"I-liâu Thoân-tō-ji̍t" kám-giân
Tâi-lâm: Lîm Gio̍k-lîn
1960年11月863 kî p.8
Cha̍p-it goe̍h tē-it Chú-ji̍t, sī tē chhit kài Chóng-hoē só͘ siat-tēng ê choân-séng "I-liâu Thoân-tō ji̍t".
Sin-lâu Chín-liâu-só͘, sī Chóng-hoē só͘ sio̍k kok sū-gia̍p tiong, choè sió ê I-liâu ki-koan. Tī chia ài kám-siā Eng-kok Bó-hoē ê koan-sim kap pang-chān, í-ki̍p Lâm Tiong kok kàu-hoē, kî-thaⁿ ê kàu-hoē kap kò-jîn ê koan-sim, te̍k-pia̍t kap tāi-tó, hō͘ goán tī Chú ê miâ thang pang-chān choē-choē lâng, put-tàn siáu-thé ê pēⁿ tit-tio̍h i-hó, jî-chhiáⁿ lêng-thé ê oa̍h-miā iā tit-tio̍h kiù. Hō͘ lán choè thang siū kám-kek kap kám-siā Chú ê, chiū-sī ū lâng tī tī chia tit-tio̍h tō-lí ê koé-chí, kàu tī in ka-tiong, sui-jiân cho-gū chhì-liān kap sí-sit, iáu-kú put hòng-khì. iā ū choē-choē lâng put-tàn chiap-sio̍k siú lé-pài, jî-chhiáⁿ siū-sé chìn-kàu. ǹg-bāng choân-séng kàu-hoē choân-oân chi̍t-sim tāi-tó, hō͘ kìⁿ-nā tī Chú ê miâ só͘ siat lóng-chóng ê i-liâu ki-koan, koh khah tit-tio̍h tuì téng-bīn sù--lo̍h-lâi ê le̍k-liōng , ia̍h hō͘ Chín-liâu-só͘ tī I-liâu pō͘-hoē ê chí-tō-hā , toā-toā ê chīn i-liâu kap kiù-lâng ê sù-bēng lâi êng-iāu Chú sèng-miâ.
I-liâu thoân-tō chiàm tī thoân-tō kang-chok-siōng ê tiōng-iàu-sèng sī put-thāi giân--ê. Nā bô, chiū Chú í-keng choân-sim choân-le̍k koàn-chù tī "Thoân hok-im" kap "Kà-sī lâng hoán-hoé choē," bô su-iàu huì-liáu choē-choē sî-kan, sim-sîn kap lêng-le̍k tī i-pēⁿ koáⁿ-kuí lah. Chú chhe-khián ha̍k-seng chhut-khì thoân-tō ê sî, iā bô su-iàu siū-ú i-pēⁿ koáⁿ-kuí ê koân-pèng hō͘ in. Pó-lô iā sī sio-siāng chit-iūⁿ--ê. Chì-kàu hiān-chāi choē-choē chhut-miâ ê pò͘-tō-ka, put-tàn in ū thoân hok-im ê pá-ak, Siōng-tè iā hō͘ in ū kî-tó thang i-pēⁿ ê in-sù. Chhiáⁿ-khoàⁿ Tâi-oân ê Thoân-kàu-sú, iā-sī chí-sī lán chai, "I-liâu" kap "Thoân-tō" sī put-khó hun-lī--ê.
Kiù-lêng tong-jiân sī tē-it iàu-kín--ê, tān--sī tû-khì choa̍t-chèng ê í-goā, tek-khak tāi-seng tio̍h kiám-khin in bah-thé pēⁿ-thiàⁿ ê thòng-khó͘, jî-hō͘ in chiah ū sim-sîn thang kheng-ní chiap-siū lí só͘ thoân--ê, Sū-si̍t-siōng hoān-chiá ji̍t-mê tng teh sîn-gîm haiⁿ-haiⁿ chhan ê tiong-kan , á-sī ū sè-kiáⁿ ê pēⁿ tng tîm-tiōng ê sî, i ê pē-bó choân bô sim-sîn thang chù-ì thiaⁿ, lí-kái lí só͘ thoân--ê sī sím-mi̍h.
Tuì thoân-kàu-siōng, i-liâu ki-koan só͘ kòng-hiàn ê le̍k-liōng ê toā kap tiōng-iàu, chhiáⁿ khoàⁿ koè-khì tī Pak, Tiong, Lâm saⁿ só͘ ê kàu-hoē i-īⁿ tit-tio̍h tō-lí ê lâng, tī kàu-kài jû-hô jia̍t-sim, jû-hô kang-chok , khó-í choè oa̍h-oa̍h ê chèng-kù. He̍k-chiá pa̍t-kàu pa̍t-phài, í-chêng bô ū khai-siat i-īⁿ, kīn-lâi siōng-chhiáⁿ cheng-sian khióng-hō͘ teh chhòng-siat i-liâu ki-koan teh chò in ê thoân-kàu kang-chok ê pang-chān , hô-hòng ū káu-cha̍p-goā-nî iû-kiú ê le̍k-sú ê ki-koan , lán kiám thang hòng-sang mah?
Chin thang kám-siā , chit kài Chóng-hoē ū chè-tēng choân-séng-sèng ê "I-liâu kì-liām-ji̍t," lâi ho͘-tiàu lán koan-sim kap kì-liām chiah ê sū-gia̍p. Che hō͘ lán muí chi̍t ê sìn-tô͘ thang jīm-sek, Tâi-oân ê thoân-kàu ê āu-bīn, ū i-liâu ki-koan teh hia̍p-chok kap hùn-tò͘. iā hō͘ bô ti̍t-chiap chham-ka tī chit ê ki-koan ê hiaⁿ-ché, khó-í tī ún-ba̍t ê só͘-chāi tāi-tó kap koan-sim, chiâⁿ-chò ū hūn tī chit ê chiàn-tò͘-oân ê chi̍t-ê. Só͘-í "I-liâu Thoân-tō ji̍t" thang kóng chin ū ì-gī--ê. Khó-sioh bē-tit-thang kóng sī ke̍k ha̍h "Sî-gî," thang kóng "Sî ū khah bān." In-uī kî-thaⁿ ê ki-koan í-keng chá chiū ū siat-tēng in kok hun-piat ê kì-liām-ji̍t lah.
Koan-hē chit kài kì-liām-ji̍t ê phian-pâi, pān-hoat thong-koè ê lí-iû, ū lâng sûn-būn, goá bē-ē thang kā in soat-bêng sím-mi̍h, in-uī goá lóng bô chiap-tio̍h jīm-hô jī-tiâu kong-bûn. "Sûn-būn ê lâng chhin-chhiūⁿ lāi-sim ū kuí-tiám ê gí-gī. Koan-hē choân-séng-sèng kì-liām-ji̍t, tē-chhit kài Chóng-hoē ê sió-cho͘ ū phian-pâi, "十一月馬偕,中嘉高為彰化, 南中為新樓...紀念献金不用普通禮拜献金是以特別奉獻" Chit khoán ê koat-tēng bē-bián ê hō͘ lâng seⁿ-chhut gî-he̍k ê koan-liām. Chiàⁿ-chiàⁿ teh chhui-chìn oân-choân ha̍p-it ê kin-ná-ji̍t, iáu-kú ū tē-he̍k ê koah-hun, che sī chhin-chhiūⁿ chū-chok chhiûⁿ-piah teh keh-lī, kiám m̄-sī chū-kí mâu-tún mah? Hi-bōng tē-he̍k ê hun-pia̍t , téng-kip ê chha-piat, chiah ē-tit-thang chá-ji̍t thiat-siau, hō͘ lâng-lâng tī Chú ê thiàⁿ ê lāi-bīn , ē-tit kám-kak bô ū keh-mo͘h8, sī iông-ha̍p chò chi̍t-thé ê sim-chêng chiah hó.
Sui-jiân Sin-lâu Chín-liâu-só͘ sī Lâm Tiong siū Chóng-hoē uí-jīm koán-lí--ê , tān--sī tī "I-liâu Thoân-tō ji̍t," eng-kai choân-séng ê kàu-hoē tio̍h chiâⁿ-chò chi̍t-thoân, tâng-sim chi̍t-ì, uī-tio̍h choân-séng kàu-hoē só͘ sio̍k lóng-chóng ê i-liâu ki-koan, koan-sim tāi-tó kap hōng-hiàn. Che án-ni chiah ē hō͘ lâng-lâng kám-kak teh hióng-siū pêng-téng phok-ài ê un-tián.
