I-liâu thoân-tō
Chiā Uí
1960年11月863期 5-6
Iâ-so͘ tī sè-kan ê sî m̄-nā thoân hok-im kà-sī lâng, hoān-nā ū pīn, hō͘ kuí khó͘-chhó͘ ê I ū i-hó in, tháu-pàng in ê kan-khó͘. I i-hó lâng ê jio̍k-thé ê piⁿ, siāng-sî chín-kiù in ê lêng-hûn. I-liâu thoân-tō ê bo̍k-tek, sī ài o̍h Chú ê khoán-sit, i-hó lâng ê pīⁿ-thiàⁿ, chín-kiù in ê lêng-hûn. Beh ta̍t-sêng chit ê bo̍k-tek lán ài chù-ì kuí-nā tiám.
I. Tio̍h ū hó ê cheng-sîn ê ho̍k-bū jîn-oân.
Tī i-liáu ki-koan kang-chok ê jîn-oân sī tāi-piáu Iâ-so͘ , ū thiàⁿ kap hi-seng ê cheng-sîn, choè lí-sióng sī chèng kang-chok jîn-oân tio̍h ū têng-thâu-siⁿ , chóng-sī si̍t-chè-siōng kang-chok jîn-oân lóng beh têng-thâu-siⁿ sī chin khùn-lân. Choè chió tī i-liâu thoân-thé ê lāi-bīn tio̍h ū chi̍t kûn ê sêng-si̍t, thiàn chú ê Ki-tok-tô͘, in ê le̍k-liōng ū kàu-gia̍h thang éng-hióng i-liâu thoân-thé choân-pō͘, hō͘ chi̍t ê thoân-thé ū Ki-tok ê cheng-sîn ê piáu-iān. Sui-jiân sī tuì chi̍t pō͘-hūn sió-só͘ ê lâng ê bô chū-kak, óng-óng ū thiaⁿ-tio̍h Ki-tok-kàu ê i-liâu ki-koan, pí pa̍t-ê i-liâu ki-koan khah bô chhin-chhiat ê hong-phêng . Chit khoàn ê hong-phêng sī lán chin m̄ ài thiaⁿ, chóng-sī iā sī bô thiaⁿ, bô hoán-séng boē ēng-tit ê hong-phêng. Goá ǹg-bāng tī i-liâu ki-koan ê lāi-bīn , chin-si̍t ê Ki-tok-tô͘ oē thang kiat-ha̍p choè chi̍t kûn, éng-hióng choân-thé ê chit-oân, hō͘ choân-thé ê chit-oân thang hoat-hui Ki-tok Iâ-so͘ ê cheng-sîn.
II. Tio̍h ū hó ê kī-su̍t ka siat-pī.
Chióng-hoà Ki-tok-kàu Pīⁿ-īⁿ ê īⁿ-tiún Lân I-seng bat tuì goá kóng, lán ê i-koán ê siat-pī eng-kai tio̍h choè kàu choè hó ê siat-pī, lán ê kī-su̍t jîn-oân, i-seng iā sī tio̍h ū choè hó ê. Goá chin khim-poè Lân I-seng choè lán ê īⁿ-tiúⁿ, si̍t-chāi ū ǹg chit ê bo̍k-phiau teh ló͘-tek, iā i ê ló͘-le̍k ê chi̍t pō͘-hūn í-keng ū piáu-hiān tī pīⁿ-īⁿ ê lāi-bīn . Hó ê kī-su̍t, í-ki̍p beh hō͘ hó ê kī-su̍t oē thang hoat-hui ê, hó ê siat-pī pīⁿ-pīⁿ tiōng-iàu, tuì tī hó ê kī-su̍t, hó ê siat-pī lán khah khoài tit-tio̍h pīⁿ-lâng ê sìn-hāi , ho͘ō in khah khoài hó. Hiān-sî bô lūn sím-mi̍h khoán ê i-liâu thoân-thé, lóng ǹg chit ê bo̍k-phiau teh ló͘-le̍k. Lán ê i-liâu ki-koan , bô lūn Má-kai á-sī Chong-hoà, Ki-tok-kàu I-koán iā sī ǹg chit ê bo̍k-phiau teh ló͘-le̍k.
III. Tio̍h ū hó ê hō͘-oān-chiá
Lán ê i-liâu ki-koan sī lán kàu-hoē chi̍t ê iú-le̍k ê chiàn-tò͘ tan uī, khiā tī chiân-soàⁿ ê kun-tuī tio̍h ū hó ê hō͘-hong ê chi-chhî, chiah oē thang hoat-hui in ê le̍k-liōng. Lán ê i-koán sī lán ê kàu-hoē ê, lán ê kàu-hoē tio̍h choè i-koán ê iú-le̍k, hó ê hō͘-oān-chiá, chiah oē hō͘ chit ê í-liâu tan-uī hoat-hui in ê le̍k-liōng. Lán beh cháiⁿ-iūⁿ lâi choè hó ê hō͘-oān-chiá.
a) Kî-tó.
Hó ê bo̍k-su iàu-kiû i ê hoē-iú uī-tio̍h i kî-tó. Hó ê pò͘-tō-ka ê āu-bīn, iā ū pek-chhiat thè i kî-tó ê sìn-tô͘. Lán ê i-liâu thoân-thé tong-jiân khiàm-ēng, iā teh thoân-thé tong-jiân khiàm-ēng, iā teh kî-thāi kàu-hoē uī-tio̍h in lâi kî-tó.
b) Koan-sim.
Lán beh choè hó ê hō͘-oân-chiá, lán tio̍h sî-siông koan-sim lán só͘ oān-chō͘ ê i-liâu thoân-thé ê sū. He̍k-sī in só͘ choè hó ê sū, lán koan-sim kó͘-lē in, á-sī ū sím-mi̍h hia̍p-hiâm ê sū, lán thang chí-tiám hō͘ in kái-chèng, iā tàu kài-siāu hó ê chit-oân.
c) Keng-chè ê oān-chō͘.
Nā bat koan-he i-liâu kang-chok ê lâng, lóng chai i-liâu kang-chok só͘ khiam-ēng ê chîⁿ m̄-sī sió-khoá, chiah ê khiàm-ēng ê chîⁿ ū choē-choē ê lâi-goân, chóng-sī choè tē it kun-pún , tē it tiōng-iàu ê lâi-goân chiū-sī tuì hó ê hō͘-oān-chiá. Lán ê kià hō͘ i-liâu thoân-thé ê chîⁿ nā ná choē, chit ê ki-koan ná iông-īn keng-êng kap kiàn-siat. Goá toā ǹg-bāng lán choè kàu-hoē ê chi̍t oân, ta̍k lâng chiâⁿ choè hó ê hō͘-oān-chiá, ēng kî-tó, koan-sim, keng-chè lâi hō͘ lán ê i-liâu ki-koan ná-kú ná gâu êng-kng Siōng-tè.
Chin thang kám-siā Siōng-tè, koan-hē lán kàu-hoē ê i-liâu ki-koan nā lâi ná choē, goá ǹg-bāng chiah ê ki-koan lóng oē tit-tio̍h hó ê cheng-sîn ê kang-chok jîn-oân, hó ê cheng-sîn ê kang-chok jîn-oân, hó ê kī-su̍t kap siat-pī, í-ki̍p hó ê hō͘-oān-chiá thang lâi ta̍t-sêng i-tī jio̍k-thé kap lêng-hûn ê sù-bēng.
