"Lāu-bú hō͘ phang tèng-tio̍h ê sî."

Chit ê kò͘(誤植kó͘)-sū sī goá tuì chi̍t-pún chheh khoàⁿ ê, goá khoàⁿ liáu ū toā kám-kek goá ê sim, iā put-chí sim-sek, só͘-í goá ū siūⁿ beh pò hō͘ tāi-ke chai.  Nā oē choè tāi-ke ê lī-ek sī chin-hó.

"Ū chi̍t-pái chi̍t ê Bo̍k-su, mn̄g chi̍t ê gín-ná kóng, ‘Lí tuì sím-mi̍h sī chiū bat Kiù-Chú, iā lí ê choē tit-tio̍h, sià-bián ê sū lí kám si̍t-chāi chai-iáⁿ mah?'  Gín-ná suî-sî ìn kóng tio̍h, goá ê choē tit-tio̍h sià, goá ū si̍t-chāi chai-iáⁿ."  ‘Lí oē chai sī sím-mi̍h sî?'  Gín-ná suī-sî in kóng, ‘Lāu-bú hō͘ phang tèng-tio̍h ê sî'.  ‘Lāu-bú hō͘ phang tèng-tio̍h ê sî, che sī sím-mi̍h ì-sù?'  Gín-ná ìn kóng; goá ê lāu-bú tuì chin tsá ê sî, chiū siông-siông kà-sī goá kóng Kiù-chú ū thoè goá sí, chóng-sī goá boē-oē liáu-kái hit ê ì-sù.  Ū chi̍t nî ê hē-thiⁿ, lāu-bú tī chàu-kha ê keh-piah-keng, nn̄g ê chhiú-ńg pih koâiⁿ-koâiⁿ teh ut saⁿ goá tī goā-kháu ê tiâⁿ teh thit-thō ê sî, hut-jiân chi̍t-chiah ê hó͘-thâu phang poe lāi tī goá ê thâu-khak piⁿ, phǹg-phǹg háu teh-beh lâi tèng goá, goá chiū the̍h chhiú-kun kā poāⁿ, chóng-sī bô hoat-tō͘ goá chiū kín-kín cháu khì lāu-bú hia bih tī Lāu-bú só͘-hâ ê u-su-kûn ê kha.  Goá ê lāu-bú chiū ná chhiò, khoàⁿ goá beh àn-choáⁿ lâi siám-pī hit-chiah hó͘-thâu-phang, khoàⁿ-tio̍h hit-chiah phang ji̍p-lâi chiū ēng nn̄g chhiú ti̍t-ti̍t kā-i poāⁿ, lâi pó-hō͘ goá, m̄-kú phang m̄ kiaⁿ i, chiū khì tèng goá ê lāu-bú ê chhiú.  Phang tèng liáu siuⁿ chhim, soà boē-oē thiu i ê chiam khí lâi, soà tī lāu-bú ê chhiú-ni̍h hng-hng háu ti̍t-ti̍t siūⁿ beh cháu chóng-sī boē oē.  Lāu-bú chiū kiò goá kóng, lí khoàⁿ phang tèng goá boē-oē koh tèng lí lah!  Lāu-bú lún i ê thiàⁿ bô phah sí hit-chiah phang.  Lāu-bú chù-sîn khoàⁿ hit chiah phang, hut-jiân ēng chit ê choè phì-jū lâi kà-sī, goá boē-oē liáu-kái lūn Kiù-chú ê sū.  Hit-sî lāu-bú kiò goá kóng, taⁿ m̄-bián kiaⁿ lah! kín chhut lâi goá thè lí hō͘ phang tèng lah! lí khoàⁿ sô-tī goá ê chhiú-ni̍h, boē-oē koh tèng lí choè lí an-sim.  Hit-sî goá iau chin kiaⁿ, goá ê lāu-bú ēng chéng-thâu-á khì bong phang ê chiam kóng, goá thoè lí hō͘ phang tèng lí tit-tio̍h an-jiân, goá chêng bat liām chi̍t kù Sèng-keng kóng (I tio̍h-siong goá tit-tio̍h i hó) chit kù goá chêng lóng boē-oē liáu-kái, lāu-bú kóng hit-kù ê ì-sù tú-tú chhin-chhiūⁿ chit-chūn ê kong-kéng lah!  Goá khoàⁿ-tio̍h hit ê kong-kéng goá chiū liáu-kái, kàu-taⁿ goá lóng boē(誤植boō)-oē boē kì-tit.  Tuì hit-sî lūn kiù-tō goá lóng bêng-pe̍k.  Goá ê choē àn-choáⁿ oē tit-tio̍h chheng-khì, chiū-sī Kiù-chú Iâ-so͘ sí tī si̍p-jī-kè, lâu i ê pó-huih lâi soé goá ê choē.

Hit ê Bo̍k-su thiaⁿ-liáu iā put-chí kám-sim.  Lán lâi siūⁿ kin-ná-ji̍t lán iā sî tit-tio̍h Kiù-chú siok-hoê lán ê choē, lán ū tit-tio̍h sià-choē, ah! tāi-ke m̄-chai ū chhin-chhiūⁿ chit ê lāu-bú lún i ê thiàⁿ lâi kà-sī i ê kiáⁿ-jî á-bô?  Iah choè kiáⁿ-jî ê m̄-chai ū chhin-chhiūⁿ chit ê kiáⁿ hiah khoài kà-sī á-bô?  Goá ǹg-bāng tāi-ke tio̍h chhin-chhiūⁿ chit-khoán sī goá ê sim só͘-bāng.  A-Men.