Siā-lūn
SIN CHIÚ SIN PHOÊ LÔNG
Lō͘-ka 5:38
Ông Lâm-kia̍t
1962/1/15 878 kî 2-3
Iâ-so͘ kau-poê pīⁿ-lang, chhiong-ki, í-kip sè-kan khó-lîn ê lâng. I kap thiu-hiòng ê chē toh......Tuì án-ni Hoat-li-sài lâng, keng-ha̍k-sū chek-pī I. Iâ-so͘ kóng ,"Sin chiú tio̍h ji̍p tī sin ê phoê-lông," oāⁿ chi̍t kù oē kóng,chit kù "sin chiú sin phoê-lông" sī tuì lâng bē-thang lí-kái Iâ-so͘, phoe-phêng Iâ-so͘ só͘ ín-khí ê oē.
Iâ-so͘ tī choē-choē phì-jū á-sī tâm-lūn ê tiong-kan, lóng bat piáu-sī, lâng nā bêng-pe̍k lu̍t-hoat kap sian-ti, tek-khak beh khoàⁿ-chhut I si̍t-chāi sī in ê èng-giām, chhin-chhiūⁿ I kóng:"Lín nā sìn Mô͘-se, ia̍h beh sìn Goá , in-uī i só͘ siá ê ū lūn goá. Lín nā m̄ sìn i ê chheh, thài-ē sìn Goá ê oē ah?"（Iok-hān 5:46, 47）.án-ni I ê ì-sù : Í-sek-lia̍t lâng nā chīn-tiong tī Lu̍t-hoat kap sian-ti, chiū tek-khak beh chiap-la̍p Goá. Chóng-sī in m̄-nā bô lí-kái , chiap-la̍p, hoán-tńg pek-hāi I, sī in-uī in ê kiàn-kái thoat-chiat. In tuì-tiōng lâng ê thoân-thóng, kái-soeh, khoàⁿ choè sī choa̍t-tuì ê chin-lí. Kî-si̍t, sui-jiân bô oân-choân ê Kū-iok, iáu-kú ū ǹg tī Siōng-tè oân-choân ê khé-sī Iâ-so͘ Ki-tok. Chóng-sī in-uī in ê sim-lāi sit-lo̍h oa̍h-miā, tuì Mô͘-se kap sian-ti ê kà-sī chí-ū khoàⁿ tio̍h phoê-bīn, sit-khì tiong-sim ê ì-gī. Tì-kàu tī chin-si̍t ê Ki-tok lâi ê sî, in m̄-nā bô chiap-la̍p I, hoán-tńg lia̍h I choè thang chiù-chó͘ ê. Só͘-í thang kóng iā chhin-chhiūⁿ tuì Mô͘-se kap sian-ti chīn-tiong, kî-si̍t sī put-tiong.
"Sin chiú tio̍h ji̍p tī sin phoê-lông,"ì-sù sī eng-kai tio̍h thǹg-khí kū-khak, tit-tio̍h sin ê oa̍h-miā. Tī chia kóng ê sin, m̄-sī chí le̍k-sú-tek chiân-âu ê sin,iā m̄-sī bûn-jī siōng ê sin,sī chit-tek ê ki-pún choán-piàn.
20 sè-kí,lán chéng-kò ê kàu-hoē ū toā kak-chhéⁿ, Ki-tok sī Chú, koh sī chi̍t ê. Tâi-oân kàu-hoē iā ū ì-sek chit ê tāi-chì, chham-ka Phó͘-sè Ki-tok-kàu liân-bêng, m̄-kú chit-khoán ê chū-kak tuì lóng-chóng ê kàu-hoē, í-ki̍p sìn-tô͘ m̄-chai ū hoat-seng sím-mi̍h chok-iōng? Lán ê kàu-hoē kiám ū chin-chiàⁿ chū-kak lán lóng pêⁿ-pêⁿ sī sio̍k tī Ki-tok ê thé? Kiám ū chiàu Sèng-keng só͘ kóng,"nā chi̍t thé siū-khó͘, pah-thé tâng siū-khó͘, chi̍t thé siū êng-kng, pah-thé tâng khoài-lo̍k"（I Ko 12:26）chit-khoán ê cheng-sîn? Choē-choē ê kàu-hoē chhut-la̍t teh khí sin ê pài-tn̂g. In ló͘-le̍k ài khí khah suí,khah ióng,khah toā keng,koh uī-tio̍h só͘ sio̍k ê kàu-hoē ài tit-tio̍h chi̍t-uī khah hó, khah ū châi-lêng ê bo̍k-su. Chóng-sī m̄-chai ū siūⁿ-tio̍h hiah ê jio̍k-siáu ê－tī chhân-chng, tī hái-kháu, tī soan-nih, khó-lîn ê kàu-hoē á bô? Ū-ê kàu-hoē pài-tn̂g khí chi̍t-poàⁿ chiū hêⁿ(sic.，《台日》注hê，無鼻音)-teh, bô thang koh kè-sio̍k......lán bat siūⁿ-tio̍h in á-m̄-bat ?
19 sè-kí ê soan-kàu ūn-tōng, lán ê kàu-hoē ū tit-tio̍h Eng-kok, Ka-ná-tāi bó-hoē chin hó ê éng-hióng, hō͘ lán ū chin hó ê ki-chhó͘, m̄-kú lán ū-sî bat hut-lio̍k sî-tāi ê piàn-chhian, ài kò͘-kip(sic.；及應該是ki̍p) tī tong-sî ê siūⁿ-hoat, hong-sek. Koh-khah iàu-kín, hiah-ê chhui-pek in lâi kàu lán.Tâi-oân hit khoán ê tōng-ki, oa̍h-miā, khuì-ia̍t, thoân-tō ê jia̍t-chêng kap in ê cheng-sin, lán m̄-chai ū tit-tio8 á bô ? Lán nā khoàⁿ lán ê bó-hoē tī Au Bí kàu-hoē ê tiong-kan só͘ chiàm ê tē-uī, thang chai ū oa̍h-miā ê só͘-chāi, put-sî ū sin ê lí-kái kap hoat-kiàn."Sin chiú ji̍p tī sin phoê-lông."
Koh tuì Ki-tok-tô͘ seng-oa̍h lâi khoàⁿ, lán choē-choē lâng ê chông-pâi tuì-siōng ū kái-piàn, chóng-sī chông-pài ê cheng-sîn kap thài-tō͘ bô pian-oāⁿ. Tuì Siōng-tè ê kî-tó, tuì kàu-hoē ê thài-tō͘ chhin-chhiūⁿ Iú-èng-kong chông-pài,eng-kai tio̍h "Iú-kiû pit-èng," nā bô, bô ta̍t-tio̍h in chhin-kūn ê bo̍k-tek. Sin chiú iáu ji̍p tī kū phoê-lông.
Tuì tī kàu-hoē kap tī siā-hoē ê seng-oa̍h, iā ū choē-choē Ki-tok-tô͘ chhú jī-goân-lūn ê thài-tō͘.Goá hù chi̍p-hoē ê sî sī Ki-tok-tô͘, tī kang-chok ê tiûⁿ-só͘ goá sī lēng-goā chi̍t-ê sin-hūn. Lan ê chit-gia̍p koan bô khak-li̍p, tì-kàu choē-choē lâng m̄-chai iā m̄-bat siūⁿ, beh cháiⁿ-iūⁿ thong-koè in ê kang-chok, tī in ê chit-tiûⁿ ho̍k-sāi Chú?
Lán bē kì-tit Pó-lô ê bián-lē ; "Só͘-í lín he̍k-sī chia̍h, he̍k-sī lim, bô lūn choè sím-mi̍h,lóng tio̍h uī-tio̍h êng-kng Siōng-tè lâi choè"（I Ko 10:31）. Taⁿ tī chia kóng, tī chit-tiûⁿ ho̍k-sāi Chú, ì-sù m̄-sī lâng thang tuì i ê kang-chok, thau-kang, kiám-liāu, chí-ū teh liām kóng,"Iâ-so͘ Ki-tok......" Lâng tio̍h thong-koè i ê seng-oa̍h, i ê kang-chok hō͘ lâng hoat-kiàn tio̍h "i sī Siōng-tè sèng ê lô͘-po̍k" (2 Ông 4:9).Iâ-so͘ kóng："Kìⁿ-nā chheng-ho͘ goá kóng, Chú ah ê,bô it-chīn ji̍p thian-kok, to̍k-to̍k kiâⁿ goá tī thiⁿ-nih ê Pē ê chí-ì ê, chiah ē" (Má-thài 7:21).
Taⁿ,sui-jiân sī án-ni,lán ê kàu-hoē tī koè-khì kuí nî kú ê tiong-kan ū choè chin-choē iàu-kín ê sū-gia̍p. T.K.C. ê chó͘-chit, Ki-tok-kàu kàu-io̍k ê ka-kiông, tuì soaⁿ-tē ê thoân-tō, kàu-hoē poē-ka ūn-tōng......téng-téng. Tī kin-á-ji̍t á-sī kim-āu iáu ū choē-choē sin ê sū-gia̍p kap lí-sióng, chhin-chhiūn Má-lâi-a ê soan-kàu, tuì Tāi-choan ha̍k-seng ê kang-chok, kang-gia̍p á-sī kî-thaⁿ ê chit-he̍k thoân-tō, i-liâu thoân-tō ê kang-chok. Chiah ê lóng sī sin phoê-lông teh théng-hāu lán khì té moá.
"Sin chiú kū phoê-lông,"kiám-chhái iā thang kóng sī tuì boē chai ê sū-hâng, bô mō͘-hiám ê sim. Sin-iok Sèng-keng ēng chi̍t kù oē teh o-ló A-pek-la̍h-hán ê sìn-gióng,"I siū tiàu ê sî,chiū sūn bēng-lēng chhut-khì......m̄-chai beh khì tá-lo̍h" (Hi-pek-lâi 11:8), Lán siông-siông teh choè koàn-sì ê sū,tuì boē choè, bô koàn-sì ê sū, lán m̄-káⁿ choè, m̄-káⁿ mō͘-hiám ;iā lán siūⁿ án-nī an hūn siú-kí. M̄-kú tuì eng-kai choè ê, lán m̄-káⁿ khì chhì khoàⁿ, che sī choè toā ê put-sìn. Iâ-so͘ kóng kò͘-chip kū phoê-lông ê, kàu boé chí-ū piak-li̍h. Ta̍k hāng sū kàu tī ke̍k-pō͘, nā bô koh sin ê khó-àn, i tek-khak oē kiâⁿ soe-thè ê lō͘. Jīm-hô lâng só͘ choè ê sū,bô-lūn i ê khó-àn, chú-gī,kè-e̍k, lóng tio̍h ji̍t-ji̍t sin.Hit ê cheng-sîn m̄-thang bô--khì,oa̍h-miā m̄-thang sit-lo̍h ,chóng-sī hêng-sek,hong-hoat tio̍h ài ji̍t-ji̍t chìn-pō͘.Sin chiú tio̍h ji̍p tī sin phoê-lông.
Lán ê kàu-hoē ū í-sek tio̍h tuì koè-khì ê kang-chok í-keng hoat-hui kàu tī ke̍k-tiám, tio̍h ū sin ê hong-hoat lâi chhut-hiān ê su-iàu.Só͘-í tī chit ê koè-tō͘-kî tio̍h keng-koè seng-sán ê kan-khó͘.Lán m̄-chai ū kam-goān lâi poē chit ê kan-khó͘ á bô?Nā ū,tī Iâ-so͘ Ki-tok lâi hián-hiān ê Siōng-tè, tek-khak beh ín-chhoā lán ê lō͘.
