Cha̍p-kì
1) Kiàn-tio̍k huì lóng chóng khai chhut ū cha̍p-goā-bān kho͘, lóng sio kàu chhin-chhiūⁿ hé-thoàⁿ hiah ni̍h o͘, chiū-sī Tông-chì-siā Lú-o̍h chit-pái ū hé sio-chhù, só͘-í ta̍k-hāng mi̍h-kiāⁿ toā-poàⁿ pìⁿ hé-hu. Gián-kiù hit ê goân-in sī tuì nn̄g-ê siáu-sú saⁿ oàn-tò͘, só͘-í chi̍t ê tī poàⁿ-mî khì pàng-hé sī tiâu-tì-kò͘. Sui-jiân kín-kín cháu khì chhàng tī mî-phē toé, ké-sí tìⁿ m̄-chai káng-tn̂g í-keng teh to̍h-hoé, chóng-sī kàu kéng-koaⁿ lóng-chóng lâi, chai-iáⁿ khàm boē ba̍t chiah sū-si̍t it-chīn pâi. Ta̍k-hāng sū bē chhòng ê tāi-seng tio̍h chù-ì, thèng-hāu choè liáu chiah chai m̄-tio̍h í-keng sī phái-tāi-chì, chhin-chhiūⁿ chit ê siáu-lú khoàⁿ-kìⁿ hé chhiong-thian chiah chai hāi, che chiū-sī hō͘-hoé put-ki̍p, só͘-í iû-goân tio̍h siū-pa̍k kàu kaⁿ-ga̍k-lāi.
2) Tō͘-si̍t Put-ti-jîn sian-siⁿ (Thian-bō͘ pò-tō-tuī ê thâu) tī 3 ge̍h 20 hō kè-sin. I tī 6, 7 nî chêng ia̍h bat lâi lán Tâi-oân thoân tō-lí, choan-choan sī oá-khò Chú Iâ-so͘ ê miâ teh kā lâng i-pīⁿ kap kiâⁿ sîn-jiah. Chit-pái uī tio̍h i kè-sin chin choē lâng siong-sim lâu ba̍k-sái, chóng-sī tī chòng-sek ê sî tāi-ke chin hoaⁿ-hí teh kám-siā Siōng-tè, in-uī chai-iáⁿ i ê sin-thé tâi tī thô͘-ni̍h, m̄-kú i ê lêng-hûn tek-khak sī tī thiⁿ-ni̍h, oa̍h-oa̍h put-sî teh thoè toē-bīn-chiūⁿ ê lâng kî-tó. Sian-siⁿ sī chin jia̍t-sim ê Ki-tok-tô͘, tuì i hoán-hoé liáu-āu ta̍k-hāng só͘-choè só͘ kiâⁿ ê sū lóng sī o̍h Ki-tok, gâu thé-thiap loán-jio̍k ê lâng, mî-ji̍t kî-tó lóng sī uī tio̍h chèng-lâng. Sian-siⁿ tú-tú sī o̍h Pó-lô ê khoán bô lūn sī oa̍h á-sī sí i lóng sī uī Ki-tok. I bat kóng tuì i siū Ki-tok ê kéng-tiàu liáu-āu, i ê sin-thé kap lêng-hûn lóng sī sio̍k Ki-tok m̄-sī sio̍k i ka-kī, só͘-í ta̍k-hāng sū lóng sī thàn Ki-tok ê chí-ì teh kiâⁿ. Si̍t-chāi thang kóng sī kūn-tāi bô͘-hoān-tek ê Ki-tok-tô͘, kap si̍t-chāi thang chheng choè Siōng-tè chīn-tiong ê lô͘-po̍k.
3). Lūn Lú-phok-sū tuì ū Ji̍t-pún-kok í-lâi iáu bē bat khoàⁿ-tio̍h. Chit-pang tī Tang-kiaⁿ Lú ko-su ê kàu-siū Pó-chíⁿ Lú-sú ū tit-tio̍h lí-ha̍k phok-sū ê ha̍k-uī, án-ni sǹg sī i choè pún-kok ê Lú Phok-sū sī thâu chi̍t ê. Nā-sī the̍h goā-kok ê Phok-sū khiok téng-nî ū chi̍t ê, lūn i ê miâ goá khoàⁿ sin-bûn boē-kì-tit, chiū sī ū the̍h Bí-kok ê Hoat-ha̍k Phok-sū kap Tia̍t-ha̍k Phok-sū nn̄g-ê ha̍k-uī, hit-sî sin-bûn ū siá kóng the̍h Bí-kok nn̄g ê Phok-sū ê ha̍k-uī ê lâng, bô-lūn sī ta-po͘ ia̍h bē bat ū, chiū sī hit ê sím-mi̍h Lú-sú thâu chi̍t ê. Tuì án-ni khoàⁿ khí lâi Ji̍t-pún Lú-kài ê chiân-tô͘ put-chí thang hoáⁿ-hí ê só͘-chāi. Chóng-sī m̄-nā Loē-tē ê hū-jîn-lâng chiah oē the̍h Phok-sū, goá chhim-chhim ǹg-bāng lán Tâi-oân ê hū-lú tio̍h kín hùn-hoat khoàⁿ sím-mi̍h lâng beh tāi-seng chhin-chhiūⁿ téng-bīn só͘ kóng hit nn̄g ê Lú-sú ê khoán?
