Iâ-so͘ kap Sat-má-lī-a ê hū-jîn-lâng

1932.07  tē 568 koàn, Koà-chhài-chí tē 78 hō, p.27

（Tiāu ēng "Take my life," chok-khek-chiá Wm. B. Bradbury.....）

1.Iâ-so͘ keng-kè Sat-má-lī-a,

Kūn tī Iok-sek ê toē Sū-ka;

Tī-hia ū Ngá-kok ê chuí-chíⁿ,

Chú kiâⁿ lō͘ siān, chē tī chíⁿ piⁿ;

Ha̍k-seng ji̍p siâⁿ boé chia̍h ê sî,

Kan-ta chhun Chú tī-hia ka-kī;

ài thoân tō-lí hō͘ hiah ê lâng,

Chiū thàn ki-hoē liâm-piⁿ choè kang.

2.Sat-má-lī-a ê hū-jîn-lâng,

Beh chhiūⁿ chuí toà pân kap chuí-tháng;

Iâ-so͘ ài ēng chuí choè būn-toê,

Só͘-í tuì i thó chuí chi̍t poe;

Hū-jîn kóng lín goán bô óng-lâi,

Siáⁿ-sū tuì goá thoch2ui ê tāi;

Chú kóng nā lūn Siōng-tè ê un,

Chiū bô hun lín goán lóng ū hūn.

3.Hū-jîn bô bêng chit ê ì-gī,

Chiū ēng choē-choē oē lâi mn̄g i;

Lō͘-bé sìn I sī sian-ti lâng,

Chiah mn̄g kèng-pài Siōng-tè chit hāng;

Chú kóng Siōng-tè chiū-sī chin Sîn,

Sêng-si̍t pài I bián ēng chîⁿ-gîn;

Koh mn̄g lí sī Bí-sài-a mah,

ìn kóng chiàu lí ê oē sī lah.

4.Ha̍k-seng boé mi̍h lâi tuì chhī-koe,

Khoàⁿ-kìⁿ Chú teh kap i kóng-oē,

Sīm-koaⁿ hoán-tńg siⁿ-khí giâu-gî,

Choân-jiân m̄-chai Chú ài kiù i;

Hū-jîn liâm-piⁿ ji̍p siâⁿ pò-iông,

Chèng-lâng thiaⁿ i kóng hoaⁿ-hí chiông;

Tāi-ke jīn I chin sī Ki-tok,

Sìn I chèng-lâng ún ji̍p thian-kok.