首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 進步á是退步?
進步á是退步?
卷期：第879期 本次： 日期：1962/2 刊名：台灣教會公報 頁數：11
篇名：進步á是退步? [ Chìn-pō͘ Á-sī Thè-pō͘? ]
作者：
  顯示 : 漢羅 全羅 並列  

進步á是退步?

1962.2.1   879期  11-14

咱所蹛的世界逐日teh進步，這是事實，總是毋通袂記得逐日也teh退步。有自然科學的進步，X光線的發見以及天然學各方面的大進步。交通機關也有大進步------馬車換做火車，火車進到電車，電車變做飛機，飛機進步到噴射機，火箭，人造衛星，太空船......等，確實有空前未曾有的大進步。點燈的方法也有大進步------石油換做瓦斯，瓦斯進到電氣，直到今仔日無論都市，鄉村，無電燈的所在真少。其他，親像食品方面的進步，衣類的進步，化妝品的進步，家屋建築的進步......通講20世紀的今仔日，人的生活佇各方面實在有大進步，所以有人講人類若照按呢一直進步，有一日這世間欲成做完全的樂園，啥物人無意愛這个樂園？總是千萬毋通予這个樂觀受迷，袂記得人類大退步的事實。彼个是啥物？

(1)人格的退步。

  20世紀的今仔日咱袂當發見著一个堪得稱做偉人的人，遍行每一个國家，也袂當揣著一个親像古早遐的以賽亞，耶利米，保羅......等，信仰的偉人，á是路德馬丁，喀爾文，Nox，Joze-Fox，Livingston，Jonasan-Edward......等，信仰的偉人，勇士，連佇基督教國也袂當發見著。

現代人的信仰較濟攏是集合的，團體的的信仰，真少人揣機會家己個人的佮上帝親近接觸著伊的莊嚴佮神聖，反轉歡喜成群，結黨，成會，用多數的勢力想欲得著上帝的恩惠，通講是「個人的信仰」這方面人類有真大的退步。成群，成會，多數的勢力毋是毋好，總是毋通袂記得個人信仰的力也是真要緊。毋若信仰方面。

(2)政治方面。

佇這个時代我想已經無有一个親像英國女王Elizabes這款的政治家，á是北美合眾國建設當時的Wasington，Franclin，Hamilton，Jefason，等大政治家。有人講故Gradoston離開英國政治界了後，無閣再產生政治界的偉人佇這世間，檢彩會當按呢講。

咱知，對希臘Pericris以來到英國Gradoston的中間有出真濟偉大的政治家，in攏是詩人的政治家，就是實行（詩中的）理想佇國家的政治家。親像有這款精神的政治家，已經無存在佇現今的世界lah，實在真可惜。今仔日的政治家通講有淡薄生理的的要素佇teh。除了想國家的利益以外，大概真少有抱其他的理想。親像得著較濟的土地，把持較闊的商權，以外大概無有啥物慾望。In看輕做詩的人------做一篇散文，不如tak算盤。雅典的政治家Pericris受哲人Anaxagolas的影響，將理想實行佇國家的頂面。In若聽著這个事，的確會掠做真奇怪，好笑。

按呢全世界遐的政治的的人物，in的退步真顯著。

對遮予我想一項，就是咱的教會政治。咱毋知會干但表面上的做法，較欠缺深遠尊貴的理想á無？這點予每一个真實追求真理的信徒有真痛心的所在。佇遮筆者毋是teh批評，只有是互相勉勵nā-tiāⁿ。

(3)藝術的方面。

佇這方面早早已經達到彼个絕點，現在只有是teh退步nā-tiāⁿ。親像雕刻方面，無有一个現代人會贏過Mikel-Angeloo。也佇現時欲看到一張親像Lafael，Brant等天才的的圖畫，是真困難的事。

(4)音樂方面。

  閣較是按呢。現代人只有是teh練習古早人的樂譜nā-tiāⁿ。 Hydon，Bach，Mendelszon，Beathorben，遮的攏是音樂的最高峰，人想欲達到in，無人敢想欲超過in。音樂已經發出了最高，最美的音調lah。現在只有是在佇衰退的狀態。

(5)哲學方面。

哲學已經發表了最深，最高的學說lah，所以無一个人敢相信會閣出親像Kant，Hegal，Spinorza等哲人。檢彩Kant的哲學會復興，也會產生Kant哲學的批評學等，總是現代的世界佗一位的國家有自信來宣言講阮國家會產生Kant以上的哲學家？哲學界的第3等星，第4等星，等5等星，檢彩會出現，總是第1等星到底佇佗位？有人講"Spensa是世界最後的大哲學家，"伊死了後世間的大哲學家通講是佇絕種的狀態。親像主後1898年Gradoston死去了後，政治的的人物無閣出現，共款佇主後1903年Harbert-Spensa死去了後，大哲學家就絕種lah。

(6)科學，醫學方面。

也是大同小異。有影！科學的發達予人類有真利便，有幸福的生活。總是現代科學一半以上攏是使用佇科學武器的製造方面。按呢科學是一个可疑通驚的預兆，毋是欲予人類安居樂業的天使。親像按呢，自然科學實在有真大的進步，毋若按呢，今後的確會閣較進步。檢彩逐日會產生新的發明；請你關心來看現實的社會------勞動者的爭論，罷工，全世界的一半以上是佇戰火的中間，teh流無價值的血。經濟學家，社會學家對現實的社會是何等的無把握，親像不良少年年年增加，in也無辦法。詐欺，搶奪，兇殺 ......成做今仔日新聞紙上的常事。到處充滿烏暗的景色，佇你的家庭的內面也有這个烏暗腐敗的雲罩牢teh。親像經濟的困難，失業的現象，肉身的背叛，傷害，囝兒的放蕩，惡性補習的弊害，以及進學的困難所引起的失學者的慘景......兄弟姊妹，到底是進步á是退步？

舊年8月6日，第2太空船踅地球17輦了後，安然轉來地球上，甚至太空人會當佮地球通消息等的事實通講就是科學結晶，也是顯明科學的大進步。致到有專門家講：40年後的21世紀，會當射出直達到月球的定期旅客火箭。 彼時人就真簡單會當去到月球旅行。O͘h！進步，大閣通驚的進步......。

醫藥的進步，雖然會醫治真濟病，救真濟人，會予性命暫時拖較長。總是袂當補正性命。心志猶有真濟病症，佇現代醫學上猶是難題。有人講：對佇使用新藥了後，毋知有產生偌濟奇奇怪怪的病？若親像按呢，醫學愈進步，檢彩新的病症會愈增加，閣驚了會比以前閣較惡性。

論到遮，人類退步的跤跡毋是小可，通講人的進步是遐的較低，較下賤的方面，退步是遐的較懸，較高尚的方面。按呢到底人類是teh退步á是teh進步？

 

人類全體譬喻一个人順年齡的長大，人的趣味會變。人愈有歲，慾望愈深，就愈看輕信仰。也用娛樂的心情欣賞美術、厭賤哲學，專心一意計謀肉慾的增加......所謂現代的進步就是按呢。就是物質方面的進步，也是快樂方面的進步。

「如何用最快樂的方法來經過現世？」這項事就是現代人所熱望，唯一的問題，總是結局如何？

  Taⁿ當遐的科學teh進步？猶過道德，宗教攏俗化的時，聖經所記世間的末日就到。所以約翰講：「細囝啊！這是路尾的時，親像恁捌聽見有彼个對敵基督的來，現今有出濟濟對敵基督的，對按呢咱知是路尾的時。」（I 約翰 2:18）------佇遮所講「對敵基督的，」毋是指佮基督做對敵的人，自稱做基督代替基督的地位假基督。這个假基督是替真正的基督講：伊會當予人類有向望，親像按呢teh搝人望的人。現今的實業家，政治家，經濟學家，理工學家，科學家......檢彩是假基督。因為人類攏欽佩in，敬慕in，in不止有人望。In所講的話，所做的事ná親像對人類有向望，人也常常服從in，聽in的話贏過聽上帝的話。In掠上帝的話，耶穌的話，聖經的話做過渡期，非科學的古董品，做無有啥物款的作用。In無對耶穌基督teh揣出真理，活命佮 向望。In毋若按呢做，也按呢teh宣傳。In所誇口的就是科學，實業，政治，經濟......等的學問，對遮的teh斷定人類的向望，幸福佮拯救。

設使耶穌基督若是靈魂的救主遐的假基督就是肉體的救濟者。 閣設使耶穌若是供給來世的天國，遐的假基督就是提供現世的樂園，也現代人所渴望的基督就是供給真濟媠閣好食，飽閣有賰的物質，麵包，á是無料的救濟品，暫時來滿足sòng-hiong人的腹肚，這款的基督。

列位！咱毋知有予遮的sóng-hiong人的要求受感動，發出無責任的同情開救濟的倉庫的門，也袂記得提供來世的天國予in á無？若有你毋知是一个假基督á毋是？á是對你的學問------科學，醫學，天文學，經濟學......等，想講遮的會救國家，社會，民族，全人類，也按呢teh宣傳。設使你若是這位bo會信主的人就不論，總是堂堂做一位人人所尊敬，所承認有識的基督徒，若來講遮的話我想彼个人著 ài靜靜閣來想約翰一書，2章18節所teh講的聖經節。是lah，人是軟弱，雖然心神甘願，若是肉體軟茈，所以看重地上的事較過頭佇天頂的事，也常常會掩蓋上帝的道理，也無傳聖經所teh啟示的上帝的囝耶穌基督做世界的向望，世間的救主。若是咱佇這个進步佮退步的世代來想這項事，毋是無價值的事。最後請看II提摩太3:1-4。

「若是你著知佇遮的路尾的日有危險的時欲到，因為人欲顧家己，貪財，誇口，驕傲，謗瀆，悖逆父母，蒙恩，無聖潔；不正，背約，毀謗，無家己約束，殘忍，怨恨好，奸詭，執癖，膨風，愛快樂較過頭佇疼上帝。」這段就是teh描寫現今的社會做適當的話；逐日的新聞，每週，每月的雜誌攏teh講起遮的事------人欲顧家己，貪財，誇口，殘忍，怨恨好，奸詭，執癖，膨風，愛快樂較過頭佇疼上帝。設使這个情形若是末世正確的狀態，現今的世界通講是末世的時期。遐的掠進步科學，憲法，經濟，政治......做誇口的現代人，in逐日向滅亡的路teh走，若是in猶毋知彼个危險，是何等的可怕！！

總是滅亡是毋是萬物的終局？毋是！這世間的末日就是來世的開始。假基督受審判的時，真的基督就出現。所以這世間的進步雖然向滅亡teh進，若是上帝的國一直teh顯現，背叛上帝的人類照in所愛的去行，去娛樂，去放蕩，破壞身體，了後新天新地，新的耶路撒冷欲對上帝遐出現，臨到佇人的中間。所以這世間日日加添烏暗，就是證明來世漸漸teh出現的前兆。耶穌講：「你看，我欲緊緊來。」這世間佇物質方面漸漸teh進步，siāng時佇無拍算的中間teh促進主的再臨。

列位！請恁 毋通認毋著時代這款的兆頭！！請問進步á是退步？

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461