首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 聖地訪問記(7)
聖地訪問記(7)
卷期：第874期 本次： 日期：1961/10 刊名：台灣教會公報 頁數：20
篇名：聖地訪問記(7) [ Sèng-tē hóng-mn̄g-kì (7) ]
作者：劉華義 Lâu Hoâ-gī
  顯示 : 漢羅 全羅 並列  

聖地訪問記(7)

劉華義

（接9月號第22面）

7)耶路撒冷的街市

1961年10月874期         頁20-23

 

　　聖地的頭一暗，佇感謝佮感激來平安經過。目睭一下金，心、新感覺有充滿的氣力通應付今仔日的訪問日程。雖罔佇chā日已經有訪問過橄欖山、汲倫溪，客西馬尼園佮伯利恆城，若是阮的心情若親像食袂飽的腹肚一樣，欣慕愛閣看較濟所在。拄拄親像當teh生長的青年人食毋知飽的食慾一般。章輝牧師因為伊所受交代的事務的緣故，下晡著搭3點的飛機欲去黎巴嫩開會。伊是受託做北美長老教會宣道研究會的主席。這个會是對15人來組織，大部份是對宣道區所選出的本地人，對世界各地區來teh檢討佮研究過去宣導事業的得失，閣佇現今急變中的事情會通確立將來的宣道方針。為著按呢，伊已經有去非洲諸國家視察教會，taⁿ欲去中東佮遠東的諸國家（黎巴嫩、伊朗、巴基斯坦、印度、泰國、馬來亞、菲律賓、香港、高麗佮日本）研究各宣道區教會的實情。所以伊只有偆早起的時間通佮我佇耶路撒冷。阮就決定早起欲入去予城牆圍teh的耶路撒冷城內。昨日的案內的青年人照約束的時間有來，阮用行的對Y.M.C.A.出發，對阮所住的客館到城牆只有是5分鐘若定。欲入城，佇阮的心有講袂出的興奮佮期待。

　　這个城內是主佇世間的時伊活動的中心地，伊捌佇遮敬拜上帝，教示百姓，亦受審判，甚至受釘死。為著主捌佇遮生活過，世間人將「聖」來稱這个城表明尊敬伊。我的心內摻插著講袂出的感情欲踏入聖城。阮對北爿的大馬色門欲入城內。這个城門拄拄親像咱台灣的古城門一樣，是圓拱--的，總是城牆真懸，約有6丈，亦真闊。城門口是空地，是做Taxi的停車場，有濟濟各國做新式的汽車teh等人客叫。這个城門是近佇國界，所以日若落山就關起來，毋准人出入。若暗時欲入城，著對希律的城門，離大馬色城門有500公尺的東爿。入城門就看見阨阨的街路，也兩爿是店頭，兩爿的店頭前也有生理人排in的攤仔佇路邊。Kan-ta城門孔的兩爿也會通算出幾若擔，有的teh賣土豆仁，有的teh賣果子、冷水、雜誌，以及日用雜貨。街路因為往來的人濟，閣驢仔也欲行，所以不止揳，顯出鬧熱的氣象。街路的闊約丈外，若是高高低低，坎坷無平，街路有濟濟簷仔。我ná行斟酌來看聖城的容貌。店頭毋是真大間，約丈外闊，亦店內真暗。因為街路狹，厝起相倚，亦濟濟厝是起佇街路頂，只有做鏨做鏨留空做採光的路用，致到光線射袂入到店內，若毋是用電火來照光，家內是ná親像佇黃昏的款。佇麵包店看店2款的麵包。一款差不多手骨的大，約有2尺長，閣一款圓的，親像咱的外媽龜遐大。我teh想主耶穌所講「恁中間有啥物人，伊的囝共伊討餅，敢欲用石頭予伊？」（馬太7:9）穩當餅的形是親像石頭，所以主才會將餅佮石頭來相對。佇幾若間的麵包店以及佇路邊teh叫賣的麵包擔仔，我都無看著別形的麵包，所以主teh講穩當是指這號圓的麵包。早時猶太人的婦人人逐日著磨in家庭一日所欠用的麵粉來做麵包，這是婦人人逐日的重要工作的一項。Taⁿ今仔日有專門的麵包店teh供給新鮮的麵包，所以毋免閣挨磨lah。設使麵包若是遐大个（毋知耶穌時代有較細á無？），我就聯想到耶穌變餅飼5千的神跡，是對一个囡仔獻5个大麥餅佮兩尾魚（約翰6:9）。關係這囡仔的餅，捌聽見有人teh假說講是囡仔的便當。伊有獻伊所欲食的便當予主。設使餅若是遐大个，穩當毋是囡仔的便當，因為若予我食，我一个都食袂了，汰討囡仔會食5个！所以也會通講是teh賣餅的囡仔也拘敢，設使若是賣餅--的，汰討也有魚？......這个毋是要緊的事，是因為我觸景來聯想遮的代誌。不論是囡仔的便當á是伊的貨物，攏無要緊。因為5个餅確實是囡仔的所有，最要緊的就是伊有歡喜甘心攏總獻做主的路用。

　　餅店有濟濟款的餅、糖仔，連英、美製的チヨコレート、ココア、咖啡等的上級品滿店面。冊店有真濟款的書籍佮雜誌，印刷術亦不止高明。鞋店有排最新型佇歐美拄拄teh流行--的，閣價數比較tek便宜。果子店有十花五色逐款的果子，毋免講有無花果、橄欖、粟子、黑桃、石榴、棗樹子、柑仔蜜佮葡萄，閣亦有柑仔、芎蕉、蘋果、梨仔，連那菝都有。我兩冬久無鼻著那菝特殊的味，予我生出思鄉的心，實在無拍算看著聖地也有出產那菝，也驚著，也ナツカシイ。阮的朋友Mr. Kirk來遮頭擺食著那菝，佇到3日久腹肚毋好。論葡萄，我的期待是欲看著彼號佇細漢的時所看著的尪仔圖所畫彼款大葩閣大粒--的。照民數記13章，摩西佇加低斯差12人去偷看迦南地。In轉來的時佇以實各的山谷，對遐剉葡萄樹一支，頂面有一葩葡萄，兩人用棍仔扛伊（13:23, 24）。畫圖的人照這節的記事畫兩个人扛這葩葡萄。彼的印象佇我猶真深。若是所看佇店頭的葡萄攏是細細葩，比佇美國á是羅馬所出產的較細葩閣細粒。總是滋味佇我捌食過的葡萄中做最甜--的。穩當佇乾燥的地硬激起來較無水分，致到甜分充足。我佮章輝牧師teh談論，汰討現時的土地袂通生產親像早日彼款大閣媠的葡萄？因為會生彼號一葩予兩个大人扛的葡萄，土地一定是真肥。阮兩人的意見是講：人得罪上帝，致到土地也受咒詛，閣土地佇年久的中間予對阿拉伯沙漠吹來的沙蓋密，變做sán去？！這是阮的推想，是因為對看著葡萄所聯想出來的疑問。佇菜架仔有白菜、蒜仔、韮菜、蔥仔，以及花菜佮高麗菜。佇五穀店有米、麥、蕃麥佮幾若款的豆類。有豬肉砧、牛肉砧、羊肉砧，閣也有魚架仔。佇洋品雜貨店有真濟外國貨，自然有in家己本地產的物件。有真濟店teh賣土產，吸引訪問者的跤，有阿拉伯的刺繡、皮的製品，以及銀、銅、柴，等做的細細的記念品。閣亦有蔭食店，賣鹹酸甜--的、布店、洋服店、棉被店、金銀店......街內遮的店頭攏予我著驚，因為佇這號乾竭的地thái有遮爾濟閣豐富的物資？差不多應有盡有。有的堂堂開店，裝飾佮裝置無輸別個大都市，有的是簡單的路邊攤仔。有做墨的店、賣磁器的店、剃頭店、電髮的店、換錢的店、時鐘店、翕相館、茶館......，若親像入佇舊的鹿港街仔一樣。生理方面照看不止活潑，街內會通看出充滿的活氣。叫客的聲、出價的聲、人的聲，驢仔的聲，囡仔的聲，以及擴聲機放出的歌聲，真喧嘩閣鬧熱。（待續）
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461