Te̍k-pia̍t ē chheng-liân
Lō͘-ka 2 chiuⁿ. 41-51 chat.
Tha̍k chit 10 chat ê sèng-keng, oē hoat-kiàn chi̍t ê te̍k-pia̍t ê chheng-liān chhut-lâi, kiám-chhái ū lâng teh kî-koài kóng, Chheng-liân chiū-sī chheng-liân, thài ū chi̍t ê te̍k-pia̍t ê? Si̍t-chāi ū.
Lâng chhut-sì tī chit ê sè-kan, nā bô tú-tio̍h iáu-siū, khiok ta̍k ê oē keng-kè chi̍t pái chheng-lián ê sî-kî, tī hit ê sî-kî bô lóng saⁿ-tâng, ū ê khah ū tì-huī, ū ê khah gōng, ū ê khah gâu, ū ê khah ham-bān, chóng-sī hiah ê khah chhut-tioh ê jîn-bu̍t, ti chheng-liân ê sî-kî, ū hián-chhut khah te̍k-pia̍t ê khoán, ū ê te̍k-pia̍t khah gâu kóng oē, ū ê te̍k-pia̍t khah gâu siūⁿ, ū ê te̍k-pia̍t gâu siá-jī, ū ê te̍k-pia̍t gâu pān-sū. Chiah ê thang kóng sī pêng-siông chheng-liân ē te̍k-pia̍t, boē tit-thang kóng sī, tuì kó͘-chá í-lâi, bē-bat ū ê chheng-liân, te̍k pia̍t taⁿ ài; kiû tuì kó͘-chá í-lâi, bē bat ū ê chheng-liân te̍k-pia̍t-chiá, ū hit ê lâng bô? Ū, hit ê sī sím-mi̍h lâng. Iâ-so͘, Iâ-so͘ cháiⁿ-iūⁿ thang chheng-choè te̍k-pia̍t ê chheng-lâin, tuì kó͘-chá í-lâi, só͘-bē bat ū ê. Khoàⁿ I 12 hè ê sî, siú choè-kî liáu, tī Sèng-tiān Keng-ha̍k-sū ê tiong-kan teh thiaⁿ teh mn̄g, khoàⁿ-kìⁿ ê bô m̄ kî-koài, i ê lāu-bú Má-lī-a chhē-tio̍h i ê sî, kap i kóng oē, i ìn chit kù, kóng, "Kiám m̄-chai goá eng-kai tī pē ê só͘-chāi" chit kù oē chám-jiân ū chhim ê ì-sù tī-teh. Chèng-lâng boē bêng-pe̍k hit ê ì-sù, i ê lāu-bú chiong chit kù hē tī sim-lāi, khòⁿ án-ni sit-chāi thang kóng sī te̍k-pia̍t ê chheng-liân, koh-chài i só͘ hián-chhut te̍k-pia̍t ê só͘-chāi, ū 3 khoán, siá tī ē-toé.
1. Te̍k-pia̍t ê chì-khì.
Chit ê chì-khì, sī lâng li̍p-sin ê iàu-bū, lâng nā bô chì-khì, boē tit-thang li̍p-sin, chóng-sī lâng ê chi-khì, lóng bô saⁿ-tâng, ū ê i ê chì-khì ài tha̍k-chheh, ū ê ài thàn chîⁿ, ū ê ài miâ-siaⁿ, Iâ-so͘ ê chì-khì ài kiù lâng, I kiàn-siat thian-kok tī sè-kan, chín-kiù hoān-choē ê lâng, chit khoán ê chì-khì, thang kóng sī te̍k-pia̍t.
2. Te̍k-pia̍t ê giân-gú.
Giân-gú ê goân-thâu sī tuì sim-lāi hoat-chhut, tuì lāi-bīn, hoat-chhut goā-bīn, ū sî bat thiaⁿ-kìⁿ lâng kóng, Hit ê lâng te̍k-pia̍t gâu kóng oē, ū ê kóng, hit ê lâng, kóng liáu put-chí ū tō-lí, che put-kò sī kóng hit ê lâng só͘ kóng ê oē hó nā-tiāⁿ, boē tit-thang kóng sī te̍k-pia̍t. Khoàⁿ tong-sî Iâ-so͘ ê kóng-oē. suî mn̄g suî ìn, chèng-lâng chin kî-koài. I só͘ kóng ū la̍t, iā ū koân, iā chin-si̍t, iā ha̍p-lí, si̍t-chāi thang chheng-choè te̍k-pia̍t ê chheng-liân.
3. Te̍k-pia̍t ê hêng-uî.
Lâng ê hêng-uî, ū chin choē khoán,
uî hiù bān-liân, sī tuì hêng-uî.
Liû-hong pek-sè, sī tuì hêng-uî.
Kong sêng it sî, sī tuì hêng-uî.
Bêng-suî chhian-kó͘, sī tuì hêng-uî.
Sè-kài ê bêng-jîn, tuì i ê hêng-uî hō͘ lâng o-ló ū put-chí choē lâng, chhin-chhiūⁿ Hoat-kok ê Ná-pho-lûn, Bí-kok ê Hoa-sēng-tùn, Tek-kok ê Pi-su-be̍k, Ji̍t-pún ê Tong-hiong, chiah ê in ê hêng-uî, sui-bóng thang tuì-tiōng, iā bô kàu-gia̍h thang chheng-choè te̍k-pia̍t, bô chhin-chhiūⁿ Iâ-so͘ Ki-tok ê hêng-uî. I tī chhêng-liân ê sî-chūn i ê hêng-uî, sī chīn-la̍t thoân thian-kok ê hok-im, lîn-bín Jîn-sim ê chà-guī, pàng-sak ka-kī ê sin-khu lâi kek tû, hoân-ló sè-kài ê o͘-àm, lâu ka-kī ê hiuh lâi sàu tāng kàu-bé chiâⁿ kiù-sio̍k ê kong-lô, hêng-uî chit khoán, chin thang kóng sī te̍k-pia̍t.
Kiat-kio̍k lâi kóng, Ki-tok ê chì-khì, giân-gú, hêng-uî, chit 3 hāng, lóng chiàm te̍k-pia̍t, iā si̍t-chāi sī tuì kó͘-chá í-lâi, só͘ bē-bat ū ê te̍k-pia̍t, iā si̍t-chāi sī choè kó͘-chá í-lâi, só͘ bē bat ū chheng-liân ê te̍k-pia̍t, lán tio̍h chhim-chhim lâi siàu-liām i.
