Kap Chú tâng sí, tâng oa̍h

-(Ka-lia̍p-thài 2:20)-

1959.02 tē 842 hō p.25

(Chiu Thian-lâi chok)

1. Kám-siā Siōng-tè, un-tián thiàⁿ-thàng,

Siúⁿ-sù Sèng Kiáⁿ, thoè lán siū sí;

Kìⁿ-nā chiap-la̍p, sìn I ê lâng,

Chiū thang chiâⁿ-choè Siōng-tè kiáⁿ-jî.

2. Kiù-chú Iâ-so͘, oân-choân bô choē,

Tam-tng goá choē, siū tèng si̍p-kè;

Lán tio̍h khiam-pi, sêng-si̍t hoán-hoé,

Chiah thang chiū-kūn, Thiⁿ-pē Siōng-tè.

3. Sìn Chú ê lâng, só͘ tio̍h keng-giām,

Chiū-sī kap Chú, tâng-sí, tâng-oa̍h;

Pó-poè chin-lí, ta̍t-tit siàu-liām,

Kian-kò͘ sìn-sim, bián-tì iô-choah.

4. Goá ê choē-sin, í-keng lóng sí,

M̄-chún choē-ok, kau-tîⁿ bô soah;

Goá-taⁿ teh oa̍h, m̄-sī ka-kī,

Chú tiàm tī goá lāi-bīn teh oa̍h

5. Goān Chú thiàⁿ-thàng, chhui-pek goá sim,

Chān goá it-seng, kap Lí kiat-liân;

Pò-iông kiù-sè, chin-lí, hok-im,

Hō͘ lâng tit Chú ke̍k-toā un-tián.

A-men.

◎Hū-kì: - Chhiáⁿ ēng Sèng-si 159 siú ê B tiāu lâi gîm, chiū oē hô; á-sī beh lēng-goā koh choè sin-tiāu iā hó.