Iâ-so͘ Siū-chhì

1932.10  tē 571 koàn, Koà-chhài-chí 81 hō, p.26

（Tiāu ēng "Save by grace," chok- khek-chiá Geo, c Stebbins.）

1.Sèng Sîn chhoā Iâ-so͘ kàu khòng-iá,

Tī-hia sì-cha̍p mî-ji̍t kìm-chia̍h;

Mô͘-kuí lâi chhì Siōng-tè Sèng-kiáⁿ,

Kiò I ēng chio̍h-thâu pìⁿ choè piáⁿ;

Iâ-so͘ ìn kóng, lâng ê oa̍h-miā,

M̄-nā oá-khò chit khoán ê piáⁿ;

Chí-khò Siōng-tè só͘ chhut ê oē,

Siōng-tè í-goā bô lâng oē choè.

2.Tē-jī pái, Mô͘-kuí koh chìn-chêng,

Chhoā Chú kàu Sèng-siâⁿ ê tiān-téng;

Kóng I nā-sī Siōng-tè ê Kiáⁿ,

Tuì tiān-téng tiô-lo̍h iā bián-kiaⁿ;

Iâ-so͘ ìn kóng, bo̍h-tit chhì Chú,

In-uī Sèng-keng ū kì chi̍t kù;

Mô͘-kuí ū sî oē ín Sèng-keng,

Chú ín-khí pa̍t-chat lâi tek-sèng.

3.Tē-saⁿ pái, Mô͘-kuí hián chhiú-toāⁿ,

Chhoā Iâ-so͘ kàu ke̍k-koân ê soaⁿ;

ēng ta̍k kok êng-hoâ lâi ín-iú,

Kóng nā pài goá chiū kau Lí chhiú;

Iâ-so͘ ìn kóng, Sat-tàn thè-khì,

Lūn Chú Siōng-tè lí tio̍h pài I;

Mô͘-kuí iú-he̍k lóng bô sêng-kong,

Jiân-āu thiⁿ-sài chiū lâi kèng-hōng.

4.Siōng-tè ê Kiáⁿ Iâ-so͘ Ki-tok,

Mô͘-kuí chin ài I hoān choē-ok;

Hô-hòng sìn ê lâng tī kim-sè,

Eng-kai thê-hông in ê khuí-kè;

Iâ-so͘ í-keng khah-iâⁿ Mô͘-kuí,

Lán oá-khò I chiū bián kiaⁿ-uì;

Tāi-ke nā kì-tit chit chân sū,

Kap Mô͘-kuí kau-chiàn chiū bián-su.