巴博士佮白話字聖經
1960年12月864期 6-7
巴克禮博士常常勉勵人著致意讀聖經。伊捌講，「台灣的教會因為有白話字聖經通予會友讀，所以才會大進步。」白話字聖經快讀，也快理解。所以咱著對重，毋通看輕。常常有人問講，甚物時就有白話字聖經？幾若位宣教師佇廈門相佮翻譯，對西曆1873年就有白話字聖經通用聖冊公會請巴牧師閣重翻譯新約。伊對1913年4月開始改譯，到1914年10月初就翻譯清楚。1915年3月15到7月初8，佇廈門閣再對稿。然後有設法佇日本橫濱印。1916年5：28出版(彼時巴牧師68歲)。發行以後，15年久的中間有銷6萬本佇台灣，福建佮馬來亞。
1919年6月25，巴牧師對Kek-lah-sū-ko大學得著神學博士的學位；1921巴博士受揀做英國長老教會第一會總會議長。實在是真大的榮譽。
1925年聖冊公會決定著閣改譯舊約，揣無一個比巴博士較適當的人。所以就閣佮巴博士交涉。伊毋敢答應，總是台南的眾宣教師同心鼓舞伊著擔當。彼時伊已經78歲lah。巴博士對1927年開始改譯舊約。1930年12月尾翻譯舊約。1930年12月尾翻譯清楚，就設法佇上海商務印書館印。1932年上海事變的時，商務印書館拄著爆炸；所印的舊約攏予火燒了了，一年久的工攏歸佇烏有。巴博士為著按呢真艱苦，好佳哉伊有另外留一部的原稿。彼時以後常常寫批去上海探消息，看佇時會通閣同工。1932年10月巴博士閣過去上海設法，逐項真順序進行，到1933年8月4日印刷舊約的工全部明白。博士滿心歡喜就倒來台灣。彼年的聖誕日，伊接著20本新點點的舊約對上海來。巴博士的歡喜快樂講袂盡。對創世記到啟示錄，全部是巴博士所改譯。這個工毋是小可，伊的貢獻實在真大。
|
