Sèng-keng Kì-liām-ji̍t hù-si

Sìn-tô͘ ê seng-oa̍h kap Sèng-keng

(II Thê-mô͘-thài 3:15-17)

1958.12 tē 840 hō p.6

(Chiu Thian-lâi chok).

1. Siōng-tè un-tián thiàⁿ-thàng, kong-gī,

Tì-huī, koân-lêng, ke̍k toā bô pí;

Chiâu-pī kì-chài, tī I Sèng-keng,

Lán nā khûn tha̍k, chiū oē hun-bêng.

2. Sèng-keng chí-sī éng-oa̍h ê lō͘,

Kà lâng jīn-bat Kiù chú Iâ-so͘;

Kèng-uì Siōng-tè, kap I hô-hó,

Che-iūⁿ tì-huī, bô kè ê pó.

3. Pē-bú kà-sī, tok-chek soè-kiáⁿ,

Chiàu che Sèng-keng, chiū oē sì-chiàⁿ;

Siōng-tè tō-lí, chûn tī sim-lāi,

Thoat-lī choē ok, siám-pī chai-hāi.

4. Kàu-io̍k ki-chhó͘, chāi-tī Sèng-keng,

Kiâⁿ che tō-lō͘ jîn-seng kng-bêng;

Tit-tio̍h sêng-kong, sū-sū heng-thong,

Chú ê sèng-miâ, hō͘ lâng chun-chông.

5. Chû-siān sū-gia̍p, kun-kù Sèng-keng,

Chín-kiù lêng-hûn, jio̍k-thé pīⁿ-chèng;

Siōng-tè ê oē, oa̍h-miā hong-hù,

Sìn che hok-im, choē-jîn kui Chú.

6. Sìn-tô͘ seng-oa̍h, ji̍t-ji̍t tek-sèng,

Sî-siông kî-tó, cha-khó Sèng-keng;

Chun siú kài-bēng, m̄-káⁿ uî-poē,

Siōng-tè ê oē, éng-oán boē hoè.

A-men.