首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 聖地訪問記(10)
聖地訪問記(10)
卷期：第877期 本次： 日期：1962/1 刊名：台灣教會公報 頁數：11
篇名：聖地訪問記(10) [ Sèng-tē hóng-mn̄g-kì (10) ]
作者：劉華義 Lâu Hoâ-gī
  顯示 : 漢羅 全羅 並列  

聖地訪問記(10)

(接12月號第20面)

劉華義

1962/1/1  877  11-14

 

9)彼拉多的官廷

案內的人chhoā阮到一間女修道院 (Sisters of Zion) 的門口，這帶就是當時做羅馬總督的官廷佮羅馬駐軍的營地。 拄拄是佇聖殿的北爿隔一條阨阨的街路，佔相當闊的地坪。現時佇這phiàn的所在有留幾若的歷史的通記念的古蹟，就是：

1.An-to-nî-a塔。

這个塔是羅馬兵的營房的監視樓，是希律王起--的，也用羅馬皇帝（M仔-kh仔-su An-to-nî-a）的名來叫這个塔。現時的塔自然毋是當時的建築物，是佇在來的位閣重起--的。照所研究講：彼拉多的官廷佔100公尺長，50公尺闊的四角形的地。也佇四个角頭有四个塔，逐个約30公尺懸。（現時會通看出兩个nā-tiāⁿ）。照羅馬的行政官的觀察，猶太人若會做亂謀反一定是對in宗教的中心的耶路撒冷的聖殿來發生。因為至少一年有三个大節，káng十萬的猶太人對四散徛起的逐地方轉來遮守節，閣聖殿有遮的民族的指導者佇遮，快快利用佇這號節期造出反抗政府的行為。這號事情的發生是出佇人所意料會著的。為著按呢就佇聖殿的西北爿角有起一座懸的塔，24點鐘派兵丁對塔頂看落來，監視聖殿佮彼內面的人的動靜，用按呢來預防萬一。保羅捌予這个塔的監視兵救伊出猶太人的毒手。請看行傳21：17-23：11。對聖殿的外埕有崎仔通出入佇羅馬兵的營房。

2.彼拉多的公堂

a.總督府衙的出入門。有一位女修道士，共阮開門閣chhoā阮落去十外chàn的崎仔下，佇遮報阮看2个圓拱門。現時in有將這2个圓拱門做中心設備做禮拜廳。伊講這2个圓拱門是彼拉多的官廷的出入門。照咱所知主後70年猶太人反叛羅馬，皇帝就差大將提多來討伐。伊攻破耶路撒冷城，放火燒聖殿，毀滅這个街市。照歷史的記載講猶太人死110萬人，閣另外19萬人受掠去做奴才。所以若欲踏著耶穌當時所踏的地，著對現在的地面掘落去一丈半至兩丈深的所在，所以這个修道士報阮看的圓拱門不止會通相信得，是主耶穌的時代的。

b.兵丁的詰所佮公堂。

伊閣chhoā阮入較內面爿。阮攏是行佇土底，到一phiàn闊的所在，佇遐有用濟濟支石大墩仔柱來接載土面的建築物。照伊講這phiàn是彼拉多的公堂。聖經講：這个所在叫「舖石的所在。」希伯來的話叫Lek-pa-tāi(約翰 19：13)。佇遮伊有報阮看3項。

(1)石頂的棋盤。佇土跤有用幾若領的帆布蓋teh，案內的人掀起來予阮看。佇舖石的土跤會通看著遮的石有刻sûn親像棋盤，(毋是咱的款的棋盤。)伊講，遮是兵丁的詰所也是公堂。兵丁佇遮休息，仔是等候值班的的無聊的時，相佮佇遮的石頂行棋。拄拄親像台灣人真隨便佇土跤畫sûn行直一般。咱毋知in的棋的thit-thô法是啥物款，總是佔嶄然大phiàn。照先生的研究是講這个遊戲是彼號親像日本人的双六（スゴロク）。遊戲的人搖粒仔，另外予別人做jí仔來行仔是uī遮的所刻的石頂的位置照所搖出來的jí仔來進退，這款的遊戲叫做「行王。」兵丁較常掠in所看守的犯人來當做jí仔，做thit-thô。咱的主予兵丁共伊戴刺仔冕旒，攑蘆竹仔，moa紫色的袍，

是因為猶太人告伊講搧動百姓自稱做王。

所以真可能主耶穌有予in掠來當做jí仔佇遮來參加in行王的遊戲踏佇遮的刻sûn的石甓頂。

(2)公座前的石。修道士特別將所舖teh的一塊真大的石報阮看講佇這塊石頂咱的主徛teh受彼拉多的審判。遮的石現時真細膩teh保存。

(3)舖石的街路。案內的人閣報阮看羅馬時代的舖石的路。遮的路攏是用大塊石舖--的，長約有5尺，闊有2尺外，毋知偌厚，因為佇土底，無法通知。總是知影真厚，因為羅馬的戰車亦走佇彼頂面。閣遮的石面攏有刻sûn滿滿，聽講是欲預防驚了馬會滑倒。不過感覺遮的路石真粗勇。

佇這間修道院，我會通看著遮的當時的古蹟，心想到佇2000年佇遮所發生的人類的大悲劇。

無伴孤獨，身無帶半塊寸鐵的主，雙手受縛徛佇優柔不斷的總督彼拉多的面前。伊靠伊的國家的權柄，輕視徛佇伊面前的殖民地的草地拉比。伊雖然查出咱的主無罪通辦，也3擺出來聲明，猶過伊無夠額勇敢通恭行伊的正義。伊驚百姓的聲，佇公座前用洗手來閃避伊的責任，將無罪的主交予in害死，伊雖罔洗手表明伊對這个義人的血無干涉，猶過伊的沐血的手永遠洗袂清氣。「佇本丟彼拉多任內受苦，釘佇十字架......」當地球上攏總的基督徒齊聲念信經到這句的時，逐擺提起伊的名記得伊的無公道。伊的名成做一个做卑怯的代名詞受永遠的恥笑。

 遮的百姓的領袖------祭司頭，法利賽，經學士，撒都該，希律黨------就是遮的宗教家佮文人，為著怨妒(馬太 27：18)，相佮kiat託起來用百般的計謀來害死in所期望的彌賽亞。約翰講：「伊到家己的所在，也家己的人毋接納伊」（約翰 1：11）。遮的人教唆百姓大聲喝講：「釘伊十字架，」也齊聲講：「伊的血歸佇阮佮阮的囝孫」（馬太 27：23-25）。遮的無知的百姓好大膽進前欲來擔當遮大的責任！

羅馬兵丁是狐狸藉虎威來凌辱咱的主。In掠咱的主當做thit-thô的對象來滿足in的虛榮心。用刺仔編做冕旒共伊戴，掩目睭，共伊cheng，siàn伊的喙phé，共伊phuì喙瀾，閣用蘆竹仔共伊sut......用百般的戲弄佮侮辱對這个無抵抗的羊羔展in的威武，用按呢來自衛in的小人氣慨的作孽（馬太 27：27-31; 馬可 17：16-20; 約翰 19：1-8）。

 遮的事情佇2000年前佇這所在所發生的，講袂出複雜的感情佇心內，佇這个所在行來行去來想遮的事。佇目前ná親像遮的事的影teh走，佇耳空邊ná親像有聽著遐的喧嚷的聲音。我的心祈禱講：「主ah！願我無拒絕你，無毋ti̍h你，因為我需要你。」

3.犯人的拘留所

對這間女修道院出來了後，案內的人chhoā阮到隔壁的一間建築物，這間建築物是屬希利尼正教。拍門的時有一位神父出來，親切chhoā阮入去參觀。伊講這个建築物原來是做羅馬總督teh關犯人的監獄。In佇遮有設備禮拜廳。伊chhoā阮落石gím仔幾若十chàn，到佇這个石洞空，佇遐有一塊石約3尺長，2尺闊，5寸厚，離地面約有3尺懸，石有挖2空，直徑約8寸。伊講遮是咱的主受關的所在。伊講：主予遮的祭司頭，有司解送交予彼拉多的時，彼拉多有共伊拘留佇遮　主的2支跤伸對遮的2空過，規身人坐佇石頂，2支跤墮佇地面，佇地面有2的鐵圈佮鍊仔，通鍊主的2支跤，閣佇石洞頂也有2的鐵圈佮有鍊仔墮落來，主的雙手向頂面伸直予鍊仔共伊縛牢leh。有通坐，比較較快活，總是雙手伸直攑懸穩當真艱苦。我聽伊說明這个事，我的心內有僥疑彼个史蹟的真實性，因為若照福音傳的記事，當日彼拉多接著耶穌的時，就開始辨理，毋知有需要，á是有時間通共伊拘留á無？

親像這號用傳說的耶穌的史蹟佇耶路撒冷真濟，照我想遮是彼其中的一所在，毋過in真相信這个做事實。 案內的神父閣chhoā阮去別个洞，無點火，真烏暗，講這所在是巴拉巴受監禁的監獄。因為無有火，毋知內面生做啥物款。伊又閣chhoā阮到佇別个洞，這个洞比較較闊廣：是普通犯人的拘留所，順洞空的壁有石條，犯人通坐規排，也雙跤用鐵鍊鍊佇地面。若較重罪的犯人無予伊坐，是著徛teh，跤著鍊牢leh，手也伸直予墮落來的鐵鍊縛吊teh。這間約略會通關20左右的犯人。看這間拘留所，較明白羅馬人怎樣teh款待犯人的情形，通講真嚴密，oh得通逃走。

4。耶穌受侮辱佮受十字架的禮拜堂

阮對土底出來，就閣到佇隔壁一間建築物，佇這間厝的內埕有2棟細細間的禮拜堂，一棟是叫做耶穌受侮辱的禮拜堂，就是講咱的主佇遮受兵丁侮辱，戲弄　佇頭拄仔入去女修道院的地下室的時，共阮講遐是彼拉多的公堂，主佇遮受侮辱，taⁿ佇這間女修道院隔壁的地上的這間也講是主受侮辱的所在，這予巡禮者真oh得通決定欲採信tó位一个。總是這間佇地面的禮拜堂也真濟人相信是正確無錯誤。阮有入去禮拜堂參觀，佇內面有畫主戴刺仔冕旒，moa紫色的袍，手受縛，插一支蘆竹仔，頭殼teh流血的大幅圖。這張圖就是teh畫出彼拉多拖伊出來佇百姓的面前，共in講：「你看這个人」（約翰 19：5）。

 佮這間禮拜堂相對，離約20公尺的所在閣有一間禮拜堂，這間叫做耶穌受十字架的禮拜堂，這間叫做耶穌受十字架的禮拜堂（上中央彼間）。就是相信咱的主受彼拉多判罪了，佇遮將十字架予伊夯。佇禮拜堂的內面也有畫主夯十字架的濟濟幅的圖。咱的主對遮出來就向各各他的路來行。這條路約有700公尺的遠，各各他是向西來行過市街到城門外的墓埔。 (待續)

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461