首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 論孝行
論孝行 影像(6)
卷期：第 14 號 本次： 日期：1927/3 刊名：芥菜子 頁數：6-11
篇名：論孝行 [ Lūn Hàu-hēng ]
作者：陳瓊琚 Tân Khêng-ku
  顯示 : 漢羅 全羅 並列  

論孝行

 古早的聖賢有教示講，「百善孝為先」，實在做人若袂曉有孝佮尊重序大人就通講無有做人的資格。家己的序大人尚且袂曉有孝，欲thài會做社會有德行的人ah？閣再做爸母的人gâu疼家己的囝兒，這是自然的天性。今論序細著會曉孝順序大，佮序大著疼序細，這兩項攏是自然的的天性。毋kú咱常常捌聽著彼款毋若無順趁序大人，反轉佮序大人無同心的囝兒，其中濟濟kiám-chhái是對佇無好的教示佮受著歹環境的影響，總是中間也有為著序大人有缺點的所在，致到予序細袂尊敬--in。因為老爸若毋成老爸，自然囝就毋成囝。頂面若不正，下面自然歪chhoa̍h。總是論序大人疼囝兒有兩款，就是真的疼佮假的疼，所以囝兒的孝順序大人也有真的孝順佮假的孝順兩款佇teh。怎樣講真的疼？真的疼佮假的疼怎樣分別？真的疼法無利己的心肝：親像有一款的爸母若生囝有囥一種要求囝兒後來著有孝家己的心佇teh，這款的疼心無純全，就是無論囝兒後來欲怎樣做，會有孝抑袂，攏無關係，kan-ta若家己的囝兒會成做一个有路用的人物來利益國家佮社會，就雖然不孝家己也無要緊，著有這款的精神才通講有徹底盡做序大人的本份(其實若果然會疼眾人佮利益國家的人也來不孝爸母，這是古今袂捌有的)。今閣再囝兒teh有孝父母，若是kan-ta看父母有疼--伊才欲有孝，親像這款毋是真的有孝囝。我捌看見一款人真不孝in 的序大人，到序大人攏無愛插--伊，是啥物因端，因為是teh怨恨講早時攏無疼--伊。總是親像這款人設使有疼伊，伊也是袂有孝。因為有孝的囝兒無驚歹爸母。咱較濟捌讀著彼本孝經（The Book of Tribil Duty)，閣做囡仔的時，也敢常常捌聽著序大人抑是先生teh講起古早遐个孝子的故事。這無毋是愛囡仔來學in 的模樣的因端。論這款獎勵卻是無通嫌。總是閣較要緊的，就是照我頂面所講。著代先致意養成囝兒予in會曉疼眾人，就是對細漢的時陣起通漸漸予in對好的方面來進步；就是予in gâu同情散鄉、歹命佮艱苦的人，若按呢引chhoā 教示到大漢自然較濟會成做博愛的慈善家，抑是別款有利益社會的人物。雖然囡仔較濟是攏顧家己無想別人，毋kú in較快受感化，佮會曉緊緊改換，所以若對細細漢的時就得著得當的指導法，的確到大漢會得著真大的好結果。耶穌講。「獨獨代先求上帝的國佮伊的義，就恁所欠用的物攏欲紲予恁」。所以咱若會曉代先引chhoā囝兒予in gâu同情佮疼別人，就自然咱免要求in 的有孝順，in家己會曉同情佮孝順家己的序大人。咱東洋人教示囝兒傷顧家己，若生後生就想欲向望in大漢趁錢來飼爸母，閣若生查某囝較phiau-phiat有人緣，抑是予伊讀冊較gâu，就想欲當等好額的子弟來注文通欲對查某囝來取大利益，就是通得著濟濟的聘金。我捌聽人按呢講「我為著予伊讀冊錢仔頭開真濟lah，所以聘金若無收較濟無夠本。」飼查某囝毋通掠做ná親像teh 飼下等動物一樣，講，若有kiàn-lī才欲，若無就毋，若囥這款思想的序大人是證明in有認本身做無價值的物。我捌聽著有一款序大人，就是講，in 查某囝有受相當的教育，閣有一个青年也有受相當的教育，in兩人有不止相意愛閣也有相理解，其實參伊的爸母也是無嫌伊，閣不止呵咾彼个青年，心內也是想講若予這兩个來結成夫婦，拍算不止理想，總是後來閣無予in結成夫婦，是將伊的查某囝嫁予別个。

我就問彼个理由，攏無別項，kan-ta是為著聘金無夠，換話來講，就是無物質的氣力通照in所要求的聘金來予--in 的緣故，才袂成。實在真可憐。做爸母的人ah，恁著知上帝賞賜囝、查某囝予恁的因端，是欲利益通世間，毋是欲予恁對伊來提不義的錢財。設使頂面所講彼个青年人若萬一為著失戀來自殺，這个 罪欲歸佇啥物人？Kiám-chhái人欲應講是伊本身，卻伊本身袂免得無過失，毋kú實在彼兩个爸母也是有責任佇teh。閣再設使彼个查某囝所去的所在，若是翁某袂和，來致到查某囡仔去行短路，就彼个爸母對這方面來講，in有thâi死兩个青年男女的活命。

所以做爸母的人不止著斟酌想，逐項事著趁上主的旨意來照顧伊賜予咱的囝抑是查某囝。咱所有的囝抑是查某囝是上帝的，咱不過是做伊的差用來替養飼nā-tiāⁿ。咱著親像雅各盡中的老奴僕gâu替伊的囝伊撒揀有合閣好的某，所以咱也著替咱的囝揀有合閣gâu 的某，抑是替咱的查某囝揣理想的丈夫，的確毋通無盡忠貪財，若按呢咱的主人的確毋歡喜。親像這款貪財無照公理的序大人欲太有向望序細來有孝伊。人無一个毋愛伊的序細來孝順家己，毋但按呢，逐个都 teh要求囝兒著有孝，總是較濟攏無得著。咱著知論有孝的事毋是會要求的，這是著對囝兒的心家己發出來的，才是真有孝，若是用要求的毋是真。所以做爸母的人盡爸母的義務就到額。咱東洋教囝的法度較濟攏是teh叫囝著會曉有孝，總是濟濟顛倒袂得著。聖經講，愛性命的反轉會失落，總是為著義來喪失性命的顛倒會得著活。所以無疼人的心kan-ta 顧己愛囝兒有孝的人顛倒oh得著有孝的囝兒，總是gâu同情疼痛人的，攏無teh致意家己的人，顛倒會得著有孝囝。論咱的家族生活較濟攏無活氣，就是會予家內的大細攏有趣味，歡歡喜喜teh過日的家庭佇咱台灣通講真少，較濟攏是無滿足、無趣味、無活動teh過日的家庭，因為咱的家庭攏是固執舊慣佮傷崇拜老人，所以真oh得改良。親像有所在雖然家族幾十人，猶kú in 的主人是一个真老的人，雖罔囝孫濟濟對相當的學校出來，嘛是毋敢凊采主意，因為猶有較老的人佇teh。聖經講，新的酒若用舊的皮囊貯無合。所以論欲改良種種的事，若不時問老人的確oh得成。總是我毋是講老人的確攏較輸少年的，顛倒有彼款老人所想所做濟濟項比少年的人較好，較贏的嘛是有。不過彼款特別頭腦的老人卻是較少。雖然是按呢，我也毋是講看輕老人無路用。Kan-ta是講為著社會的發達，國家的興起佮家庭的利益，時到應該老輩的著將伊的位歡喜來讓予少年的，ná親像古早中國的聖君堯帝讓位予舜帝，也舜帝來讓予禹帝的款。

所以家庭也是親像按呢，老人的權雖然讓予少年的也伊khí 隱居，這款顛倒會予序細愈發生起尊敬的念頭出來。做序大的人若gâu做，就序細 gâu 趁。咱知人若gâu疼別人，就別人的確gâu疼伊。論現時的社會對逐方面攏直直teh進步，所以咱也著綴in進步，毋通定定固執，著會曉改良，毋但是家庭著按呢，就別項也是siāng款。親像序大人若是定定愛顧家己也無替囝兒想毋若欲予囝兒孝順，反轉會予in生起不服佮怨恨的心。聖冊也有講做爸母的人毋通激囝兒的受氣，所以做序大的人也毋通傷 phèng家己的意思，無修養，無好的模範通予序細感服。有時序大人家己毋著閣毋認，顛倒欲展序大的威形來予序細驚。親像這款的幸福是佇目睭前nā-tiāⁿ。若欲建設新的家庭自然是著新的人才有合宜。總是今若欲做有孝的囝兒，就爸母所講的話逐句攏著聽嗎？抑是tú-tú著親像古早彼个吳猛去飼蠓才通叫做是有孝的囝嗎？雖然咱本身無予蠓咬，總是用蠓罩來保護爸母免予蠓來處治--in，這袂用得叫做有孝囝嗎？親像設使有彼款爸母叫咱著去偷提錢來予in用，也因為咱愛做有孝的囝，所以愛著趁 in 嗎？抑是kiám-chhái有彼款貪心無公理的老母愛伊的查某囝去做娼妓來趁大錢，按呢敢通為著愛予人稱呼做有孝的查某囡仔，也去做娼妓嗎？

佇京都幾若年前，就是我猶佇遐勉強的時，捌看著新聞記載一篇話 teh呵咾一个孝女的事，就是為著伊的爸母欠錢用，所以將伊的查某囝賣去趁食間，總是這个查某囡仔佇學校的時有聽著道理，是不止熱心的求道者。真不幸出著彼款無法度的爸母，致到予in賣去踮佇活地獄。新聞寫講，彼个查某囡仔時常讀聖經起來讀也祈禱，因為伊想毋是伊所愛，是出佇順趁爸母，姑不將的事。列位兄姊請想bāi-teh著親像這个查某囡仔照頂面所講彼款囝兒才通講是孝女嗎？

設使若伊用法度來閃避bo̍h得予伊的爸母賣，就袂得通講是孝女嗎？總是我毋愛批評伊的是非。論伊所做著抑是毋著，請予看報的列位兄姊去判斷就好。不過論伊有通可惜的一項，是較欠智識淡薄。今平平愛囝兒有孝的序大人也有彼款實在愛囝行好，所以有時一半擺為著家己的話講毋著，也真愛序細來鬥斟酌gâu 的序大人。我捌聽著有一个序大人對伊的家族中的大細約束一項，就是伊若有失錯的所在，有人會曉忠告--伊，定著有賞。親像按呢做序細的人逐个都致意teh聽伊的話，總是猶有一款的序大是kan-ta愛囝兒照伊所講的話去行就歡喜，講，伊的囝真有孝，全然無要緊公理抑是結果，試看poaⁿ戲 teh做彼款奸臣公子為非做歹 lām-sám搶劫抑是侮辱人的子女，毋若老爸袂曉責督，反轉歡喜伊的所做，因為伊的囝若佇面前好喙la̍p-ni，gâu諂媚就好攏無要緊正義，佇這款家庭的確無真的有孝囝；抑是親像頂面所講彼款愛囝兒做賊佮行歹代誌，親像這款毋著的教示，敢也著順趁才通叫做有孝囝嗎？若是gâu閣真有孝的囝的確無愛服從歹，顛倒會用好法度來苦勸一時想無夠的序大人，免予in到尾拄著真見笑的事。因為做賊到尾是著受刑罰，閣行歹到後來的確著拄著真悽慘的報應，若到拄著的時，閣較戇的爸母都會曉想毋著，聖經講，所播合所收，所以行這款不法的事，的確會拄著歹結果，這是明明知影的事實，毋免到時才會知影。所以今收尾來講，就是做序細的人欲行孝行，的確著gâu分別序大人的教示若有合正義佮道理的話，逐項攏著順趁，總是若無合道理的教示著gâu用溫純好的法度指點諫諍，毋通lām-sám順趁。獨獨無論甚物時陣欲諫諍序大人，較好攏毋通用粗魯的法度。有人愛佇爸母的目睭前做tiap-á久的有孝囝，總是反轉做久長的不孝囝。今真的有孝囝，照我想，毋是不時趁爸母的話teh行的人，反轉是彼款gâu體貼爸母的良心，就是逐項事gâu趁天理行的人通講是真的有孝囝。

閣雖罔表面上有時無趁序大人的話去行，毋kú是teh 趁 in 的心肝底的良心teh做事。親像這款敢毋是真的有孝囝嗎？有孝的囝所做，所行佮伊的話攏會利益，毋但家庭，閣也會做地方大家的模範佮加添別人的德行。

 ...MORE
 
 
 
 
 
...MORE
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461