LÚ-SÈNG Ê BÍ-TEK

N̂g Sò͘-gio̍k

Teng Chhái-hûn

1963.03.01  P.7-8

  Goá koh chit pái chiong pak khí-lâi the̍h tī chhiú-nih ê ba̍k-kiàⁿ, koà tī goá ê phīⁿ-thâu, chiong Kong-pò the̍h oá lâi kàu ba̍k-chiu chêng, ná khoàⁿ ná siūⁿ chit kù " Hiān-tāi Lú-sèng ê Bí-tek."  Goá siūⁿ bí-tek chiū-sī bí-tek, kiám ū kó͘-chá kap hiān-tāi ê hun-piat.  Sì nî chêng goá tòng-soán pún-chhī ê bô͘-hoān bú-chhin, goá m̄-káⁿ kóng án-ni goá chiū-sī chi̍t ê si̍p-choân si̍p-bí ê lú-sèng, chóng-sī thang kóng goá it-seng ê ló͘-le̍k, uī-tio̍h tiōng-hu, uī-tio̍h kiáⁿ-jî kap choân ka-têng ê hēng-hok, ū to-siáu ê sêng-chiū, chiàu sè-kan ê gī goá sī chi̍t ê bô͘-hoān ê lú-sèng.  Goá iáu-kú teh siūⁿ ê sî, goá ê sim-pū A-hûn phō sun-á oá-lâi, i tú-tú kà chheh tńg-lâi, suî-sî oāⁿ saⁿ phō gín-ná, kap i saⁿ-kap teh thit-thô.  chit ê sî-chūn goá chiah chhíⁿ-gō͘, si̍t-chāi A-hûn pí goá khah giám-ngī, i choè chi̍t ê hiān-tāi ê lú-sèng, iā beh lāi, iā beh goā; beh lí-ke, iā tio̍h kò͘ keng-chè, chóng-sī i kap Hiân-bûn ê kám-chêng hiah-nih hó, ta̍k-ji̍t khoài-khoài lo̍k-lo̍k kap kiáⁿ-jî teh kè-ji̍t.  Goá só͘ ū ê bí-tiám i lóng ū, i só͘ oē ê goá choē-choē lóng boē.  Goá chiū kiò A-hûn lâi siá chit ê Toê-ba̍k, i chhiò-chhiò tuì goá kóng, goá liâm-piⁿ ài chú-pn̄g, lán ê-hng-àm chiah lâi saⁿ-kap siūⁿ.  Ē-bīn só͘ siá ê , chiū-sī goá kap sim-pū A-hûn só͘ siá ê, chiū-sī goá kap sim-pū A-hûn só͘ siūⁿ choè lí-sióng ê Hiān-tāi Lú-sèng ê Bí-tek.

  Ho̍k-chiông:

  Choè chi̍t ê lú-sèng, siū chhòng-chō chiū-sī beh pang-chān lâm-sèng, tuì án-ni lâi kóng, choè hū-jîn-lâng ê tio̍h hia̍p-chō͘ i ê tiōng-hu.  Tng goá kóng-khí lú-sèng ài ū sam-chiông sù-tek ê sî, A-hûn kóng chit ê sī thian-keng toē-gî ê tāi-chì, chi̍t tiám-á to bô chhò-gō͘.  chit sî A-hûn kóng, tī kè-khì lâng ū chiong ‘ho̍k-chiông' kái-sek chhò-gō͘.  Ho̍k-chiông eng-kai sī nn̄g hong-bīn ê; chi̍t ê sī hō͘ lâng ho̍k-chiông lâng ê lâng.  Só͘-í hit lâng tāi-seng tio̍h choè chú, ēng hō͘ lâng thang oá-khò ê sìn-si̍t, chhî-siú i ka-kī ê jîn-keh, koh ēng hoaⁿ-hí pang-chān kap chiàu-kò͘ ê thiàⁿ-sim lâi kek-tōng i ê tuì-siōng, hō͘ i hoaⁿ-hí lâi kun-tè i.  án-ni chiah boē koh poa̍h lo̍h-khì Tong-hong lâng só͘ iau-kiû, bēng-lēng-sek ê ho̍k-chiông; tī hit khoán ê ho̍k-chiông bô ū thiàⁿ ê kau-poê, m̄-sī chhut tī chū-goān--ê, sī chhut tī lu̍t-hoat ê tāng-tàⁿ.  In ê seng-oa̍h bô ū khoài-lo̍k, it-poaⁿ lâng ê jîn-seng tiong pi-ke̍k-sèng khah choē, hí-lo̍k ê seng-oa̍h khah chió.

  Siūⁿ tio̍h goán chhin-ke, si̍t-chāi chin gâu kà kiáⁿ, m̄-bat ēng chi̍t ki chhê, iā m̄-bat chi̍t pái pìⁿ-bīn lâi mē i ê kiáⁿ-jî, tú-tú chiàu A-hûn só͘ kóng, "Goán pa-pa kan-ta oē hiáu-tit thiàⁿ nā-kiāⁿ."  A-hûn ia̍h koh tām-po̍h kóng-khí i pún-sin ê tāi-chì:

  ......Goán hiaⁿ-bē-á ta̍k lâng lóng m̄-bat uî-ke̍h goán pa-pa kap ma-ma, in-uī goán chai bô-lūn jû-hô, pa-pa ma-ma lóng sī thiàⁿ goán, in hō͘ goán chū-iû, só͘-í goán sìn-jīm in, in thiàⁿ goán, só͘-í goán iā thiàⁿ in......Kàu goá tī Su-hoān Ha̍k-hāu kap Hiân-bûn se̍k-sāi ê sî, pa-pa ma-ma iā bô ū chi̍t tiám-á ê oàn-tò͘, chí-ū kā goá kóng, tio̍h o̍h thiàⁿ Hiân-bûn.  Tī kiat-hun ê í-chêng pa-pa koh kā goá kóng, jîn-seng beh tú-tio̍h sím-mi̍h khoán ê kéng-gū m̄-chai, chóng-sī lí tio̍h éng-oán ēng sìn-sim kap siān-ì lâi kè lí ê jîn-seng...... Koh kiò goá chiong-kim í-āu tio̍h ho̍k-chiông Hiân-bûn, uī-tio̍h án-ni, goá si̍t-chāi lī boē khui goán ê pē-bú.  Chóng-sī Hiân-bûn iā sio-siāng khoán thiàⁿ goá, hō͘ goá oē thang sìn-khò-tit......"

  án-ni lâi khoàⁿ, ho̍k-chiông sī lú-sèng ê bí-tek, chóng-sī siang-hong tio̍h ài lóng ū to̍k-li̍p kiān-choân chū-iû ê phín-keh, chiah sī ha̍p tī hiān-tāi lâng ê phiau-chún.

  Saⁿ-kap hia̍p-chō͘ ka-têng ê keng-chè.

  Sit-chāi A-hûn m̄-nā iú-hàu i ê pē-bú, tuì goá kap Hiân-bûn ê lāu-pē iā sī ke̍k-kî iú-hàu.

  Siūⁿ-tio̍h goá kè ji̍p-lâi N̂g--ka hit sî si̍t-chāi chin hó-miā.  Goá ji̍p in ê mn̂g saⁿ kò-ge̍h m̄-bat chhut toā mn̂g, khoán-thāi tiōng-hu í-goā, goá m̄-bat hoân-ló sím-mi̍h.

  Hiān-sî só͘ chhun saⁿ kah thó͘-toē Hiân-bûn saⁿ ê hiaⁿ-tī, chiong-lâi seng-oa̍h iā sī chi̍t ê pe̍h-sin lâng.  Tuì chit khoán ê kéng-gū, A-hûn m̄-bat ai-oàn, A-hûn kóng, chit ê m̄-sī hān-tiāⁿ lán ka-têng ê sū, uī-tio̍h beh hō͘ siā-hoē-siōng ta̍k ê lâng ê seng-oa̍h khah hù-jū, khah pêng-téng, te̍k-pia̍t tuì Jîn-koân kek-bēng í-lâi, lâng-lâng tī hoat-lu̍t-siōng lóng pêng-téng, chū-iû hoat-tián ta̍k ê lâng ê seng-oa̍h, tī chit khoán ê siā-hoē, chi̍t lâng beh thàn-chhī chi̍t ka-têng ū khùn-lân, koh kà-chheh to iā m̄-sī kè-thâu kan-khó͘, oē thang tuì thàn tām-po̍h chîⁿ, choè ka-têng ê lō͘-ēng.  Hiân-bûn ia̍h bô hoán-tuì; hoán-tńg tuì i sī chin toā ê an-uì kap pang-chān.

  Ha̍k-si̍p gē-su̍t ê seng-oa̍h.

  "A-bú, í-chêng ê siā-hoē seng-oa̍h sò͘-phok, oē thang chheng-êng kè-ji̍t, si̍t-chāi chin hó. M̄-kú siā-hoē to í-keng kiâⁿ kàu chit ê toē-pō͘, bô o̍h sin ê seng-oa̍h iā boē ēng-tit.  Tī keng-chè-siōng chhin-chhiūⁿ khah kan-khó͘, chóng-sī hiān-tāi lâng ê bu̍t-chit hióng-siū si̍t-chāi bô khah su chá-chêng ê lâng.  chóng-sī nā kóng cheng-sîn kap lêng-sèng hong-bīn, hiān-tāi ê lú-sèng si̍t-chāi khah hēng-hok; ū chū-iû to̍k-li̍p ê jîn-keh, koh si̍t-chāi iā oē thang hoat-hui ta̍k lâng ê jîn-sèng kap lêng-sèng kàu chīn siān chīn bí.  Te̍k-pia̍t lán choè sìn-tô͘ ê lâng, tit-tio̍h Chú ê oē ê iúⁿ-chhī, jīn-bat chin-lí; si̍t-chāi pang-chān lán ê seng-oa̍h ke̍k-kî choē.  Siā-hoē chit khoán ê chìn-pō͘, goá si̍t-chāi kám-kak chin khoài-lo̍k, ká-sú nā oē thang hō͘ goá mài hiah-nih bô êng, á-sī chi̍t ji̍t pìⁿ-châiⁿ 48 tiám cheng kú, goá beh koh kè-e̍k choē-chē, hō͘ lán ê ka-têng ê seng-oa̍h koh-khah gē-su̍t-hoà.  Chit khoán hong-sēng ê oa̍h-miā kiám m̄-sī lán ê Chú só͘ beh siúⁿ-sù lán ê mah?  Koh tuì lán khoài-lo̍k ê seng-oa̍h oē thang êng-iāu Chú ê miâ.

  àm-sî kóng kàu 11 tiám goā, Hiân-bûn lâi chhiáⁿ goán hioh-khùn.  Khoàⁿ-tio̍h A-hûn chit khoán ê chhong-bêng, koh siūⁿ-tio̍h Hiân-bûn ê hēng-hok, si̍t-chāi ke̍k-kî him-soān.  Sî-kan nā oē thang lâu tò-thè, goá mā ài chhin-chhiūⁿ A-hûn in án-ni lâi kè chit khoán ê seng-oa̍h.