首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 赴家己的葬式
赴家己的葬式 影像(4)
卷期：第 15 號 本次： 日期：1927/4 刊名：芥菜子 頁數：3-6
篇名：赴家己的葬式 [ Hù ka-kī ê chòng-sek ]
作者：偕叡廉 Kai Jōe-liâm
  顯示 : 漢羅 全羅 並列  

赴家己的葬式 

我就是猶太人。對細漢得著爸母的教示，嚴守摩西的律例。老爸雖然sàn-chhiah，但是伊的學問深，厝邊頭尾也真尊敬伊。伊做猶太教的先生，勢力也毋是小可。

較大漢的時我捌聽見基督教的人teh講，耶穌就是救世主。伊是彌賽亞。起頭聽見按呢我的心不止反對，因為阮猶太人無承認耶穌做上帝的囝。阮kan-ta對重舊約聖經nā-tiāⁿ。新約阮無承受。毋kú ná研究證據ná明，我袂免得就近主，認伊做我的中保。

對這時了後，我常常去拜堂禮拜，我也真致意研究新約的道理。老爸聽見這个代誌隨時發出真大受氣。老母的受氣也真非常。暝日吼無煞，伊看我ná 犯人。姊妹以及親戚無一个無窘逐我。起頭笑我，藐視我，háng我，pak我，後來拍我。用濟濟款的方法來苦楚我，我也是無放sak基督耶穌。然後in用好喙，用甜的話欲利引誘我倒轉，我也無搖choah。果然無法得，就煩惱到極，看我做廢人。

葬式

有一日爸母、姊妹佮親人攏聚集佇厝裡。大家的面貌佮平常時大各樣。無久in聚集佇廳裡，就請我入去。到內面看見老爸、老母、姊妹攏穿帶孝的衫。廳內也有一具棺材。大家憂悶到極。今是啥物人死？我按呢teh想。Teh想的時老爸出聲啼哭講，伊認基督做主。伊已經死！伊已經死！今共伊埋葬。對這tia̍p了後我無囝。伊死lah！大家啼哭無煞。老爸開門講，出去；我到死無欲閣見你的面。就對我出力sak出去。彼時我才知我是去赴家己的葬式。

照阮猶太人的風俗若有人去入別款的教派，就佇厝裡做葬式，意思是對這tia̍p了後，爸無認囝，囝無認爸，大家佮伊絕交。

離開爸母的身邊我無通依倚；姑不將出外去遠遠。總是雖是予老爸毋認做囝，我也毋敢過頭忘恩。有時寫批求伊赦免，總是伊攏毋肯，反轉將批無拆即時寄倒轉來還我。悽慘到袂顧得，我將吞忍做日食。佇十年的中間拄著濟濟款的艱苦，我益發khîⁿ牢佇我的主。我也入學勉強讀冊。總是我所欣慕就是傳主的福音。我也常常出去佮人佈道。

老母過身。

有一日對朋友收著批講，老母破病真傷重teh欲死。我隨時離開英國搭船到美國。到位趕緊倒去厝裡欲共伊看。到門口，心肝艱難到極，因為十年前予老爸趕出，今閣倒來老母破病teh欲死。總是好膽共伊拍門。門隨時開。徛佇門邊有一个老人。伊的頭毛白親像雪。見著我的面伊大聲講，起去樓頂。伊就是我的老爸。十年無見著伊，伊iáu-kú 毋接納我。

上去樓頂拄著我的大姊佮小妹。大姊的面惡惡，小妹掠我看cheh，但是兩人無佮我相借問。實在in款待我親像死。

我入老母的房間。老母倒佇眠床，伊的病傷重。我近倚伊。老母伸手chih我。我的心親像欲kiah裂，實在艱難到極。後來伊出聲講，囝ah你倒來！今我也信耶穌是我的救主。伊會救咱！講煞氣就當。

彼時老爸徛佇我的身邊比手叫我著閣出去。順趁伊的命令我即時出到街路。經過幾若日久，一下昏我佇拜堂裡傳道理，證明耶穌基督就是上帝獨生囝。講煞有幾若个猶太人就近我講，今阮欲認耶穌做阮的彌賽亞。kia̍h頭看見一个老人，頭毛嘴鬚攏白，進前行倚我徛的所在。伊開聲吼，講，耶穌你是我的救主。我信你，我信你。就將手搭我的肩頭，chim我講，囝ah，今我信耶穌lah！看見我的老爸按呢我的心親像欲爆裂。我袂曉得怎樣講，kan-ta跪落佇伊的面前，感謝上主的權能佮伊的恩典。

本堂的牧師看阮爸囝歡喜到流目屎，就請阮入去內面。無久我的大姊佮小妹也入來。兩个揪我的手講，今阮也是耶穌的學生。阮欲認伊做救主。老爸手kia̍h懸講。天爸你的仁愛到極深。你有拯救阮全家，阮你賜阮永遠的大福。

若親像眠夢！老爸、大姊、小妹攏信主。前無久趕我，毋認我，受氣我；今就近我、疼我。前怨恨我，藐視咒詛耶穌的名，今疼伊敬畏伊，認伊做主。上帝的恩實在講袂盡！

後來老爸牽我的手講。十年前我趕你出家，因為你離開猶太教去入基督教。但是彼時你無囥怨恨予我無毋大奇怪。愛知基督的教理較詳細，我暗靜偷買一本新約的聖經。這个代誌我對家內囥密，毋敢予in知，就揣機會暗靜偷提這本冊。讀了明白耶穌基督果然是阮猶太人所欣慕的彌賽亞。彼時我的歡喜講袂盡。但是驚家內的窘逐我一句也毋敢講，kan-ta暗靜將心服事主我的耶穌。

閣無偌久你的老母拄著破病險險死。醫生講著請一个看護婦來鬥照顧。看你的老母teh艱苦看護婦用濟濟 話來苦勸伊；紲將主的福音講予伊聽，因為這个看護婦是熱心的基督徒5。經過無偌久恁老母也信耶穌實在是彌賽亞。因為伊彼時毋知我已經有按呢信，就隱密毋敢對我講，kan-ta致意讀聖經。有一日恁小妹看伊teh讀，忽然生起大受氣。Kài-chài 看護婦 gâu吞忍，致意對伊講明主的福音予伊聽。無久伊反悔佮老母同心也信主。

看見in兩人按呢恁大姊的受氣禁袂牢。雖然老母病傷重伊也無體貼，反轉愛常常用窘逐的手段來款待伊。但是病ná傷重恁老母知死的日已經近lah，就對朋友講伊愛閣一擺見你的面。佳哉你到厝裡伊的心神猶精英，也照伊的心所愛，未死的代先有通佮你同心佇主的面前認伊做中保。

果然到伊過身了後我好膽顯然佇家內我以前所隱密--的。到頂日恁大姊也明白聖冊的教示，歡喜放sak以前所有的錯誤專心決意欲做基督的學生到一世人囝ah，聽見按呢我的歡喜，我的向望，我的福氣到額完滿 lah！我免閣求別項。

Kan-ta愛報你知咱全家為著天爸的恩典，已經得著救lah！今下昏知你佇拜堂裡欲傳主寶貝的福音，阮三个，才做陣來，愛佇眾人的面前顯然來認耶穌基督做咱的中保。以前阮攏是佇厝裡暗靜服事伊。又閣你所傳的道理真大感激阮大家，致到我禁袂牢，紲佇眾人的面前閣再佮主立約來做伊盡忠的學生。伊流寶血替咱死，咱著熱心來服事伊。

老爸手閣kia̍h懸出聲chok-hok講，願亞伯拉罕，以撒，雅各的上帝賞賜阮恩典平安。願耶穌基督的疼徛起佇阮的心到代代無煞。阿們。
 
 
 
 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461