Sèng-chheh Kong-hoē
Sèng-chheh Kong-hoē kūn-lâi tī Hui-li̍p-pin teh chīn-la̍t kó͘-bú boē Sèng-keng. Kiaⁿ-liáu ū lâng oē-hiáu boé, boē hiáu tha̍k, m̄-chai ì-sù só͘-í ū ēng kuí-nā khoán ê phoe-sìn kià hō͘ boé ê lâng, ǹg-bāng in khah oē liáu-kái Sèng-chheh ê ì-sù.
Thâu chit tiuⁿ phoe sī lūn-khí Iok-hān Hok-im-toān. Ū kóng, Chit pún chheh chin-chiàⁿ ū kè-ta̍t; chiū-sī Iâ-so͘ só͘ thiàⁿ ê ha̍k-seng, Iok-hān pún-sin só͘ tù-ê. Tù chit pún chheh ê sî-tāi, tāi-iok chiū-sī Iâ-so͘ chhut-sī liáu-āu tē 90 nî. Thang chai Iok-hān tù chit pún chheh hit-tia̍p í-keng chin-lāu. Hok-im-toān chiū-sī Sin, Kū-iok tiong ê chi̍t pún chheh. Chiah ê chheh chiū-sī Siōng-tè ēng I ê Sèng-sîn kám-tōng lâng lâi siá ê.
Chhiáⁿ lín tha̍k chhiáⁿ-lín thiaⁿ Iâ-so͘ só͘ kóng ê, iā tì-ì sūn-thàn I ê kà-sī. Taⁿ tha̍k Sèng-chheh tiong chhut-miâ ê chiuⁿ chat, pâi-lia̍t tī ē-toé:
1. Chì pó-poè ê chin-lí. Má-thài: 5-7 chiuⁿ.
2. Mî sî ê bûn-tap. Iok-hān 3.
3. I thoè-lán. Í-sài-a 53 chiuⁿ.
4. Cha̍p tiâu kài-lu̍t. Chhut-ai-ki̍p 20 Má-thài 22: 36.
5. Sí-sit ê lō͘. Chim-giân 7 chiuⁿ, Lô-má 1 chiuⁿ.
6. Jīn-choē. Si-phian 51 chiuⁿ.
7. Toā lîn-bín. Í-sài-a 55".
8. Thian-tông tē-ge̍k. Khé-sī-lio̍k 19-22".
9. Chiok-hok. Si-phian 103".
Koh bô loā-kú koh kià chit tiuⁿ phoe.
Phoe lâi ū chiah ê chiuⁿ-chat:
1. Nā-sī ko͘-toaⁿ á-sī pêng-iú kū(誤植kù)-choa̍t lí. Si-phian 23, 27. Lō͘(誤植Lô͘)-ka 15.
2. Nā-sī Seng-lí bô hoat-ta̍t. Si-phian 37, 73; Iok-hān 15.
3. Nā-sī Sit-chì. Si-phian 126, Iok-hān 14.
4. Nā-sī pêng-iú bô sìn-iōng. I Ko-lîm 13.
5. Nā-sī giâu-gî. Iok-hān 6: 40, 7: 17. Hui-li̍p-pí 2: 5-11.
6. Nā-sī ū choē. Lō͘-ka 18: 9-14. Lō͘-ka 7: 36-50. Si-phian 32.
7. Nā-sī pù-ū. Si-phian 24. Iok-pek 1, 2; Lō͘-ka 19: 1-10.
8. Nā-sī hoaⁿ-hí. Si-phian 13. Má-thài 6: 33. Lô-má 12.
Tuì siu tio̍h chiah ê phoe liáu-āu, ū 2000 goā lâng siá phoe kóng in ài boé Ki-tok-kàu ê chheh, tiong-kan ū 37 lâng kóng in beh chhin-kūn Chú. iā ū siá phoe hō͘ thoân-tō, bo̍k-su chhéng-kàu khah boē bêng ê só͘-chāi. Sūn chit ê ki-hoē ū thoân-kàu-chiá siá bêng in só͘ mn̄g ê, soá siat Thong-sìn Sèng-keng-hoē lâi ín-chhoá chiah ê kiû-tō-chiá.
