Lông-le̍k sin-nî ê kám-sióng
Lí Kim-chēng
1962.2.1 879 5-7
Lán phó͘-thong sî sui-jiân khah choē lóng sī ēng sin-le̍k, chóng-sī lông-le̍k ê koè-nî, tāi-khài ê lâng lóng put-chí ū teh siú. Taⁿ ū kuí hāng ê kám-sióng.
(1)Sǹg kū-siàu
Tiong-kok lâng teh chheng-lí siàu-hāng ê sî-kî khah siông lóng tī nî-koan. Lâng nā ū khiàm lâng ê siàu, tī nî tiong kiám-chhái iáu ē thoa tit, chóng-sī kàu nî-boé bô hêng boē ēng-tit. Siàu-hāng nā bô kap lâng chheng-chhó, chiū boē thang ēng hoaⁿ-hí khoài-lo̍k ê sim-chêng ngiâ-chih sin-nî, in-uī koè-nî sî, nā hō͘ lâng thó-siàu sī chi̍t kiāⁿ kiàn-siàu sū.
Sèng-keng chiong sím-phoàⁿ phì-jū choè " sǹg-siàu." Sè-kan lâng tek-khak beh " tuì hit ê piān-piān beh sím-phoàⁿ oa̍h-lâng sí-lâng ê Chú lâi ka-kī pâi-lia̍t". Sè-kan lâng tuì Siōng-tè só͘ khiàm ê siàu sī choē-ok ê siàu, chiū-sī choē-chè(罪債). Lán tuì Siōng-tè só͘ khiàm ê siàu, kiám-chhái ū sî ē ān-tit. Chóng-sī kàu ū chi̍t ji̍t tek-khak tio̍h chheng-chhó. Nî-koan sī lâng ê thih-hān(鐵限). Sí ê koan-thâu sī Siōng-tè ê thih-hān:
Chú Iâ-so͘ í-keng tī si̍p-jī-kè téng ū thè lán hêng chheng choē-chè, hiān-chāi chí-ū ài lán tông-ì, piáu-sī lán hoaⁿ-hí chiap-la̍p I uī lán ê sio̍k-choē. ǹg-bāng lán chit sî chiap-la̍p I choè lán ê Kiù-chú thang kap Siōng-tè chheng-chhó chit tiâu siàu.
(2)Toā chheng-sàu.
Tī koè-nî chêng muí chi̍t ê ka-têng lóng tio̍h chi̍t pái ê toā chheng-sàu. Phó͘-thong sî khah bô teh sàu ê piah-piⁿ, chhù-kak, mn̂g-sìⁿ āu, bîn-chhn̂g-kha chit sî lóng tio̍h sàu boē tio̍h ê só͘-chāi chiū ēng sàu-chhiú pa̍k tī tek-ko boé lâi chhéng.
M̄-nā ēng sàu-chhiú sàu, chhù-lāi ê í, toh, lóng tio̍h ēng chuí sé, ēng pó͘ chhit, liân ta̍k-ji̍t teh ēng, teh sé ê oáⁿ-poâⁿ, tê-au iā tio̍h poaⁿ chhut-lâi sé. Ē kì-tit choè gín-ná ê sî só͘ liām ê tông-iâu " Gín-ná hoaⁿ-hí nî-tau, toā-lâng loān chhau-chhau, ū lâng sé tê-poâⁿ, ū lâng sé tê-au." Che sī biô-siá koè-nî sî chin bô-êng teh sé mi̍h-kiāⁿ ê chêng-hêng.
Sin-nî ta̍k-hāng lóng sī sin. Chóng-sī beh ngiâ-chih sin ê í-chêng, tek-khak tio̍h tāi-seng tû-khì kū--ê. Kū--ê nā bô tû kàu chīn, chiū boē thang ngiâ-chih sin--ê. Lán tio̍h piàⁿ-sàu lán ê lāi-sim. Sèng-si gîm kóng:" Choē-koà choē-choē kau-tài lí, sī lí ū lâi thè goán sí. Kè-sin tāi-chì pàng chi̍t pêng, ǹg-bāng êng-kng ti̍t chìn-chêng."
Lán tio̍h chiong sim-lāi ê kū-lâng, kū-ê choē-ok. Kū- ê su-io̍k lóng tû kàu chheng-khì.
(3)Chhēng sin-saⁿ
Sin-nî sî chhēng sin-saⁿ, che sī lán Tiong-kok lâng ê hong-sio̍k. Sòng-hiong lâng, khîn-khiām ê lâng, tī sin-nî iā kè-kàu lâi chhēng sin-saⁿ. Chi̍t nî kú khîn-khiām só͘ lia̍p-chek ê chîⁿ kàu koè-nî boé chit niá sin-saⁿ lâi chhēng, hit ê hoaⁿ-hí si̍t-chāi chin toā.
Lán Ki-tok-tô͘ ū chi̍t niá koh-khah suí, khah ū kè-ta̍t, éng-oán boē kū, boē phoà ê saⁿ thang chhēng.
Chit niá saⁿ chiū-sī Chú siúⁿ-sù lán ê "Gī-phàu"(義袍).Í-sài-a kóng:"Goá in-uī Iâ-hô-hoa toā-toā hoaⁿ-hí, goá ê sim-sîn in-uī goá ê Siōng-tè chiū khoài-lo̍k, in-uī I ēng chín-kiù choè saⁿ kā goá chhēng, ēng kong-gī choè phàu kā goá moa". Chit ê hoaⁿ-hí, iâⁿ-koè chhēng sè-kan ê suí-saⁿ ê hoaⁿ-hí chheng-bān poē.
(4)Hioh-khùn, thit-thô.
Koè-nî sî sī hioh-khùn thit-thô ê sî, lán Tiong-kok lâng sī chi̍t ê khîn-bián ê bîn-cho̍k. Chi̍t nî 365 ji̍t, ta̍k ji̍t phah-piàⁿ chò kang, chin chió ū hioh-khùn ê ki-hoē. Chóng-sī koè-nî chiū bô lâng chò kang, lóng hioh-khùn kap thit-thô. Chóng-sī khó-sioh, ū-ê bô sì-chiàⁿ ê hioh-khùn kap thit-thô. Tī chiah ê ji̍t teh poa̍h-kiáu, chia̍h chiú chò pháiⁿ tāi-chì.
Ū lâng chiong chi̍t nî kú khîn-khiām lia̍p-chek ê chîⁿ khì poa̍h-kiáu su liáu-liáu. Ū lâng lim chiú, sún-hāi sin-thé.Sīm-chì chiau-tì ì-goā ê put-hēng.
Ū lâng kóng, chi̍t ê bîn-cho̍k ê heng-soe, sī tuì in cháiⁿ-iūⁿ teh lī-iōng in ê hioh-khùn(假期) lâi koat-tēng. Lán beh tuì tó-uī lâi tit-tio̍h chin ê hí-lo̍k kap an-hioh nih? Sèng-keng pò lán chai, "Tio̍h siông-siông tiàm tī Chú lâi hoaⁿ-hí." Chú Iâ-so͘ ū teh kiò kóng, "Lín kìⁿ-nā tio̍h-boâ poē tāng-tàⁿ ê, tio̍h chiū-kūnGoá, Goá beh hō͘ lín an-hioh" (Hui-li̍p-pí 4:4; Má-thài 11:28).
Chí-ū tī Chú ê lāi-bīn chiah ū chin-si̍t ê an-hioh kap hoaⁿ-hí.
(5)Chia̍h chheⁿ-chhau
Lán Tiong-kok lâng bô-lūn hó-gia̍h, bô-lūn sòng-hiong, kàu koè-nî tek-khak oē pī-pān chi̍t tǹg chheⁿ-chhau, kap ke-lāi ê lâng saⁿ-kap chia̍h lâi hoaⁿ-hí. Chia̍h-mi̍h sī lâng jio̍k-thê(sic.) ê ki-pún su-iàu, lâng kì-jiân ū jio̍k-thé, bô chia̍h boē ēng-tit. Koè-nî sî chia̍h chheⁿ-chhau, ū chit ê ǹg-bāng, chiū-sī ǹg-bāng tī kui-nî tiong oē thang chiàu án-ni chia̍h kàu pá.
Chia̍h-mi̍h sī uī-tio̍h seng-khu, chóng-sī lâng m̄-sī ū thang chia̍h chiū kàu-gia̍h. Tī chia̍h-mi̍h í-goā iáu ū choē-choē iàu-kín ê sū. Ū lâng kóng: chia̍h-mi̍h hō͘ pak-tó͘ pá;tha̍k-chheh hō͘ thâu-náu pá;thàn chîⁿ hō͘ chîⁿ-tē pá; chóng-sī lán beh ēng sím-mi̍h hō͘ lán ê lêng-hûn tit-tio̍h pá-chiok neh? Chí-ū Siōng-tè ê oē chiah oē thang hō͘ lán ê lêng-hûn tit-tio̍h pá-chiok. "Lâng ê oa̍h, m̄-nā oá-khò piáⁿ, chiū-sī oá-khò tuì Siōng-tè ê chhuì só͘ chhut lóng-chóng ê oē "(Má-thài 4:4)
Kin-á ji̍t sè-kan lâng uī-tio̍h bô mi̍h thang chia̍h, tì-kàu jio̍k-thé soe-jio̍k ê lâng boē chió. Chóng-sī uī-tio̍h lêng-hûn bô chia̍h-mi̍h, tì-kàu sim-sîn put-an, iu-būn, khó͘-thàng, kiaⁿ-hiâⁿ, giâu-gî ê lâng iā boē chió. Só͘-í lán tio̍h ka-kiông thoân hok-im ê kang-chok, chiong Siōng-tè ê tō-lí thoân hō͘ lêng-hûn chhuì-ta, sim-sîn iau-gō ê lâng. Chú Iâ-so͘ kóng: Goá chiū-sī oa̍h-miā ê piáⁿ; chiū-kīn Goá ê lâng koat-toàn boē iau, sìn goá ê lâng éng-éng boē chhuì-ta".(Iok-hān 6:35)
(6)Hóng-būn chhin-chiâⁿ, pêng-iú.
Sin-nî sī chhin-chiâⁿ, pêng-iú lâi-óng kau-poê ê ji̍t-chí. Ū sî lán chò lâng kheh khì hóng-būn, ū sī lâng lâi hóng-būn lán, chioh tio̍h hō͘-siong ê hóng-būn ke-thiⁿ iú-gî. In-uī tī phó͘-thong sî, uī-tio̍h sū-gia̍p khah bô ki-hoē, nā m̄-sī ū sím-mi̍h te̍k-pia̍t ê sū, chiū bô sî-kan thang hóng-būn. Tī sin-nî hóng-būn ê sī chin-si̍t ê pêng-iú, tek-khak m̄-sī ēng lim-chia̍h lâi kiat-ha̍p ê, sī eng-kai tio̍h tī khah ko-siōng ê bo̍k-tek lâi kau-poê chiah tio̍h.
Pêng-iú sī jîn-seng chin toā ê pang-chān, chi̍t ê lâng ê sêng-kong kap sit-pāi sī tuì i só͘ kau-poê ê pêng-iú lâi koat-tēng. Lán tio̍h kau-poê hó ê pêng-iú, chin-si̍t thò-tòng ê hó pêng-iú sī sím-mi̍h lâng? Chiū-sī Iâ-so͘ Ki-tok, lí nā tit-tio̍h I choè lí ê pêng-iú, lí ê jîn-seng tek-khak beh chin thò-tòng
Koh lâi chiū-sī saⁿ-kap gióng-bōng Chú, tâng sìn-gióng ê pêng-iú Goān lán tī Chú, í-ki̍p Chú lāi ê hó pêng-iú tiong lâi saⁿ-kap siū chō-chiū.
(7)Sin ê kè-e̍k
Sin-nî tio̍h ū sin ê kè-e̍k, sin ê kang-chok, sin ê chhut-hoat. Chóng-sī bô lūn beh kè-e̍k sím-mi̍h sū, m̄-thang chí-ū siūⁿ ka-kī ê sū, tio̍h phoè-ha̍p Siōng-tè ê kè-e̍k ta̍k hāng chiah oē hó-sè. In-uī Siōng-tè iā ū uī-tio̍h lán ê kè-e̍k, Siōng-tè ê kè-e̍k sī sím-mi̍h? Siōng-tè ê chí-ì sī sím-mi̍h? Sèng-keng kóng:" In-uī I ài chèng-lâng tit-kiù , iā chhim chai chin-lí." Siōng-tè ê chí-ì ài chèng-lâng lóng tit-tio̍h kiù. Só͘-í lán tio̍h chīn-la̍t ín-chhoā lâng lâi chiap-siū kiù-un, che sī lán Ki-tok-tô͘ ê kè-e̍k, iā sī lán ê kang-chok. Lí ê chhin-lâng, pêng-iú iáu ū loā choē lâng bē bat thiaⁿ-kìⁿ hok-im, iáu ū lâng iáu-boē tit-kiù. Lí kiám m̄-bián uī-tio̍h in ê tit-kiù lâi kè-e̍k khó-lū?ǹg-bāng lán tī kin-nî tiong oē thang ēng koh-khah choē ê sî-kan tī kiù lâng ê kang, thiàⁿ lâng, lī-ek lâng, hō͘ Siōng-tè ê kok kiàn-chō tī toē-nih chhin-chhiūⁿ tī thiⁿ-nih.
