Kóng-oē-hoat

1952.11 767 hō p.21-22

(Chiap 10 goe̍h 23 bīn)

27. Só͘-í kín, bān tio̍h tiâu-hô,

Chi̍t jī, chi̍t kù, tio̍h chheng-chhó;

Ū sî tio̍h ēng àm-sī hoat,

ia̍h [iā] sī soat-oā put-khó khoat.

28. Bô chiong kò͘-sū ê kà-sī,

Bêng-bêng kóng-chhut lāi thê-khí;

Ka-tī khì siūⁿ lâi liáu-kái,

Kàu-hùn chū-jiân tit-tio̍h chai.

29. Soat-oā pit-tēng tio̍h chai-iáⁿ,

Kì-tit hun-piat kok-iūⁿ siaⁿ,

Boh3-tit ná hoê-siūⁿ liām keng,

Sè-sè-á siaⁿ thiaⁿ bē bêng.

30. Chhiú-sè iā ū thang pang-chān,

Hùn-khí cheng-sîn boē ià-lán;

Lūn kàu tō-māu kap bīn-iông,

Káⁿ kóng iā chin koan-tiōng.

31. Chú thiàⁿ hián-chhut bīn-iông siōng,

Lâng chiū kèng-ho̍k kap sūn-chiông;

Soat-oā tiong-sit ū chún-pī,

Só͘ kóng chiū ē khah chiàu sî.

32. Ū ha̍h loē-iông ê chong-chí,

Thiaⁿ-siū kám-kak ū chu-bī;

Siat-sú nā sī bô pī-pān,

Só͘ kóng ê oē bô chè-hān.

33. Ná kóng ná tn̂g ná chiap-soà,

Kóng kàu cha̍p-saⁿ thiⁿ-tē goā,

Chú-iàu kà-sī lóng thoat-soàⁿ,

Kang-chok kui tī khang tio̍h-boâ.

34. Ū sî khó-í koh piàn-thong,

Ē thang the̍h si̍t-mi̍h lâi kóng;

Thiaⁿ ê lâng khoài tit liû-sim,

Chān in tit-tio̍h ìn-siōng chhim.

35. iàu-kiāⁿ lūn-khí chē-chē khoán,

Suî-ki èng-piàn ēng oán-choán;

Khuî-la̍t oá-khò Chú ê un,

Chò kang tio̍h chiàu lán pún-hūn.

36. Put-châi só͘ kóng sī tām-po̍h,

Chhim bāng ē tit chò chham-khó;

Kèng-ì sūn-soà saⁿ bián-lē,

Kàu-oân tio̍h ài tiōng jîn-keh.

37. Ē kóng tio̍h ū hó só͘ kiâⁿ,

Lí ê kang chiah ū oa̍h-miā;

Kóng kiâⁿ kó chin ū it-tì,

Ha̍k-seng chun-chiàu lí kà-sī.

38. Lán siū Siōng-chú sù un-huī,

Tam-jīm kàu-oân chin chun-kuì;

Kiû Chú chān lán gâu chò kang,

Chú-ji̍t-o̍h ta̍k keng oa̍h-tāng.