Tiong Tiong S. S. kàu-oân Lêng-siu-hoē

1952.09 tē 765 hō p.23

Chhit goe̍h 22-25, chū-chi̍p tī Tâi-tiong Liú-goân lé-pài-tn̂g.

--------

Chit phiⁿ sī Lâm Tiong Chú-ji̍t-o̍h kàu-oân Lêng siu-hoē ê sî, Káng-su Chhoà Phòng Sian-seⁿ só͘ káng-gī ê goân-kó. I chò Chú ê kang sī tē 30 nî, hiān-sî tī Sin-chhī kàu-hoē. I hong-hù ê keng-giām thang tuì i ê bûn hō͘ lán khoàⁿ-chhut. ǹg-bāng ē chò lán ê lī-ek.

Kóng-oē-hoat

1. Lâm Tiong kàu-oân Siu-ióng-hoē,

Tuì thâu chiàu sǹg chin-chē hoê;

Chit pái koh-chài tit khai-chhui,

Lâi hù tâng-kang tuì ta̍k uī.

2. Hoaⁿ hí thiⁿ-khì ū khoe-ho̍k,

Hō͘ lán chhut-ji̍p hó kang-chok:

Ē tit chiah-nih hó kai-chài,

Kám-siā Thiⁿ-pē só͘ an-pâi.

3. Káng-su khún-chhiat lâi káng-gī,

Kù-kù ū la̍t hó ì-bī;

Thèng-chiòng jia̍t-sim chin tì-ì,

Ke-thiⁿ lêng-siu kap oa̍h-khì.

4. Phí-jîn siū phài bēng-lēng,

Chí-tēng tio̍h kóng chi̍t tiám cheng;

Kì-jiân siū-tio̍h chin hó ì,

M̄-káⁿ chài-saⁿ lâi the sî.

5. Tê-ba̍k chiū-sī kóng-oē-hoat,

Kî-si̍t kháu-châi chin ló͘-choat;

Taⁿ kóng sī beh kóng án-choáⁿ,

ài chiàu chhù-sū hun kuí toāⁿ.

6. Lūn oē piáu-pe̍k sim só͘ siūⁿ,

Hō͘ lâng chai lí ê chú-tiuⁿ;

Ti chia só͘ kóng ê soat-oā,

Sī chí káng-tō kiù éng-oa̍h.

7. Káng-tō sī chí kóng hok-im,

Kiù-chú kiù lâng ê thiàⁿ-sim;

Chióng-luī ū tê-ba̍k, kái-sek,

Í-ki̍p tē-chí kap keng-le̍k.

8. Ha̍p sî chiàu khoàⁿ lâi soán-te̍k,

Kóng-chhut hō͘ lâng chin iú-ek;

Beh kóng it-tēng bo̍h loān lām,

Toan-toan tiah tiah ài hun chām.

9. Kî-tiong só͘ hun ê phiau-chún,

Thâu-sū, pún-lūn kap kiat-lūn;

Teh kóng tio̍h kóng chin chhián-hiān,

Hō͘ thiaⁿ kám-kak tī gán-chiân.

10.Ū sî iā thang ēng tô͘ khoàⁿ,

Chhiok-bo̍k khoài kì tī sim-koaⁿ;

Só͘ kóng nā-sī chin chhim-tîm,

Teh thiaⁿ chin-chiàⁿ oh chù-sim.

11.Kì-tit chāi-chá Sòng Bo̍k-su,

Tuì goán ū bat kóng chi̍t-kù,

Muí pái beh kóng só͘ pī-pān,

Tio̍h ài thé-thiap siāng ham-bān.

(Thāi-sio̍k).