Kà kiáⁿ ê hoat-tō͘
(Soà chiap chêng hō)
Hoa̍t gín-á ê sî, m̄-thang m̄ hoa̍t-ì, tsá ū nn̄g-kok kau-chiàn, chi̍t-kok chhut nn̄g-tuī peng, chi̍t-tuī hō͘ thài-tsú koán, chi̍t-tuī hō͘ kong-chiok koán, kàu poàⁿ-lō͘, Thài-tsú ê iâⁿ-lāi, chi̍t-ê peng thau-the̍h lâng ê mi̍h, kā i tēng sí-choē, kong-chiok chiū thoè chit-ê peng tuì Thài-tsú kóng-chêng. Thài-tsú kóng, Hoān-nā thau-the̍h lâng ê mi̍h ê, goá tek-khak bô sià-bián i, kong-chiok kóng, Hāi-ah, goá ê iâⁿ-lāi ài thau-the̍h ê, chi̍t-poàⁿ khah-ke, goá lóng sià-bián i, nā chiàu-lí só͘ kóng, kám m̄-sī lóng tio̍h tēng sí-choē mah. Thài-tsú kóng, tio̍h, só͘-í lí ê iâⁿ-lāi, hoān-tio̍h chit-ê thau-the̍h lâi siū hêng-hoa̍t ê chin-chē, goá chiū m̄-sī án-ni, nā hoān-tio̍h ê. Tek-khak tio̍h-sí, siū chit-khoán ê hêng-hoa̍t ê, chiah chin-chió, gín-á iā-sī án-ni, i nā chai bián siū hêng-hoat, tek-khak ta̍k-hāng káⁿ-choè che lóng sī tuì-tī eng-kai hoa̍t-í, m̄-hoa̍t i ê iân-kò͘.
iā ū chi̍t-khoán gín-á choè-pháiⁿ nā khoàⁿ pē-bú ê bīn-sek, chiū chai thang ké-pìⁿ, iā ū chit-khoán ēng hô-pêng ê-siaⁿ. I chiū chai thang kiaⁿ, nā kā i kóng chi̍t-pái liáu, koh kóng chi̍t-pái m̄-thiaⁿ, chiah thang chek-hoa̍t i, iā ū lâng ēng bô siúⁿ i lâi choè hêng-hoa̍t, che iā sī hêng-hoa̍t tiong chi̍t-hāng ê hó hoat-tō͘, nā gín-á ēng phoê-kiû phah i ê hiaⁿ-tī á, chiū chhiúⁿ i hit-ê kiû, nā phah-pháiⁿ hiaⁿ-tī á ê thit-thô-mi̍h, chiū chiong i ê thit-thô mi̍h lâi poê i, án-ni chiū m̄-káⁿ oan-ke.
Kóng pe̍h-chha̍t, sī tē-it toā ê koè-sit, in-uī boē hiáu-tit ê lāu-bú, siông-siông kóng pe̍h-chha̍t háng gín-á, tì-kàu gín-á kui-sì-lâng o̍h i kóng pe̍h-chha̍t nā gín-á the̍h m̄ eng-kai the̍h ê mi̍h, m̄-thang háng i kóng, che ē kā-lâng, sui sī chin sè-hàn ê gín-á, bô-kú iā-chai bô-iáⁿ, tuì án-ni. āu-lâi sui-jiân kóng chin-si̍t, i ê kiáⁿ iā m̄-sìn i, che kám m̄-sī khó-sioh.
àm-sî m̄-thang háng-hoah gín-á, tio̍h kah i kóng oē, hō͘-i si̍p-koàn, nā hêng-hoa̍t i koaiⁿ àm-pâng lâi háng hoat i, nā pêng-siông sî bô teng-hoé, tek-khak m̄-káⁿ kàu àm ê-chhù, iā tek-khak m̄-káⁿ pûn-sit hoé lâi khùn, choè pē-bú ê-lâng, tio̍h bêng-bêng kā gín-á kóng, ji̍t-sî mî-sî bô koh-iūⁿ, m̄-thang kiaⁿ nā siông-siông án-ni kā i kóng, gín-á mî-sî tī goā-bīn, á-sī chhù-lāi bô-hoé chiū m̄-kiaⁿ. Lâng ê-sim oē kiaⁿ kuí, goân-in sī tuì soè-hàn siông-siông thiaⁿ pē-bú ê háng-hoah, só͘-í chiah éng boē tû-khì chit-khoán ê kiaⁿ-sim. Boē-hiáu-tit ê pē-bú. Sī siūⁿ ēng chit-khoán háng-hoah ê hoat-tō͘, chiah bián-tit i ka-kī hō͘ gín-á kiáu-chhá ê kan-khó͘, m̄-chai i ū chhò-gō͘ tī-teh, nā kah gín-á eng-kai ê tāi-chì, m̄-bián ēng bô-iáⁿ ê háng-hoah, án-ni gín-á chiū ná ē-hiáu-tit hêng-hàu pē-bú.
Nā-sī bāng-kìⁿ sím-mi̍h pháiⁿ-bāng, sī chia̍h-mi̍h boē siau-hoà só͘-tì, m̄-thang kiaⁿ-hiâⁿ. Lóng bô koan-hē lâng ê chai-eh hok-khì, khoàⁿ-miā iā sī án-ni, bô chi̍t sī koan-hē lâng. Tio̍h hō͘ gín-á chai, m̄-thang sìn. Choè pē-bú ê-lâng nā oē án-ni si̍t-hêng, chiū oē biáu-tit gín-á ta̍k-hāng bô-iáⁿ ê kiaⁿ sim, koh tuì gín-á siū-tio̍h ê khoàⁿ-oa̍h, pí ēng koài-mi̍h háng-hoah gín-á ê-lâng têng-pē.
Kiàn-siàu ê-sim lâng-lâng ū, nā-sī gín-á ū kè-sit, m̄-thang kà-i pò-iông h ō͘ goā-lâng chai, sī kiaⁿ-liáu i soà boē kiàn-siàu, iā m̄-thang siông-siông lêng-jio̍k gín-á, tio̍h kà-sī i hó-táⁿ khì-kiâⁿ só͘ eng-kai kiâⁿ ê-sū lâi hō͘ Siōng-tè hoaⁿ-hí chiah hó, nā-sī ēng bô lí khì pé-pa̍k gín-á, sī hoán-tńg hāi-i kui-sì-lâng.
Siū-khì ê-sî, m̄-thang hêng-hoa̍t gín-á, nā tī siū-khì, á-sī iu-būn ê-sî lâi hêng-hoa̍t gín-á. Gín-á ê-sim tek-khak siūⁿ, sī tuì i-ê sin-khu lâi tháu-khuì, siat-sú gín-á siū-khì lâi chek-pī i-ê sió-tī, i-ê lāu-bú iā siū-khì lâi chek-pī i, chiū bú-kiáⁿ nn̄g-lâng. Kiám m̄-sī pîⁿ-pîⁿ m̄-tio̍h, chia ū chi̍t-ê gín-á. Lāu-pē put-chí thiàⁿ-i, chi̍t-ji̍t hoān-tio̍h toā ê kè-sit, lāu-pē chiū beh chek-pī i, nā-sī sim-lāi chin kan-khó͘ ba̍k-sái ti̍t-ti̍t lâu. I ê kiáⁿ khoàⁿ-kìⁿ. Toā-toā siū kám-kek, chiū kiò kóng. Lāu-pē ah. Tio̍h chek-pī goá, m̄-thang háu nā-sī ū chi̍t-khoán ê pē-bú. Liah-choè hoān-tio̍h koè-sit, tek-khak tio̍h siū tāng-tāng ê chek-pī, che sī kà-kiáⁿ tē-it bô hoat-tō͘, sī-lâng kóng, gín-á nā koh chi̍t-pái bô koé-pìⁿ, chiū tio̍h chek-pī i, iā sī nā bô chek-pī i boē-ēng-tit ê, nā-sī koán-lí gín-á ê hong-hoat, khah toā-hàn ê-sî, tio̍h ēng hó-oē kek i hoat-chhut liông-sim. Hō͘-i ka-kī chai hoán-hoé, m̄-thang chhìn-chhái chek-pī i, tio̍h hō͘ i hián-chhut láu-si̍t ê-sim, sī tē-it iàu-kín, án-ni chiah boē koh-chài hoān-tio̍h kè-sit, só͘-í hoān-nā hō͘ gín-á ka-kī chek-pī tī sim-lāi ê, sī pí ēng tāng ê hêng-hoa̍t koh khah hó. Gín-á nā hoán-hoé liáu-āu, chiū tio̍h iû-goân chiàu í-chêng lâi hó khoán-thāi i. Sim-koaⁿ-lāi m̄-thang khǹg chi̍t sī-á ê oàn-hūn tī-teh. Hoān-nā kiáⁿ-jî jīn-choē ê-sî, tē-it hó ê ki-hoē, kín-ēng hó-oē kéng-kài i, hō͘-i éng-éng kì-tit sim-lāi, ta̍k-ji̍t chìn-chêng kiâⁿ tī só͘ eng-kai kiâⁿ ê-lō͘. Phì-ū choè-sit-lâng khai-khún. Tio̍h tāi-seng ku̍t-sang pē-sang, āu-lâi chiah iā hó ê chéng-chí lo̍h-khì, lō͘-bé tio̍h chia̍p-chia̍p thoáⁿ chháu, chiah-thang ǹg-bāng siu-sêng.
