Bô thang pí ê hó pêng-iú
(Iok-hān 15:13)
1956 nî 8 goe̍h p.25
1. Lán tāi-ke m̄-sī bô pêng-iú,
Thang saⁿ-kap kau-poê khoài-lo̍k
Bô thang pí ê chì-hó pêng-iú
Chí-ū Chú Iâ-so͘ Ki-tok
Sui sī tông-pau kut-jio̍k ê chhin
iā m̄-ta̍t Siōng-tè Sèng Kiáⁿ
Sím-mi̍h lâng bat uī goá choē-jîn
Lâi pàng-sak I ê sìⁿ-miā
2. Tiàm sè-kan sī choē-jîn pêng-iú
Hoaⁿ-hì hō͘ in lâi chhin-kūn
Sī êng-kng ê toā Jîn-kun
Goá sī pi-bî ù-oè ê lâng
Chú pó-huih soé-chheng choē-ok
Si-un tháu-pàng, sù goá ǹg-bāng
Thang sêng-chiap Siōng-tè ê kok
3. Sui-jiân sêng-siū Chú ê kiù-un
Sim boē hiáu-ngō͘ Chú ê thiàⁿ
Lī-khui chiàⁿ-lō͘, sim-ba̍k hūn-tūn
Bô êng-kng Chú ê sèng miâ
Chhin-chhiūⁿ án-ni, oai-chhoa̍h nńg-chiáⁿ
Chú iáu-kú lîn-bín, hû-chhî
Eńg-oán bô pián, chiâu-chn̂g ê thiàⁿ
Chì-hó pêng-iú chiū-sī Lí
A-men.
Hū-kì: Chhut-miâ ê Sèng-si chok-chiá John Newton (1725-1807) Bo̍k-su só͘ chò ê. Chheng siàu-liân ê hiaⁿ-ché nā ài gîm chit siú si, ún-tàng ē tit-tio̍h lêng-sèng-siōng hó͘ ê chō-chiū. Koh chi̍t pài hoàn-khí in ê sìn-gióng, kap Ki-tok ū chhin-bi̍t ê lêng-kau, chiah ē thang tit-tio̍h sìn-gióng tông-chì ê hó-pêng-iú lâi saⁿ-kap ho̍k-sāi Ki-tok, koh ē thang kiò-chhíⁿ hiah ê bô sìn-gióng ê tâng-phoāⁿ lâi hoán-hoé sìn Iâ-so͘.
Chhiáⁿ ēng ji̍t-pún ê Chàn-bí-koa 343 siú (1931-1954 nî pán) ê tiāu lâi gîm.
