Tiong-khok lâm-lú chheng-liân ê hun-in

1950.03 tē 735 hō p.15

(Chháu-tun: Loā Kang)

1. Sìn-tô͘ chò chhin oh tú-hó,

In-uī thâu-náu ū khah hó;

Lâm-chú beh chhoā iū chhoā bô,

Lú-chú beh kè bē tú hó.

2. Sìn-tô͘ ta̍k hāng khah kng thang,

Khah bô sìn-iōng tī moâi-lâng;

Pí lán khah hó chiah beh pàng,

Bô siūⁿ lán sī siáⁿ téng lâng.

3. Lâm-chú bô teh ka-tī phêng,

Chhoā beh ko-téng lú-ha̍k-seng;

Lú-chú bô siūⁿ sím-mi̍h téng,

Kè boeh phok-sū á i-seng.

4. Lâng kóng lâm-chú m̄ jīn gōng,

Chit kù sio̍k-gú to ū thong;

Beh chhoā chhian-kim bô tàng chông,

Beh chhoā sian lú bô tàng bong.

5. iū kóng lú-chú m̄ jīn bái,

Chit kù ê oē iā si̍t-chāi;

Chò chhin m̄ sī bô tāi-khài,

Gō͘ liáu chheng-chhun ti̍t-ti̍t lâi.

6. Lú-chú chò-kheh kàu jī-jī,

Hit chūn kiû-hun moá-moá sī,

Kéng bô chi̍t ê i kah ì,

āu-lâi kiû hun ē thêng chí.

7. Jī-sì jī-gō͘ nā boē kè,

Siong-tong beh chhoā chiū khah the;

Sàn-hiong beh chò i bô beh,

Nî-hoè chi̍t-nî chi̍t-nî ke.

(Boē-oân) [sic.後期並無看著接紲]