Chheng-chàn Kiù-chú It-seng ê Koa

1947.03 Tē 699 kî p.6

(Pîng-tong: Chiu Thian-lâi)

Key=Dd 4/4

1. Goá sim só͘ bāng ê Kiù-chú

Í-keng lîm-kàu sè-kan;

èng-giām sian-ti só͘ chhàm-gú,

Goá sim ún-tit pêng-an:

Tang-hng só͘ khoàⁿ ê kng-chhiⁿ,

Pò goán chai Chú chhut-sì,

Taⁿ chiong só͘ ū hiàn hō͘ I,

Piáu-bêng kám-siā, hoaⁿ-hí.

2. Chú, Lí uī goán ê choē-koà,

Saⁿ-cha̍p-saⁿ nî ê kú,

Bô hiâm kan-khó͘ kap tio̍h-boâ,

Hō͘ goán chiâⁿ-choè pù-ū:

Chú, Lí thoè goán lâi siū-sí,

Sìn Lí thang tit éng-oa̍h,

Kú-tn̂g tiàm tian-kok khiā-khí,

O-ló Chú, lóng bô soah.

3. Chú, Lí koh-oa̍h beh cháiⁿ-iūⁿ,

Hit-sî hoan-hù ha̍k-seng,

Pò-iông kiù-sè ê chin-lí,

Lóng kì-chài tī Sèng-keng:

Koh lí siông-siông kap goán tiàm,

Kàu sè-kan ê boa̍t-ji̍t,

Goán chiong che sū choè kì-liām,

Kám-siā Chú, sim só͘ goān. (A-men)

Hù kì: Chit siú Si sī kì-liām Kiù-chú kàng-seng 1947 nî, beh ngiā-chih sin-nî, ài lán sūn-soà ngiâ-chih Chú chiah lâi chò--ê. Chit ê tiāu sī tuì Ji̍t-pún Ki-tok kàu-hoē ê im-ga̍k-ka, Tin-chhoan Chú-it Sian-siⁿ só͘ phian ê Chú-ji̍t-o̍h. Iù-tī-hn̂g Sèng-khek-chi̍p (津川主一先生編，主日學，幼稚園聖曲集) hit tiong-kan ê chi̍t khek chhái-chhú--ê. Chóng-sī pit-chiá hiān-sî bô ū hit pún chheh. Lâng nā ēng kiong-kèng, kám-siā ê thài-tō͘, bô séng-lio̍k, tiah chat, 3 chat lóng gîm, chiah oē thang sió-khoá piáu-hiān Ki-tok it-seng ê chêng-kéng tī lán ê ba̍k-chêng kap sim-lāi, che sī pit-chiá só͘ hi-bōng kap pài-thok.