首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 女性的地位
女性的地位
卷期：第905期 本次： 日期：1963/3 刊名：台灣教會公報 頁數：2
篇名：女性的地位 [ LÚ-SÈNG Ê TOĒ-UĪ ]
作者：編譯室 Phian-e̍k-sek
  顯示 : 漢羅 全羅 並列  

女性的地位

編譯室

  對婦女殘忍的世界。

 佇耶穌降生以前，這世界是婦女最悲慘，最痛苦的所在。早時佇異教的國家，將查某囝仔做奴隸，做貨物，予in徛佇市場的台頂teh拍賣。

  In的內心雖然痛苦，猶過著激笑面，若無會閣受著家己的主人的鞭拍。  In價值偌濟錢，是照in的面貌佮體格的媠bái，抑是會做甚物款的工來決定。In破病的時，也袂通得著主人的體貼，閣著受虐待，也著照常做苦工。In受這款的待遇，因為in是用錢買--來的貨，所以袂通得著做人的待遇。  In的主人甘願看in teh受糟蹋，也毋甘付出一點仔的同情心。

  甚至佇古羅馬佮古希臘的時代，in雖然誇口in最文明的國家，對良善的女子，毋敢親像野蠻的國家按呢來迫害；是對in真好款待。總是，事實上這个是加講的，in款待女子敢無親像奴隸相siāng？  檢彩in的工作較輕可，毋免過頭受凌辱；毋過in一生的自由差不多攏受限制。到佇希臘的黃金時代，極力提倡自由的時，婦女若欲得著行動的自由，也著甘願受恥辱才會通得著。  彼時只有妓女才會通出入佇公共的場所，將頭面露現予人看著。善良的女子，照in想，應該著匿踮密房內。咱想看覓，按呢佮鳥籠仔內的鳥仔有甚物各樣？假使若會通食真好，穿真媠，彼个性命敢有甚物意義？這个對提倡自由的希臘國家敢毋是極大的諷刺？

 佮這个比較起來，猶太的婦女的地位加真懸。總是伊若是做一个女婢，照伊的命運猶過是操縱佇主人的手中。閣照in的風俗，婦人人也是予查埔人所看輕，無有甚物地位通講。丈夫可以隨便講：伊煮飯煮袂好勢，就共伊離婚。親愛的朋友，讀到這个所在，你心內有甚物感想？

假使遮的婦人人，不幸成做查埔人情慾的犧牲品，失落貞潔，in就永遠受看輕，一生陷落佇悲慘的命運，袂通超生。異教徒佮猶太人siāng一款，攏是將遮的墮落的女子趕去蹛佇貧民窟的所在，若親像講彼个垃儳的人，著踮佇彼款垃儳的所在，也才袂沐著阮遮的高貴的人。遐的存心惡毒的人將責任推開，閣將輿論佮風俗，習慣的重擔共in teh牢-leh，予in無閣有反悔自新的機會。

   造物主予女性的地位。

創世記1：27記載，原來造物主創造人的時是照伊家己的像。佇遮真明顯講起男，女攏是照上帝的像來創造，是同等，同權，同一價值。

 佇遮講同一價值，毋是講：男，女生活方式也著相像。 佇遮明明講in是欲相補足：「耶和華上帝講：人單身家己蹛毋好；我欲共伊造一个幫贊的來匹配伊」 (創世記2:19)。

  按呢看，也是teh講男女性的互相需要。

 佇頭一个受交代的使命，「上帝賜福in；上帝閣對in講，著生湠濟濟」(創世記1:28)。In互相需要，為著按呢，就閣記載講：「所以人欲離開伊的父母，結聯伊的某，in就成做一體」(創2:24)。

 佇第二的大使命「恁著治理一切...」(1:28)也是互相需要。

所以照造物主的思想，假使咱將男性佮女性分別來看，in每一个攏是上帝的同等。  同權，同一價值的像；但是同時in的合作佮結合，也常常反照上帝的完全美滿佮伊的生活；特別對這款的工作，才會通成做上帝完滿的像。

實行疼的生活，佮對文化有所成就，就是人佇宇宙中所著做的兩種偉大的使命。對男的來看，伊的生存的活動是積極的，是進出的，是男性一款的進出性佮恆心，是對女性典型的接受性中所會通得著的。佇愛情生活中佮文化的觀點看，女性閣較表現伊的接受性，siāng時也存一款隱囥佇真深的所在的造化力，而且這佇男性是完全袂通看出的。結果，男性佮女性，對造物主，對同伴，對宇宙，攏有造化佮接受兩種的特點。

假使男性若無將女性照女性本身來估計，只有欲看男性佮女性的關係來評判女性的生活意義；換話講：假使男性掠家己做目的，女性做工具；siāng時女性若看家己的價值無佇伊家己本身，只有看伊的價值是在佇佮男性所有的關係的頂面，對按呢無欲努力發展來成就in家己所有的同等，同權，同價值的個性，若按呢，男，女攏平平是脫離上帝的本意，因為上帝實在予女性本身有in的地位，是佮男的平等。佇婚姻生活中婦人人順服查埔人的義務，這是管理上的問題，毋是講in是附屬佇男的，in的肉體，精神，靈魂有甚物較無價值。

直到近代，猶過有人袂了解女性的問題。事實，佇法律的面前也是同等的。  紐西蘭佇1893年，芬蘭佇1906年，挪威佇1907年，澳洲佇1908年，英國佇1938年攏完全聲明男女同權。

總是事實佮理論差真遠。咱的文學輿論猶過有時teh看女性做魔鬼，是男性情慾的對象；有時毋是看in的價值做同等，只有要求in違反女性的本質，去做佮男的相像的工，去生活佮男的siāng款的生活。這兩款攏離開上帝的心意，也是離開女子的本性。

婦女佇耶穌生活中的地位。

佇耶穌生活中，最親近伊，一世人奉承伊的，是婦人人。佇伊歡喜的時，勝利的時，佮伊同快樂的，是婦人人。佇伊受侮辱，受譭謗的時，共伊安慰，溫柔接待伊的，是婦人人。對伊的受難到十字架頂，一步一步，綴佇伊的後面，用目屎祈求伊赦免世間人的罪，閣表示永遠毋敢放拺伊的，是婦人人。佇眾人teh喝「釘伊佇十字架」彼時，勇敢走進前，用最好的手巾擦伊的汗佮血的人，也是婦人人！  In佇伊的一生的所做的中間，做一个極重要的份子，耶穌常常將仁慈佮恩惠賞賜予in。總是，因為in的天性是內向，無爭取向外表現，所以常常恬恬綴佇伊的後面。為著按呢，人無容易注意著in，也袂記得in體貼主所做的濟濟好所行。有人甚至講：耶穌罕得插遐的婦人人，抑是無愛佮in交陪，按呢是較大的誤解。耶穌捌濟濟擺為著婦人人辯護，做in勇敢的保護者，為著in行濟濟慈愛公義的行為。

   女性的特權。

人毋nā是受造物也是協同的創造者，參加上帝造化的工作。嬰仔就是上帝佮老父老母合作的產品。

  女性的偉大使命，就是做老母；或是肉體的母親，抑是靈魂的母親。女性的詔命是佇家庭，抑是社會事業，抑是佇教會中，做靈魂的母親。

家庭的幸福佮囝仔的將來，攏是佇母親的手中培養起來的。教會的幸福，也是佇女性的手中；特別佇這个世代閣較是按呢。

你欲成做甚物款的母親。

你愛成做一个幸福家庭的母親？抑是靈魂的母親？總是有一个閣較重要的問題，就是你欲做一个甚物款的母親？模範的母親，囝兒所尊敬的母親，抑是眾人所詈罵的母親？

你的愛情，你的勇敢，你的袂變換的心志，是毋是會通獻予別人做一个有價值的美麗的生活？佇家庭，佇教會，用保護，教督，幫贊，醫治，安慰，訓練你的囝兒到佇幸福的地步？

這完全在佇你，你現在是甚物款的女子。.

現在女性重要的使命。

  未來的家庭，國家，教會，所產生的子女的幸福，攏結聯佇一个青年時代的所做。現代的女性比過去的女性有閣較重大的使命；所以in的準備的工作也應該著閣較完善。早前的女性，學會曉煮飯，做衫，洗衫，就會通應付生活，會通結婚。現代的女性著讀冊，著鬥做逐種主要的工作，著影響社會的生活。有人講：根據選舉權，女性會通阻止第三次大戰。當然，女性本來著反對破壞，in的理想是造化，保持所有的佮發展所保存--的。有一句話講：「佇歷史上，未捌有一个時代，親像咱這个時代，對女性要求遐爾濟發明的精神，勇敢，負責任，忠實，犧牲，忍耐；總講：就是遐爾偉大的英雄豪傑的精神。」

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461