首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 五旬節前的聖神佮以後的聖神
五旬節前的聖神佮以後的聖神 影像(6)
卷期：第 19 號 本次： 日期：1927/8 刊名：芥菜子 頁數：3-8
篇名：五旬節前的聖神佮以後的聖神 [ Gō͘-sûn-choeh chêng ê Sèng-sîn kap Í-āu ê Sèng-sîn ]
作者：陳清忠 Tân Chheng-tiong
  顯示 : 漢羅 全羅 並列  

五旬節前的聖神佮以後的聖神

 無論甚物時代，無論甚物所在，聖神無有兩个，是kan-ta一个nā-tiāⁿ。

總是若讀聖經咱就會知。五旬節前的聖神佮五旬節後的聖神有各樣，宛然ná 別物的各樣，伊的實質(實質)請這邊，若論伊的活動，伊的氣力實在有天地雲泥(天地雲泥) 的差。主講「人若嘴乾著就近我啉，信我的人，teh欲照聖經所講，成做活的水泉，對內面直直chhèng出--來」。這句話是指起信伊的人所欲得著的聖神，總是主袂受榮光，所以聖神袂降臨」。

    佇舊約書中，無論佇甚物所在，通看見聖神的活動，主落世間以後閣較是按呢。若是按呢啥事講「聖神猶未臨到？」這不過是指舊約時代的聖神，若佮五旬節的聖神相比，宛然是親像無一樣，所以才按呢講。

    若是按呢相同一个聖神，怎樣有精差？這个精差的祕密全然是關係佇閣活的主的人性(人性)五旬節前的聖神是做普遍tek (普遍的)超越tek (超越的)上帝的大靈(大靈)總是以後的聖神是關係佇人的耶穌，做閣活的主的靈來，所以有真通驚的氣力佇teh。

    做全能全智的神，欲救世間人是袂會。怎樣？因為siuⁿ懸，離人siuⁿ遠，袂得通同情同感的因端。所以上帝為著欲救罪人，姑不將著代先成罪人的形體才會用得。

    做超越，普遍的上帝的聖神，袂得通tiàm佇軟弱的人的心內，來相佮徛起，來安慰in，來予in清氣相，所以著等到做人的耶穌的神來，才會通得著有力的活動。

    所以若離開閣活現在的基督來欲想聖神是袂用得。

I、舊約中所看見的聖神：-

(1) 「極起頭上帝創造天地，地是空空，深淵烏暗，上帝的神運動佇水面」。(創世記1：1)。

(2)耶和華講，人已經...放縱私慾。我的神的確無欲永永tiàm佇in 的心內(創世記6：3)。

(3) 「耶和華坐雲臨到佮摩西講話，將摩西受的神賞賜七十長老。然後神歇in，in有趁神teh講......」(民數記11：25)。

(4) 「耶和華的神感動我來講；我喙所講，就是伊的話」。(撒母耳II 23：2)。

(5) 「上帝ah！求你共我創造清氣的心；予我的心志換新堅固。毋通趕我離你的面前；也毋通予聖神離開我」。(詩篇51：10)。

(6) 「我去tah-lo̍h就會就會閃避你的神」？(詩篇139：7)。

(7) 「我的奴僕大衛，我已經揣著，我用我的聖的油抹伊」(詩篇89：20)。

(8) 「受抹油的人講，主耶和華用神感化我；用油抹我；予我傳國音予sòng-hiong 的人聽。」......

 (9) 「chiah的百姓違逆，予聖神煩惱；所以耶和華看伊親像仇讎來講伊」(以賽亞63：10)。

(10) 「伊的神感動我，予我徛在共我講，你著入厝，關門毋通出來」(以西結3：24)。

(11) 「我賞賜in這樣的心，予in改換in的心神，除去in的硬心，用心的神賞賜in」(以西結11：24)。

(12) 「用我的成予恁，予恁趁我的禮儀，守我的法度」(以西結38：27)。

(13) 「我無閣放sak in，用聖神賞賜in，予in知我是in的上帝」(以西結39：29)。

(14) 「末日，我欲將我的神賞賜萬人，予恁的後生查某囝講袂來的代誌，少年人看見各樣的形象老人夢見夢」(約珥 2：28)。

II. 新約中所看見的聖神：-

A、五旬節前，-

(1) 「因為伊佇主的面前欲最大，葡萄酒佮一切的酒攏無啉；對老母的胎就予聖神充滿」(路加1：15)。

(2) 「天使in伊講，聖神欲臨到你，至懸的權能欲致蔭你；(Tâng：35)。

(3) 「天開，上帝的神親像井áⁿ降臨佇伊的頂面」。(馬太3：16)。

(4) 「彼時耶穌予聖神chhoā到曠野，欲受魔鬼的刺」。(馬太4：1)。

(5) 「耶穌佇聖神的權能倒轉去加利利。伊的名聲遍傳佇四圍的地方」。(路加4：14)。

(6) 「風出在伊差，你聽伊的聲，毋知伊對tá-lo̍h來，tá-lo̍h去；見若對聖神生的亦是按呢」(約翰3：8)。

(7) 「所以我共恁講，見若罪惡謗瀆攏欲赦免伊；獨獨謗瀆聖神的，無欲赦免伊」。(馬太12：31)。

(8) 「當彼時耶穌佇聖神快樂，講父ah，天地的主，我呵咾你」。(路加10：21)。

(9) 「若是恁受送交的時，莫得掛慮欲怎樣講，抑是講甚麼話；因為所著講的，欲佇彼時賞賜恁。因為毋是恁家己講，是恁的父的神tiàm佇恁teh講」。(馬太10：19)。

(10) 「獨獨我若靠上帝的神趕鬼，就上帝的國已經到恁lah」。(馬太12：28)。

(11) 「也我欲差我的父所應允的到佇恁，總是恁著tiàm佇這个城，聽候對頂面落來的權能親像衫共恁穿」。(路加24：49)。

(12) 「所以恁著去招萬百姓來做學生，共in囝洗禮，予in歸佇父，囝，聖神的名」。(馬太28：19)。

(13) 「我亦欲對父求就伊欲用閣一个保惠師予恁，予伊永遠佮恁蹛；就是真理的神；世間所未接納的，因為無看見伊，閣毋捌伊；獨獨恁捌伊；因為伊佮恁相佮蹛，閣欲tiàm佇恁」。(約翰14：16-17)。

(14)若是保惠師，就是聖神，父佇我的名所欲差的，伊欲將一切的事教示恁，閣欲予恁記得我一切所共恁講的」。(約翰14：26)。

(15) 「若是保惠師，就是真理的神，對父出的，我對父欲差伊就近恁，伊若到，欲為著我做干證」。(約翰15：26)。

(16) 「若是我將實情共恁講；我去，是做恁的利益；我無去保惠師無來就近恁，若去，就欲差伊就近恁。伊到的確用罪，用義，用審判，來指正世間」。(約翰16：7)。

(17) 「我猶有濟濟項欲共恁講，獨獨恁現今當未起。到真理的神來，伊欲chhoā恁入佇一切的真理；因為伊毋是欲憑家己來講：是將伊所欲聽見的來講；閣欲用teh欲來的事報恁」。(約翰16：12)。

(18) 「耶穌閣共in講，願恁平安；我差恁，親像父有差我。已經講這个話，就對in歕氣講，恁受聖神......」。(約翰20：21)。

(19) 「毋通離開耶路撒冷，著聽候父所應允的，就是恁捌對我聽見的；因為約翰用水行洗禮；獨獨恁，閣無幾日，欲佇聖神受洗」。(使徒1：4-5)。

(20) 「獨獨聖神到佇恁的時，恁欲得著才能」。(使徒1：8)。

B。五旬節後，-

(1) 「五旬節的期已經到，in攏聚集佇一所在。忽然對天有聲親像大風teh吹，充滿in所坐規間的厝。就有teh分開的舌，忽然予in看見，親像火的舌，歇佇逐人的頂面。In攏受聖神充滿，才開嘴講別樣的腔口，是照聖神所賞賜in講的」。(使徒2：1-4)。

(2) 「伊既然予上帝的正手舉伊高高，閣對父受所應允的聖神，就將這个降落，就是恁所看見，所聽見的」。(使徒2：33)。

(3) 「彼得彼時予聖神充滿」。(使徒4：8)。

(4) 「祈禱煞，聚集的所在大振動；眾人攏受聖神充滿，好膽講上帝的道理」。(使徒4：31)。

(5) 「彼得講，亞拿尼亞，啥事撒旦充滿你的心來騙聖神...你毋是騙人，就是騙上帝」。(使徒5：3)。

(6) 「In已經落去，就替in祈禱，予in受聖神......對按呢共in按手，in就受聖神」。(使徒8：15)。

(7) 「彼得iáu-kú teh講遮的話的時，聖神降臨佇見若聽道理的人。奉割禮的信徒，佮彼得相佮來的，因為聖神的賞賜亦降落佇外邦人，就攏奇怪」。(使徒10：44-46)。

(8) 「In服事主禁食的時，聖神講。著共我分派巴拿巴Sò-lô，來成我召in去擔當的工。對按呢禁食祈禱，用手hoāⁿ in就差in去」。(使徒13：2-3)。

(9) 「學生滿心歡喜，閣予聖神充滿」(使徒13：52)。

(10) 「因為聖神捌禁in傳道理佇亞西亞......耶穌的神毋准」...

(11) 「獨獨上帝的神若徛起佇恁，就恁無tiàm佇肉體，是tiàm佇神；無有基督的神的，毋是伊的人」(羅馬8：9)。

(12) 「聖神家己佮咱的神相佮干證咱做上帝的囝」(羅馬8：16)。

(13) 「閣聖神也親像按呢扶持咱的軟chiáⁿ」。(羅馬8：26)。

(14) 「若是咱所得著毋是世間的神，就是對上帝來的神，欲予咱知上帝所白白所賞賜咱的」。(哥林多I 2：12)。

(15) 「Kiám毋知恁是上帝的殿，上帝的神tiàm佇恁內面mah？」(哥林多I 3：16)。

(16) 「予上帝的神感動來講的，無人講，耶穌是通咒詛；若毋是予聖神感動的，也無人會講，耶穌是主」。(哥林多I 12：3)。

(17) 「Taⁿ主就是彼个神；主的神佇彼位，彼位就chū-uî」。(哥林多II 3：17)。

(18) 「彼个賞賜恁聖神閣出力行chiah的權能佇恁中間的，是對恁趁律法來行，抑是對恁聽來信mah？」。(加拉太3：5)。

(19) 「Taⁿ我講，恁著照神來行，就無成肉體的私慾」。(加拉太5：16)。

(20) 「咱若照神來活，著照神來行」。(加拉太5：26)。

(21) 「對伊的神，用權能予恁心內勇健」。(以弗所3：16)。

(22) 「致意守聖神所賞賜的合一」。(以弗所 4：3)。

(23) 「時時佇聖神來祈禱」。(以弗所6：18)。

(24)  聖神交通。(腓立比2：1)。

(25) 「用上帝的神來服事」。(腓立比3：3)。

(26) 「用聖神所賞賜的歡喜」。(I帖撒1：6)。

(27) 「毋通拍hoa聖神」。(I帖撒5：19)。

(28) 「因為上帝所賞賜咱的，毋是驚惶的心神，就是權能，仁愛守己的心神」。(提摩太II 1：7)。

(29) 「恁為著基督的名予人罵，有福氣；因為用光的神，就是上帝的神，安歇佇恁」。(彼得I 4：13)。

(30) 「所疼的兄弟ah，chiah的神毋通攏總信，獨獨著試驗chiah的神是對上帝抑毋是；因為有濟濟假先知出來入世間。恁對這个捌上帝的神」。(約翰I 4：1-2)。

(31) 「伊已經用伊的神賞賜咱，咱對按呢知咱tiàm佇伊，也伊tiàm佇咱」。(約翰I 4：13)。

(32) 「佇主的日，我予神感動，聽見佇我的後面有大聲親像號頭......(啟示錄1：10)。

(33) 「有耳孔的著聽聖神共遮的教會所講的」。(啟示錄2：7)。

(34) 「我聽見對天有聲講，你著寫伊。Taⁿ以後佇主來死的死人有福氣：聖神講，是lah，予in soah in的著磨，來安歇，in所做的工也綴in」。(啟示錄14：13)。

(35) 「我受聖神感動的時，天使chhoā我到一个山真懸真大，指示我聖的耶路撒冷的大聲。上帝予伊對天落來」。(啟示錄21：10)。

(36) 「聖神佮新娘共人講，來；聽見伊的聲的人亦著共人講，來」。(啟示錄22：17)。

以上對舊約到新約的路尾來對比斟酌讀了，蓋冊，目睭放khoeh來想，就兩爿各樣的所在，明明能看見。就是舊約時代的聖神，全然是屬佇外tek (外的)，超越tek(超越的)；新約時代的聖神是倒péng，是屬佇內在tek(內在的)。人格tek(人格的)。彼个款式，宛然ná空中遍遍teh照的光線，若經過紅色的玻璃窗，入厝內，厝內忽然變做血色這樣。

光線平平是一个，iáu-kú若經過主的玻璃窗入來的時，就彼个光線忽然變做teh to̍h 的火燄，變做會予死人閣活的靈力(靈力)來活動。

所以拒絕閣活的基督，上天的基督的人所叫做聖神的，就是舊約tek(舊約的)，詩人tek(詩人的)，全然無有予人靈閣活的力佇teh。

獨獨耶穌對父求，所差的聖神；佮對伊的名來的，就是新約的聖神，咱免躊躇通斷言伊是氣力活命的神。

 ...MORE
 
 
 
 
 
...MORE
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461