Lōng-chú Hoê-ka

T. O. CHISHOLM, GEO. C. STEBBINS

1933.08 tē 581 koàn, Koà-chhài-chí 91 hō p.25

(Chiong Ông-iû e̍k)

1. Goá tiàm tī khòng-iá hong-po͘ só͘-chāi,

Hòng-tōng khùn-khó͘, to-sò͘-nî í-lâi,

Siông siū iau-gō kap kiaⁿ-hiâⁿ só͘ pek,

Tio̍h tńg-lâi chit sî-khek,

Iu-būn só͘ kiâⁿ kha-pō͘ bô kín-sīn,

In-uī beh koh kìⁿ Sèng Pē ê bīn,

Eng-kai jīn-hūn chhú lô͘-po̍k ê uī,

Koat-sim khí-sin hoê-kui.

Hô. Tio̍h tńg lâi Thiⁿ Pē ê ke,

Tio̍h tńg lâi Thiⁿ Pē ê ke,

Koat-sim khí-sin hoê kui,

Goá chai I ū toā un-huī.

2.Siáⁿ-sū gō-sí tī sit-bāng tē-hng,

Bô lâng khó-lîn káⁿ kūn-oá lâi mn̄g,

Goá Pē ê ke, ū bí-niû chin-chē,

Taⁿ tio̍h khí-sin hoê-ke,

Chhim-chhim hoán-hoé chêng só͘ kiâⁿ put-sī,

Boē kham koh chheng-choè I ê kiáⁿ-jî,

ún-tàng Thiⁿ Pē bô ài goá lī-khui,

Koat-sim khí-sin hoê-kui.

3.Hó ê kì-ek goá hut-jiân siūⁿ-khí,

Chiū-sī chai Thiⁿ Pē ū toā chû-pi,

Koh bîn-bāng goán chhù ná tī ba̍k-chêng,

Cháu kàu hit uī an-lêng,

Khoàⁿ-kìⁿ hoán-hoé ê lâng ū kàu-uī,

In siū sià-choē tit pe̍h-saⁿ un-huī,

Goá thái koh iân-chhiân liông-sim m̄ khui,

Koat-sim khí-sin hoê-kui.

4.Taⁿ goá lóng bô koh tú-tio̍h bê-lō͘,

In-uī tit-tio̍h oa̍h-miā ê Chú chio-ho͘,

Só͘ ū tîⁿ-poàⁿ ê mi̍h goá pàng-lī,

Kín-kín khí-lâi chhē I,

Sui-jiân ū lī-khui I ngó͘-ge̍k I,

Ū siaⁿ kiò kóng, Pē iáu-kú thiàⁿ lí,

Goá m̄-thang tiû-tû hō͘ I koh chhui,

Koat-sim khí-sin hoê-kui.

(Goá só͘ choè ií-ki̍p só͘ hoan-e̍k ê , ū pah-goā siú, lūn si-tiāu, chin khó-sioh boē-oē lóng pò hō͘ lia̍t-uī chai, chhin-chhiūⁿ téng-bīn chit siú, sī tuì ALEXANDER'S HYMNS No. 3 ê tiong-kan hoan-e̍k, ū-ê sī tuì pa̍t-pún, in-uī kiaⁿ-liáu chin tìn Kàu-hoē Kong-pò ê choá-bīn, iā oh-tit chai, só͘-í bô siá, iā ū kuí-nā siú ìn-liáu bô tú-hó, la̍k jī, á- sī kiám chi̍t choā, thèng-hāu pa̍t ji̍t chiah teng-chèng).