耶路撒冷地動
這pang佇耶路撒冷有拄著大地動，地方的百姓不止淒慘，死失的人有600外的，著傷的有3000外。地動彼時通猶太國攏搖choah。耶路撒冷的百姓著驚攏走出城外。走袂lī的人真濟予厝teh死。散鄉人毋甘放拺in 的物，欲閣去厝裡the̍h物，濟濟為著按呢來失落in的性命。厝也倒壞真濟。第一傷重就是猶太人的大學，總督的宿舍佮回回教的大宮殿，號做，Mosque of Omar。這間殿就是起佇在早Só-lô-bûn所起彼間殿的所在，所以通講是耶路撒冷出名的古蹟。欲閣修理這間殿，大約著閣開出一百萬銀。
近佇耶路撒冷猶有濟濟所在拄著大損壞。佇Iok-phàⁿ佮Ka-ná山的鄉庄厝也倒壞不止濟。近倚約旦河地大振動。佇河kiⁿ幾若所在有崩，大石對山裡lìn落來塞密溪，水消袂lī，有所在im真懸。
佇約旦河的東爿就是Mô͘-ap。這所在舊約聖經常常捌講起。Mó͘-ap佮死海的附近地非常重，致到有幾若所在地裂去，也對土底有出燒水佮琉磺。
耶利哥城猶原有拄著。有三个出外人，tiàm佇一間大間旅館，厝倒，三人攏teh死。 |
