首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 葬式的意義和辦法
葬式的意義和辦法
卷期：第904期 本次： 日期：1963/2 刊名：台灣教會公報 頁數：6
篇名：葬式的意義和辦法 [ Chòng-sek ê ì-gī kap pān-hoat ]
作者：許德謙 Khó͘ Tek-khiam
  顯示 : 漢羅 全羅 並列  

研究：葬式的意義佮辦法

許德謙

  A)  葬式的意義。

有接著主筆講：有信徒teh請問葬式做理想的方式佮順序。愛小弟寫淡薄來做參考。關係基督徒喪事的指導。咱教會典禮有規定彼个辦法，以及「基督徒佮台灣慣俗」彼本冊也有所指示。Taⁿ咱愛得著理想的方式佮順序的以前愛理解葬式的意義。

論到死失是人生所袂免得最威嚴的事實。咱有信過身的人，伊的靈魂已經去佇上帝遐，猶過伊的遺體愛安葬，愛佇上帝佮遺族，親人，朋友的中間來舉行告別禮拜。葬式是teh數念故人，猶過是為著遺族，親情，朋友遮的活人。

對葬式，予人知人親像花，草，快焦，快謝，著愛信靠活命的源頭上帝。佇悲哀的中間仰望基督的恩典，佮伊的能力，就會通接受伊的閣活佮活命，毋是對舉行葬式的禮拜會通予死人得著救，á是會通超渡。因為得救是在佇上帝。對死失的看法，新約聖經有報咱知，咱信主的人佮異教有各樣的看法。

異教看死失是真厲害，死後的事毋知，對死真驚惶，真無平安。總是基督徒對初代教會以來，對死失的看法佮異教的人的看法大大有各樣。

異教的人對死失有真驚惶，總是基督徒對死失有超越的態度，就是看死失是信徒的勝利，欲轉去天國是最快樂的事，所以這个死失佮基督的閣活有關係。基督徒愛信靠基督來較贏死失，耶穌基督死閣活，這是上帝對魔鬼死失的勝利。

死失毋是人生最後的解決，是佮咱全活命有關係。有人身體勇健，總是伊的靈性已經死，雖然伊真活動，猶過伊的靈性佮死人一樣。有人雖然伊的身體已經死，猶過伊的靈魂猶活teh。

聖法蘭西斯的祈禱的中間，有一站teh祈禱講：「我感謝上帝，賞賜我一切的物件，也同時感謝上帝予我的身體會死完全佮主親近。」死失毋是干焦佮老人，病人有關係nā-tiāⁿ，佮少年，青年攏有關係。保羅講：我逐日佮主同死，也佮主同活。這是報咱得著靈德的活命的法度。死失是生活最後的目標。  Taⁿ這个葬式，是一種神秘的儀式。因為死失是一種神秘的事情。葬式有包含勝利的意義，總是咱一生著對信仰來克服一切的困難。Taⁿ對死失咱欲離開苦難的世間，欲佮主相佮快樂，這是勝利的意義，這是一種神秘的事情。最有意義的，是咱佇禮拜堂做葬式的禮拜，一面是勝利感謝的禮拜，一面是故人佮咱猶活teh的人做離別的禮拜。

  佇禮拜中咱相信耶穌用死廢無死，咱信主的人也欲得著身體的閣活。死啊！你的較贏佇tá落？死啊，你的厲害佇tá落？總是感謝上帝，伊予咱對咱的主耶穌基督得著較贏(I 哥 15 :55，56)

總是一面表明基督徒的勝利，總是猶過一面，就是對世間人人情的關係。因為故人佮咱久久佇世間有好的交陪，有人得著故人的疼，有人疼故人。感謝上帝，引chhoā故人過去彼旁佮主踮，入天堂福氣。總是佇人情上，咱免有傷心。特別伊的遺族，親人，朋友毋甘。因為佇生活伊無機會通閣作伙。對人情有艱苦心的所在，佇遮有需要上帝的安慰佮信仰的鼓勵，所以葬式一方面佮死人有關係。感謝上帝，予伊勝利入佇主的永活。

  閣一方面是為著活人，遺族，親人，朋友，同信，同道的兄姊會通得著安慰，有向望將來的福氣，現在分開是暫時nā-tiāⁿ。有一日欲永遠佇上帝的面前做伙。

所以葬式愛嚴肅，佇遮有神秘的意義，克服世間的意義，有永遠活的意義。

 

  B)  葬式的辦法。

關係葬式的辦法，無論入墓式，告別禮拜，á是埋葬式攏著照教會的典禮，根據聖經所教示的真理佮神學tek的意義做基礎來做。也著酌量無異端讉損的範圍內，考慮地方的風俗，習慣來做。總是喪家凡事愛佮教會的牧長連絡，服從in的指示。若按呢就較會通榮光上帝。

(1)

入墓式猶原照教會的典禮來舉行。棺木若到位，信主的人毋免用爬，á是跪來迎棺念異端讉損的話。過身的人的身穿無一定著穿幾領，若是穿白衫是較合適。棺木內面毋免下甚麼物件。有人下衫褲，錢，金器，有人下伊的聖詩，聖經佇內面。這是無需要。因為佇彼旁無欠用世間的物件。故人的聖詩，聖經較好通予囝孫，遺族做記念。若是欲下遺體佇棺木的時，若毋是有傳染病，較好伊的遺族共伊好禮用布扶落去棺木內。若有需要別人幫贊也通。  Teh下的時，赴會的人來吟聖詩(251首)，那吟那下也是有好意思。

(2)

關係葬式咱通照典禮來舉行。也著參考彼本「基督徒佮眷屬」較好。

  葬式的典禮普通是蹛佇教會，á是佇家庭，時間是一點鐘以內最理想。因為若傷久大家會厭倦，會出出入入，失落嚴肅。葬式的筵席著廢止。因為浪費閣無意義，只有予較遠的遺族，親人用簡單的飯湯予in食就好。

  封釘著用長執，á是信徒，毋免設子孫釘，也毋通用跪的禮，以及對故人講話，講詔辭，若有人欲講安慰的話，較好佇喪家。對故人的像á是棺木毋通行禮，拈香，跪拜á是替死人祈禱。因為過身的人伊的靈魂已經到佇上帝遐。因為佇禮拜中咱的信仰的對象是上帝，咱的主耶穌基督毋通有閣另外彼个對象做偶像予咱敬拜。因為上帝是咱的祖先的源頭，咱只有敬拜伊就好。

關係採用音樂的事，古樂毋通用，最理想，無用樂隊是較好，若是愛用樂隊，較好著照聖詩的調來奏。基督教的喪事愛嚴肅，安靜，毋是欲鬧熱來鋪張，踅街行列來予人看，做遺族的體面來示威佇人的面前來榮光家己，是欲安慰人，榮光上帝，節省閣有意義無浪費，若浪費會致到予遺族加添重擔，有的遺族經濟上有困難，因為喪事愛好看鬧熱，浪費著借錢負債，致到真艱苦，其實佇彼旁的先人無teh要求按呢；只有親情五十，á是第三者的意見teh左右。基督徒著愛細膩守己安份。若是有的人伊也通節省經費來做濟濟好事。我捌佇一間教會拄著會友過身，照教會的指示辨理節省閣有意義，後來in的遺族提5000箍來教會講欲做教會賑濟散鄉人的路用。其他5000箍是欲做教育的獎學金，這條錢是辨理喪事了，照伊的序大人在生的吩咐節省喪事的經費欲做好事--的。 這个事予全教會受感動，最好的模樣。

總講喪事的禮拜愛嚴肅，節省經費做好事，佇悲哀的中間得著上帝的話安慰，以及向望將來的閣活，關係告別式禮拜的順序照下面做參考。

1) 奏樂。   2)聖詩。3)祈禱。

4)聖經。 5) 講道。   6)祈禱。

7)聖詩。8)  故人略歷。

9)聖詩。10) 詔歌 á是故人愛吟的聖詩。

11)  靜默 (數念故人，為喪家祈禱)。

12)  哀謝 (喪家代表)。13) 頌榮。   14)  祝禱。

 

(C)關係埋葬式猶原照典禮來舉行。

不過落khòng的時毋通念別款的話，有迷信的行為。因為咱已經有讀上帝的話，吟詩祈禱就好。落壙也毋免看時。總講咱只有信靠主，榮光主逐項就免掛慮。葬式是欲榮光上帝，數念故人，安慰喪家佮會眾。欲予大家致意頂面的事，向望閣活的活命。

(筆者：台南民族路教會牧師。禮典委員會主席)。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461