Sèng-tàn cha̍p-kám
1960年12月864期 21-22
Goá taⁿ í-keng sī moá 60 hoè lāu-lâng, kuí-nā lé-pài chêng ba̍k-chiu m̄ tú-hó, i-seng bēng-lēng tio̍h hiu-ióng chi̍t goe̍h-ji̍t. Tit-tio̍h chē-chē hó pêng-iú saⁿ-thàm kap koan-sim, chin kám-siā. Chú-pit Tân bo̍k-su, kang-tiûⁿ chú-jīm Lîm Tiúⁿ-ló iā tāi-piáu Kong-pò-siā lâi saⁿ-thàm. Chú-pit soà kóng tī goá ê hiu-ióng tiong chit ji̍t beh lâi liû goá ê tn̂g-tō͘. āu-lâi khoàⁿ-kìⁿ goá chhut-lâi teh sì-kè kiâⁿ, soà kiò goá tio̍h siá sím-mi̍h " Sèng-tàn cha̍p-kám." Taⁿ thài ū sím-mi̍h " cha̍p-kám" leh, nā siá ū " chi̍t kám" mā hó.
Lāu-lâng éng ài kóng koè-khì ê sū, thn̄g kū chhài-boé, kiám-chhái khah bô ha̍h sî-sè, chhiáⁿ goân-liōng. Goá 6 hoè ê sî goán choân-ke thiaⁿ tō-lí, chiap-siū Ki-tok ê hok-im. Hit sî tio̍h kiâⁿ chi̍t phò͘ liân lō͘ khì An-sūn kàu-hoē lé-pài, hit sî iáu-boē ū Chú-ji̍t-o̍h ê cho͘-chit. Kàu goá 12 hoè lâi Thài-pêng-kéng tha̍k sió-o̍h ê sî chiū ū chú-ji̍t-o̍h; tong-chho͘ tuì Sèng-tàn iā bô te̍k-pia̍t ê sím-mi̍h hêng-sū, koè 2,3 nî āu, chiū Sèng-tàn ê sî ū chiok-hō-hoē, sī Chú-ji̍t-o̍h ha̍k-seng ê iû gē-hoē, Iù-tī-pan gîm gín-á si, Sèng-si-pan gîm Sèng-si(hit sî kiò chò " ióng sim-sîn si"), Sèng-keng-cho͘ sī piáu-ián Sèng-keng ê kò͘-sū, ê kì-tit piáu-ián hān 9 chiuⁿ, goá ê phoè-ia̍h sī hit ê chhut-sì chiū chhiⁿ-mî ê, chiàu Sèng-keng án-ni piáu-ián, bô te̍k-pia̍t ho̍k-chong chng-thāⁿ, chi̍t-bīn piáu-bêng khèng-chiok ê hoaⁿ-hí, chi̍t-bīn hō͘ Chú-ji̍t-o̍h ha̍k-seng piáu-chhut in só͘ tha̍k ê.
Chóng-sī chit khoán ê hong-sio̍k chiām-chiām sio̍k-hoà, uī-tio̍h chiok Sèng-tàn ū kàu-hoē tio̍h chún-pī kuí-nā goe̍h-ji̍t, siat-pī pò͘-kéng, ho̍k-chong, te̍k-pia̍t phian ke̍k, ū sî koè-thâu ke̍k-hoà, sit-lo̍h sîn-sèng, giâm-siok, kan-ta hó-chhiò; ū sî poaⁿ kui-mê, īⁿ-kàu ê lâng soà kóng lâi-khì khoàⁿ Iâ-so͘ hì, liân lé-pài-tn̂g ê káng-tâi iā bú-tâi-hoà. Kīn-lâi ū kàu-hoē kám-kak hit khoán ê poaⁿ-hì bô tú-tú ê êng-kng Siōng-tè, chiām-chiām choán-ǹg chàn-bí lé-pài ê hong-sek. Cha̍p-jī goe̍h kiò-chò Sèng-tàn goe̍h, 12 goe̍h chi̍t-ē kàu, ke-bīn tiàm-thâu lóng sī sèng-tàn ê chng-thāⁿ, chng Sèng-tàn-chhiū, pak-ke̍k lāu-lâng, Sèng-tàn kha̍h-phìⁿ, put-koán sìn Chú bô sìn Chú ê tiàm-thâu, lóng án-ni teh chng-thāⁿ, sui-jiân bô sìn Chú ê lâng iā saⁿ-chiⁿ bé Sèng-tàn kha̍h-phìⁿ teh saⁿ chiok-hō, sīm-chì ū chhut-hiān Sek-khia ê kha̍h-phì, Sèng-tàn ê sū soà pìⁿ chò chi̍t khoán ê liû-hêng.
Chho͘-tāi kàu-hoē tuì Iâ-so͘ ê koh-oa̍h, thé-giām tit-tio̍h chheng-chò-gī ê hoaⁿ-hí (Lm 4:25), í-ki̍p thāi-bōng Ki-tok chài-lîm ê sim chhiat, khah bô tì-ì Ki-tok kàng-tàn ê sū, Nā-sī kàu-hoē tī Lô-má ê sè-kài teh chìn-tián tiong, īⁿ-kàu ê siā-hoē ū tang-cheh ê chè-sū ê lāu-jia̍t, sìn-tô͘ chiām-chiām iau-kiû tuì Iâ-so͘ Ki-tok ê Sèng-tàn ū chiok-hō ê hêng-sū. Goá siūⁿ Ki-tok bô kàng-seng , lán bô kng-bêng kái-koat. Tuì Ki-tok ê kàng-seng, sè-kài khai-sí sin ê kí-goân, só͘-í kìⁿ-nā thé-giām tio̍h tit-kiù ê pêng-an ê lâng, bô chi̍t ê tuì Sèng-tàn bô piáu-chhut 12 bān hun ê hoaⁿ-hí. Tuì chit ê hoaⁿ-hí lâi piáu-chhut khèng-chiok, iā chit ê hoaⁿ-hí tī oá 200 nî chêng tuì thiⁿ-sài lâi thoân-pò, só͘-í lán ài tò-tńg lâi siūⁿ hit ê thâu chi̍t ê Sèng-tàn ê chêng-hêng.
1. En̂g-kng chun-kuì ê Kiù-chú kàng-seng tī pi-bî ê bé-chô.
2. Thiⁿ-téng thian-kun toā hoaⁿ-hí, chàn-bí o-ló Siōng-tè ê kiù-in.
3. Tāi-seng thiaⁿ-tio̍h hó siau-sit ê bo̍k-chiá khiân-sêng ê kèng-pài.
4. Teh tui-kiû chit ê chín-kiù ê toā kng tang-hng ê phok-sū hōng-hiàn in ê pó-poè.
Sèng-tàn ê khèng-chiok nā sit-lo̍h chiah ê, kiaⁿ-liáu chhin-chhiūⁿ sio̍k sè ê ông, thiaⁿ-kìⁿ hó siau-sit tian-tò sim peh-pak.
