. Chhì pâi-lia̍t kuí-hāng tī ē-toé:－

1.  Lō͘-tek khì be̍h-hn̂g khioh be̍h, sī tuì chi̍t-ki lâi khioh, m̄-sī tuì kui-pé lâi the̍h. Lán lâng beh ha̍k-si̍p tō-lí iā-sī án-ni, tio̍h tuì chi̍t-hāng, chi̍t-hāng lâi tit-tio̍h m̄-sī choè chi̍t ê tit-tio̍h.

2.  Lō͘-tek khioh be̍h, sui-jiân tuì chi̍t-ki chi̍t-ki lâi khioh, āu-lâi pa̍k kui-pé. Lán lâng teh ha̍k-si̍p tō-lí iā-sī án-ni sui-jiân tuì chi̍t-hāng chi̍t-hāng lâi o̍h, kàu-bé tit-tio̍h choē-choē tī sim-lāi.

3.  Lō͘-tek teh khioh be̍h, ba̍k-chiu tio̍h kim-kim sì-uî khoàⁿ, chiah ū thang khioh.

Lán lâng beh ha̍k-si̍p tō-lí iā-sī án-ni, sim-ba̍k tio̍h chhíⁿ-gō͘, siông-sè thiaⁿ, siông-sè gián-kiù chiah ū thang tit-tio̍h.

4.  Lō͘-tek teh khioh be̍h, sin io tio̍h kam-goān àⁿ-lo̍h, nā thêng-thêng bô chhái-kang.

Lán lâng ài ha̍k-si̍p tō-lí iā-sī án-ni tio̍h khiam-pi, nā chū-ko kiau-ngō͘ bô chhái-kang.

5.  Lō͘-tek só͘ khioh ê be̍h, ji̍t àm the̍h tò-tńg khì in chhù chin ū lō͘-ēng, thang iúⁿ-chhī i ê ta-ke, kap i pún-sin, tāi-ke m-bián iau-gō.

Lán lâng ha̍k-si̍p tō-lí iā-sī án-ni, thang toà tò-tńg khì lán ê chó͘-ke chin ū lō͘-ēng, lán ê lêng-hûn thang tit-tio̍h iúⁿ-chhī, i ê ta-ke kap i pún-sin tāi-ke m̄-bián iau-gō. Lán lâng ha̍k-si̍p tō-lí iā-sī án-ni, thang toà tò-tńg khì lán ê chó͘-ke chin ū lō͘-ēng, lán ê lêng-hûn thang tit-tio̍h iúⁿ-chhī, m̄-biān iāu-gō.

6.  Lō͘-tek án-ni khì be̍h-hn̂g khioh be̍h, sī tuì i ê kam-goān, m̄ sī tuì lâng ê bián-kióng.

Lán lâng beh ha̍k-si̍p tō-lí, iā-sī án-ni, tio̍h tuì ka-kī kam-goān, m̄-sī tuì lâng ê bián-kióng tio̍h kam-goān khek-kí pē si̍p-jī-kè lâi tè Iâ-so͘.

  Í-siōng chiong hàu-lú Lō͘-tek khioh be̍h ê chōng-hóng, lâi hō͘ lán choè ha̍k-si̍p tō-lí ê kui-kú, chhiáⁿ tāi-ke chiàu án-ni kā i èng-iōng khoàⁿ-bāi, ún-tàng ū thang tit-tio̍h ê só͘-chāi.