Thoân-tō Koa

1933.08  tē 581 koàn, Koà-chhài-chí 91 hō, p.27

(Koa Î-su)

1.Chhiáⁿ mn̄g khoàⁿ Pò ê hiaⁿ-chí,

Lán lâi keng-êng it kong-si,

Bô lī si̍h-pún ê seng-lí,

Bo̍k-tek m̄-sī siūⁿ thàn-chîⁿ.

2. Koe-thâu hāng-bé kà lâng jī,

Jī-bú chi̍t-pún nn̄g sián-chîⁿ,

Lâng oē to̍k-si̍p bián sian-siⁿ,

Lō͘-piⁿ ha̍k-hāu bián khai chîⁿ.

3.Khí-thâu chhì-khoàⁿ nn̄g saⁿ jī,

Í-āu chiām-chiām ná ke-thiⁿ,

Muí-ji̍t bián-kióng gō͘ hun sî,

Chi̍t ge̍h í-lāi ún bat jī.

4.ia̍h sī Ji̍t, Tâi, kiōng-thong jī,

Bián ēng khó͘-sim kiūⁿ peh-nì,

Thit-thô liām koa soà bat jī,

Tai-heng o͘-mo͘-si-lo͘-i (Kok-gú).

Chin-chiàⁿ sim-sek koh chin kî.

5.Iâ-so͘ kiò lán tio̍h choè teng,

Lán ê teng-hé tio̍h siu-chéng,

Lán ê teng-hé nā kng-bêng,

Chèng-lâng hoaⁿ-hí lâi hoan-gêng.

6.Iâ-so͘ kóng lán chiū-sī siâⁿ,

Eng-kai tio̍h ū hó miâ-siaⁿ,

Lán tio̍h chhin-chhiūⁿ chiò sin kiàⁿ,

Chèng-lâng oē siūⁿ kiàⁿ-lāi-iáⁿ

7.Khí siâⁿ it-hó tī soaⁿ-téng,

Tang-sai lâm-pak khoàⁿ chin bêng,

Chèng-lâng ài kūn khoài chìn-chêng,

Goān lán giân-hēng tio̍h toan-chèng.

8.Iâ-so͘ kóng lán chiū-sī iâm,

Hî, bah, bô iâm chhàu-hiam-hiam,

Si̍t-chāi jîn-luī toā khiàm iâm,

Goān lán tāi-ke tàu chham kiâm.

9.Lán lâng sim-sèng ná hî, bah,

Nā ū chham-iâm lóng oē ha̍h,

Bô lūn loā hó ê hî, bah,

Sit iâm hiat-tiu chèng-lâng ta̍h.

10. Iâ-so͘ chin-lí phì-jū iâm,

Sè-kài bān-bîn lóng ū khiàm,

Lí goá m̄-thang kek tiām-tiām,

Lán tio̍h chhin-chhiūⁿ chí-lâm-chiam.

11.Pò lâng chiong-lâi ê guî-hiám,

Khò Chú kong-lô thang tô-siám,

Siúⁿ-sù thian-tông éng-oán tiàm,

Sèng-keng só͘ kóng lóng èng-giām.

12.Iâ-so͘ kóng lán chiū-sī kng,

Lán kng m̄-sī beh siu-khǹg,

Lán kng tio̍h chiò kàu chin hn̄g,

Sī beh chhiō lâng ji̍p thiⁿ-mn̂g.

13.Iâ-so͘ chin-lí chiū-sī kng,

Lí goá sêng-siū m̄-thang khǹg,

Lán tio̍h chhut-la̍t thoân chin hn̄g,

Hō͘ lán Kiù-chú toā èng-kng.