Chiok Tâi-tang Kàu-hoē Hiàn-tn̂g-sek Khèng-chiok-koa
1950.12 tē 744 hō p.10
(Tang O͘-goân)
1. Chho͘-tāi lé tn̂g sī kū-sek,
Tiōng-gī Tiúⁿ-ló ū chin-he̍k,
Chek châi tī thiⁿ Chú hoaⁿ-hí,
I miâ kham chheng Lí Tiōng-gī.
2. Lé-tn̂g chá-sî siok Lâm-pō͘,
Tiōng-gī Tiúⁿ-ló teh oān-chō;
Kòng-hiàn lé-tn̂g sui kū-sek,
Tuì Chú hong-hiàn ū chīn-le̍k.
3. It-tāi bo̍k-chiá Si Khoan-hông,
Tuì Chú sit-chāi toā iú-kong;
Hēng-tit sī i it phek-le̍k,
Lé-tn̂g chiah oē kín ta̍t-sêng.
4. Jī tāi bo̍k-chiá Tēⁿ èng-heng;
uī Chú chhut-la̍t ti̍t iā chéng;
Pò͘-iā chéng-chí tī puî-tē,
Chhut-se̍k lé-pài ū chéng-chê.
5. Saⁿ tāi bo̍k-chià Hâu Liân-ô͘,
Hit-sî kàu-hoē ū chìn-pō͘;
Khó-sioh sin-thé ū sū-kò͘,
Put-tek-í chiū tńg Se-pō͘.
6. Sì tāi bo̍k-chiá Ko Toan-hong,
Chit lâng uī Chú chin cháu-chông;
Giâ Chú Si̍p-kè gâu kian-jím,
Piàⁿ miā uī Chú thoân hok-im.
7. Gō͘ tāi bo̍k-chiá Lîm Chài-thiam,
Liāu-lí kàu-hoē ū chin-kiàn;
Kàu-hoē ki-kò͘ gâu siat-kè,
Tîn-lia̍t sū-hāng chin chéng-chê.
8. La̍k tāi bo̍k-chiá Lâu Iok-hān,
Chit lâng tī-hoē boē ham-bān,
Hoē-lāi hoē-goā chin khóng-kau,
Piàⁿ kàu hoeh-koāⁿ it-ti̍t lâu.
9. Chhit tāi bo̍k-chiá Tân Suī-san,
Tō-lí jīm thoân to boē lán;
Chhong-bêng joē-tì, gâu káng-ián,
Thèng-chiòng jīm thiaⁿ to boē siān.
10. Po̍k kek sî-tāi nāu-chhai-chhai,
Chhut-se̍k lé-pài chió lâng lâi;
Hoē-iú toā-poàⁿ khì so͘-khai,
Bo̍k-su sin-hōng bô thang lâi.
11. Suī-san Bo̍k-su gâu thun-lún,
Tuì Chú só͘ kiû lóng èng-ún;
Po̍k-kek sî-tāi sui hiám-ok,
Khò Chú chiū tit toā kong-ho̍k.
12. Chú ū un-tián toā chû-pi,
Hō͘ lán an-jiân nî kè nî;
Kám-kak lé-tn̂g chin e̍h-sè,
Hoē-chiòng kuī-lo̍h kiû Thiⁿ-pē.
13. Thiⁿ-pē àⁿ-lo̍h khoàⁿ khiân-sêng,
Siúⁿ-sù lé-tn̂g chiah toā keng;
Thé-chhâi chòng-giâm kiam sok-chēng,
Lāi-goā kóng-khoah chin ha̍p-ēng.
14. Kam8-kak hoē-iú chin chhut-la̍t,
Muí chiu lé-tn̂g chē cha̍t-cha̍t,
Khèng-chiok lé-tn̂g hiàn-tn̂g-sek,
Gióng-bōng chhú-hō͘ khah chīn-le̍k.
15. Lé-tn̂g sū-si̍t ū hó-sè,
Bô sî bô khek hōng Siōng-tè;
Ta̍k ji̍t kî-tó lâi tī chia,
Goān lán tâng-chhiùⁿ Ha-le-lu-ia.
(Tang O͘-goân khèng-chiok)
