首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 我所尊敬數念的師友
我所尊敬數念的師友
卷期：第915期 本次： 日期：1963/8 刊名：台灣教會公報 頁數：8
篇名：我所尊敬數念的師友 [ GOÁ SÓ͘ CHUN-KÈNG SIÀU-LIĀM Ê SU-IÚ ]
作者：戴榮旋 Tè En̂g-soân
  顯示 : 漢羅 全羅 並列  

我所尊敬數念的師友

戴榮旋

 

得著李主筆的好意幾若擺叫我寫我所捌蹛的教會，會通做模範--的8人，來予大家相數念。若是我不止袂曉鑑定人，閣筆也真鈍，袂曉寫，真見笑。但是ta̍uh-ta̍uh受催討，不得不寫幾字來做參考，大家相數念。但是若有無拄好的所在，請原諒。.

  1.  後山有某長老，是我初任的某物教會有力的長老。日據時代捌當真濟公職。  彼時50外歲，常常來揣我坐，真疼我。我問伊講：咱的教會都遮久lah，thái會遮稀微？我看恁的聖民簿，真濟犯第7誡，開，禁，真濟，真可惜。好佳哉，長執攏無，真感謝上帝。但是我teh驚，毋知會古早人講：「官官相衛」抑袂？若大家照事實來講：紲無一个會堪得做長執抑袂？我就得做長執抑袂？我就將我所聽關係伊的事攏講出來。你是長老，應該著行頭前做模樣，若無悔改，牧師若來，的確對你先禁，紲免職。教會執行教規，是出佇好意，愛人悔改認罪。你若毋反悔，的確對你代先。伊聽了開聲大哭，誓約認罪悔改，果然一刀兩斷重新做人。所感激--的，若是別人，佇伊的勢力下，得失土地公，就飼無雞，的確袂通平安經過。若是伊歡喜接受，勇敢悔改，後來彼个教會的人共我講：真正悔改。實在夠額做咱的模範。伊的囝聽講teh做國校校長，對教會有熱心抑無，我毋知；若有，真恭喜；若無，向望緊反悔，來安慰佇天堂的父母的心。

  2.  故許河川長老。是恆春教會長老，真熱心致意教會的事，逐擺若風颱大雨過身，攏來教會內外巡視。伊開kám仔店，生理真好。有一擺我去，看見伊對櫃內提金，香，燭出來予人。有一koè伊來揣我，我直接佮伊講：你是長老，做按呢上帝無歡喜，袂榮光主。伊講：這是生理人kah貨，遮的小可物若予伊去共別人買，別物會紲去共別人買，我出力苦勸伊，是講：「家己毋愛莫予人，體貼伊心佮我同。」伊也反悔認罪，以後就無閣賣，做一个可取誠實的長老到一生。

以上這兩位予我規世人無袂記得。願主祝福in的後代，榮光主。

  3.  故陳新財長老。伊是地方一个望族，是一个歹性地的人。到反悔信主以後，雖然捌閣越性，別人苦勸伊較毋聽，若是傳教者，伊就真歡喜接受。因為真尊敬眾傳教者，伊的家ná準傳教師的旅社。 伊不止致意佇教會，出錢，出力，出工，攏歡喜。伊真致意佈道。伊的囝坤源醫生，是水上可取的長老。伊的孫兩个佇田中做執事，一个佇英國，代先做執事，最近做長老。也一个佇醫學院，一个大專畢業了欲讀神學院。伊的大查某囝配予虎尾張Teng-hián長老，做虎尾中學的教員。孫婿是南中的幹事劉瑞仁牧師；閣孫美玉小姐現在佇美國留學，孫仁雄佇台南神學院在學中。次女陳Bi̍t女士，是有名的助產士，鎮中的女界的領袖，就任調解委員到今仔日，也捌任執事久久。

願主充滿伊的囝孫，gâu疼教會，學伊的序大人，來榮光主。

  4.  故許定田長老。代先是社頭的長老，田中設了，伊就倚來扶持新設--的。代先真散，予人看輕，信主以後，閣較予人看毋起。若是不止熱心，四界佈道，果然有收成，所傳過的田中，Pó-táu（譯註：北斗），竹堂，溪洲，成功，集集已經攏有教會lah。人叫伊做「入教田仔，」真正通，真正榮譽。伊的大囝Thian-sióng長老，佇兩年前過身，二囝許天賜奉獻做牧師，娶著新婦是產婆，聽講驛場欲倩，月給60箍，閣天賜先生月給無夠40箍，定田叔聽著新婦有人欲倩，講：「按呢也會用得，若去食頭路，賜仔道理都免傳lah。」自按呢共時，予兩人去蹛教會。  Taⁿ 閣有孫仔Bûn-chiòng傳道師，現任岡山，其餘做事業。孫婿是七堵的魏Soat-hong長老。第二囝天賜牧師任北斗教會，孫文雄任溪洲牧師，孫婿紀德惠任土庫牧師，孫文賓做傳道，欲去美國深造，將來通貢獻佇全省。  查某囝許粉嫁予故紀Un先生，做豐原的長老久久，孫Chhong-huī也任職佇教會。孫紀Chhong-jîn去美國，德國留學真濟年lah。咱的教界不止期待伊轉來，會通大大貢獻。孫Chhong-siu也獻身予主，teh讀神學，向望攏會通追隨in的前人熱心佇教會。

  5.  故陳火宗長老。伊的老父九母叔，未信主以前是做桌頭，看佛字，畫符咒的人。信主以後，決心歸主，除去一切；真散赤的人。有一擺人攏去做工，厝紲予囡仔無細膩著火燒，燒到無半項。會友去探伊，有的提錢，有的提米，有的提衫褲。九母叔流目屎來叫多謝講：遮的衫褲我收，我真感謝，欲做也無錢，也袂赴，真多謝；若是錢請恁去獻佇教會。  米雖然燒去，但是蕃薯園裡猶有，所以米，請恁提倒去。無怨天，無怨人，無失志。火宗長老自細漢是這款訓練，無入學，只有對主日學，白話字來捌字，熱心教主日學，紲做校長，頭尾2, 30年，是一个疼主，疼，人，愛佈道，gâu引chhoā人的，有得中會教育部的獎品。禮拜日攏歇睏禮拜。和睦鄰里，內外好名聲。伊的子女真濟，也是學序大人teh服事教會。大囝Koan-jím當執事，逐禮拜去成功支會，來負責主日學，夠額做後來的人的模樣。

  6.  蕭國叔。  是全家信主，禮拜日攏是留一半的顧厝，其餘攏來禮拜。伊有兩个囝Thian-hō͘，Thian-hong也是按呢。教會的工，in若會做的，攏歡喜奉獻。起頭真散，近來不止有得主的恩典，內外攏真好名聲願伊的後裔，會學序大人的好模樣，榮光主。

  7.  吳乞長老。是我母會安順的長老，做人誠實，熱心，致意守聖日，是tok-lông-ka，現時8, 90歲，勇健。伊幾若个囝，攏真忠厚，可取。其中吳A-chû 現任歸仁的牧師。In的厝離安順較遠，來台南北門較近，猶過為著疼母會，無移轉，禮拜攏倒來。毋nā出力，也甘心奉獻，對內外好名聲。願主祝福老當益壯，益發gâu引chhoā囝孫來榮光主。

  8. 李照耀長老。是蹛新化的Phîⁿ-kiâu。日本時代是做司法警察，予人所呵咾。信主了後，閣較予人尊敬，辭職後，久久做司法大師。對教會熱心，出力，出錢，無毋倡首，好款待傳教者，做人忠直義氣。囝孫真濟，佇社會攏不止活動。大公子泰山也擔當新化的執事久久，現時兩个老人攏猶勇健。願主賜福in，ná鷹鳥復到少年，gâu跑走天路，會親像約書亞24：15，「論到我，以及我的家(囝孫)，阮決斷欲服事耶和華。」來得主的恩典，永遠佮in佇-teh。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461