Kóng-oē hoat

1952.10 766 hō p.23

(Chiap 9 goe̍h 23 bīn)

12. Oh bêng ê oē tio̍h ài san,

Soat-oā chiū boē kám khùn-lân;

Hō͘ lâng ē tit khoài bêng-pe̍k,

Só͘ kóng chiah ū ta̍t bo̍k-tek.

13. Beh kóng tio̍h ài chin chún-pī,

M̄-thang chhìn-chhái kóng bī-sī;

Sian-siⁿ nā bô chū-sìn la̍t,

Thái ē hō͘ thiaⁿ ē thong-ta̍t.

14. Ka-kī bô ū kám chhù-bī,

Teh thiaⁿ oh bêng-liâu ì-gī;

Kóng kàu hō͘ lâng siū kám-kek,

Pún sī khò Chú ê lêng-le̍k.

15. Chū-kí tio̍h ēng chīn só͘ ē,

Tio̍h cháiⁿ-iūⁿ chiàu ē té;

Soat-oā tio̍h ài chin oa̍h-tāng,

Teh thiaⁿ chù-sîn sim bē bâng.

16. Teh kóng tio̍h ēng chin chhiat-si̍t,

Teh thiaⁿ chiū ē chi̍t soà chi̍t;

Soat-oā tio̍h ài chin hun-bêng,

M̄-bián têng liáu koh-chài têng.

17. Kóng liáu nā bô lám bô ne,

Pit tēng hō͘ thiaⁿ tuh-ka-chē;

Kóng-oē siaⁿ-im koh chi̍t toāⁿ,

Tio̍h toè káng-gī lâi piàn-oāⁿ.

18. Hí, nō͘, ai, khū, ài, o͘nn3, io̍k,

Chhit-chêng ê siaⁿ bô hut-lio̍k;

Ai-siong ê sim, siaⁿ iu-chhiû,

Jîn-ài ê sim, siaⁿ un-jîn.

19. Siū-khì hoat-chhut siaⁿ chân-khok,

Hoaⁿ-hí ê sim siaⁿ khoài-lo̍k;

Kiau-ngō͘ ê siaⁿ chho͘ pê-pê,

Kiû lâng ê siaⁿ chin jiû sè.

20. Im-tō͘ iā sī ū khin-tāng,

Koân, kē tio̍h hun bô saⁿ-tâng;

Chiàu khoàⁿ thèng-chiòng ê chē-chió,

Í-ki̍p káng-tn̂g toā sió.

21. M̄-thang koân kàu ná hoah-hiu,

Kē chiū kē kàu bô boé-liu;

Koân, kē, khin, tāng tio̍h tú-hó,

Chiah ē tit-tio̍h hó kiat-kó.

22. Kóng ê kín, bān iā iàu-kín,

Siuⁿ kín, siuⁿ bān tio̍h kín-sīn;

Nā beh heng-hùn lâng só͘ thiaⁿ,

Chiām-chiām ke sok-le̍k ê siaⁿ.

23. ài hō͘ thiaⁿ bêng-pe̍k ì-gī,

Teh kóng ê siaⁿ, choán chhî-chhî;

Teh kóng ēng hut-jiân thêng-thùn [sic.],

Hoàn-khí chù-tiōng só͘ káng-lūn.

24. Ū sî tio̍h ài kā in mn̄g ,

Chiah hō͘ ha̍k-seng boē ài sńg;

Nā lí pîⁿ-ti̍t kóng bī-sī,

Siⁿ-khí ià-siān ē hah-hì.

25. Chá ū goā-kok ê sian-siⁿ,

Gâu kóng chit ê Tiong-kok-gú;

Kóng liáu kip-sok ti̍t-ti̍t khì,

Hō͘ lâng m̄-chai kóng sím-mi̍h.

26. Khó-pí chia̍h san-tin hái-bī,

Kàu chhuì chi̍t ē thun lo̍h-khì;

M̄-nā bô kám hó chu-bī,

Liân sng á tiⁿ iā put-ti.

(Thāi-sio̍k).