Sìn chiū tit-tio̍h
Kuí-nā ge̍h ji̍t bô lo̍h-hō͘, khó-oāⁿ, choh-sit lâng bô siu-sêng; bô siu-sêng, chiū bô chîⁿ thang boé mi̍h; bô thang boé mi̍h; tiàm-thâu chiū bô chîⁿ thàn. Tiàm-thâu bô seng-lí, koah-tiàm ti̍t-ti̍t beh tó. Hit sî hoē-siā-tiúⁿ thó͘-khuì, iô-thâu, hoân-ló kàu-ke̍k, m̄-kú bô hoat-tō͘. Só͘-í ū ê chîⁿ it-chīn khêng-oá iáu khiàm saⁿ-cha̍p bān-gûn; taⁿ beh cháiⁿ-iūⁿ.
Siā-tiúⁿ ê miâ hō choè oán-lī. I tī Oh-sū-tē-lī-a choē-choē nî teh choè toā seng-lí. Taⁿ kiông-kiông beh phò-sán.
Teh chē ê sî tú-tio̍h chi̍t-uī ê pêng-iú lâi thàm i. Pêng-iú khoàⁿ i ê bīn iu-iu chiū kóng. Lí teh hoân-ló siáⁿ-sū? Siā-tiúⁿ in kóng, Goá teh hoân-ló chîⁿ. Chit pang seng-lí pháiⁿ choè, goá khiàm saⁿ-cha̍p bān. Hāi-ah! Chin chhám! Pêng-iú kóng, Lí tek-khak m̄-thang hoân-ló, lán sī sìn Siōng-tè ê lâng tek-khak m̄-thang kè-thâu khoà-jū. Lí sī sìn-chiá, goá sī thoân-tō, lán tio̍h chiong bān-sū kau-thok Chú. Thoân-tō-su tuì lak-tē-á the̍h chi̍t pún Sèng-keng chiū tha̍k hō͘ i thiaⁿ. āu-lâi kóng, Lán lâi saⁿ-kap kî-tó. Thoân-tō kiû Siōng-tè tio̍h pang-chān seng-lí lâng ê khiàm-kheh. Kî-tó soah thoân-tō kap i saⁿ-sî, chiū tò-khì. Seng-lí lâng chhut khì goā-bīn kiâⁿ-iû. Tī lō͘-ni̍h tú-tio̍h chi̍t ê pêng-iú. Pêng-iú cháu oá lâi kóng, Goá ài pài-thok lí chi̍t chân sū, m̄-chai lí hoaⁿ-hí pang-chān bô? Seng-lí lâng kóng, Ū sím-mi̍h tāi-chì? ìn kóng, Kūn-lâi goá chhun chîⁿ, taⁿ m̄-chai tio̍h cháiⁿ-iūⁿ siat-hoat khah hó, kià gûn-hâng bô lī-sek, m̄-chai lí hoaⁿ-hí thoè goá siat-hoat bô? Nā hoaⁿ-hí chhiáⁿ lí the̍h kuí-cha̍p bān khì choè seng-lí, chhut-chāi lí sím-mi̍h sî chiah hêng bô iàu-kín. Seng-lí lâng kóng, Hó, lí ū saⁿ-cha̍p bān piān-piān, chhiáⁿ lí chhìn-chhái sî lâi the̍h. Seng-lí lâng hoaⁿ-hí tò-khì, sim-lāi kám-siā Siōng-tè in-uī ū thiaⁿ-kìⁿ i ê só͘ kiû. Tuì hit sî liáu-āu it-hoat jia̍t-sim kèng-uì Siōng-tè.
