首頁
Languages 台文｜中文｜日本語｜English 字體 小 ｜ 中 ｜ 大
首頁 / 白話字數位典藏 / 我所尊敬數念的師友
我所尊敬數念的師友
卷期：第916期 本次： 日期：1963/8 刊名：台灣教會公報 頁數：11
篇名：我所尊敬數念的師友 [ GOÁ SÓ͘ CHUN-KÈNG SIÀU-LIAM Ê SU-IÚ ]
作者：王占魁 Ông Chiàm-khoe
  顯示 : 漢羅 全羅 並列  

我所尊敬數念的師友

王占魁

  郭朝成牧師：論伊的傳記，伊有家己寫叫做傳道行程，出佇天橋，可惜我只有看一屑仔nā-tiāⁿ，所以袂得知伊的詳細，不過我是欲講我所知，所尊敬的nā-tiāⁿ。

  1.  伊是樂觀的人。

伊的樂觀是得救，赦罪，做上帝子女的樂觀；毋是世俗的享樂，kan-ta想食，穿，嫖，賭，飲的罪惡快樂。伊佇神學校，是比我早兩年( 1906-1910)，in彼年五名攏是優秀的，就是趙天慈，潘都7-êng，蕭Bûn-tek，李Bûn-遮n5，郭朝成，一人有一款的特色，有一款的性格，一款的信仰，所以伊的成功自然無同。郭牧師伊的信仰是單純，是純正的，是十字架的福音，做上帝的後嗣，對按呢伊是樂觀的人，罕得看著伊憂頭頭結面，毋捌悲觀，驚惶；不時笑gī-gī，真gâu講古；伊一生不偏，不黨。凡事感謝，凡事忍耐，吞忍。伊是和平的人。伊的面貌真漂亮，女子欣慕的是真濟，若有別人teh欣慕的，伊就讓人。所以是不鬥不爭的君子。伊家己和平，也予人和平。

  2.勉強家。

  佇學裡是碌碌過日的人，畢業了，對漢文大進步，常常投稿，彰化的崇文社常常入賞，也捌得著一等，因為伊的文清，理徹。俗語講：「娶某冊毋讀，嫁尪跤毋縛，」所以濟濟人，讀冊是teh為著試驗，為著畢業證書，若畢業了，所讀的就還學校。若是郭牧師是畢業了才奮發勉強，佇傳教者中，伊的學問是算有著。

  3.是經濟學者。

  祖產有淡薄遺產，伊攏予伊的小弟，畢業了帶教會，只有夫婦兩人，毋nā伊無帶金錢，伊的夫人也無妝奩。當時一月日傳道本身領8箍，婦人人3箍。有人婦人人死，教士會就共扣，（彼時是教士teh發薪津，講好笑，講傳道死某，教士會也teh扣，其實是扣三箍)，後來又人講：死某都teh悽慘，閣共扣三箍是無情，後來就無扣，閣後來講婦人人領薪水無通，才廢止，一个起碼算11箍，有某無某攏相像，加一个囡仔，一月日加1.50。照算，若5个囡仔，共領18.50；佇少囝的時，郭牧師粒積400箍借好朋友，30年久，無母無內，後來猶原有還400箍，對我念講當時借伊400箍，是糴得六千斤粟，還的時糴無兩升米 (借佮還)，我毋在年kō，若照我的記憶來講：若佇1915年400箍糴得兩萬斤粟，若到佇1949.6:1，4萬箍換一斤的進前，400箍是偆這sián錢；通講攏無去。到囡仔出頭，5个查甫攏大學，5个女的攏受高中教育。列位，恁想祖產遺產棄權，400箍借朋友，無利息，也無討的人；thái有錢通栽培子女，佇遮就是伊的經濟學lah。  伊無做生理，無副業，應該領的以外，伊無別路的收入。

到底伊按怎teh經濟。

  對青菜攏毋免用錢買，是對上帝的配給，逐項菜攏家己種到食袂了，猶有通分會友。對魚，肉in是不斷，猶是罕得買。  彼是按怎？  較常是拜六買魚佮買肉，持防禮拜日若人客來就利便，閣禮拜日有會友會來看先生食飯都也有chhiⁿ-chhau，若是家己真儉，寬寬配到拜五，六才配了，才閣買新的，大部分青菜用較濟。對衣服：出外若倒來，衫連鞭換，一軀寒，一軀熱，穿得規世人。人teh流行，伊無，我teh穿短手ńg (南風服)，伊也笑我講：「王--的，你也teh激少年。」為著伊按呢儉，所以伊的囝逐个真儉。彼時囡仔若讀長榮，食佮蹛一年一百箍開袂了，無納受業料，食一個月9箍，帶三箍，半價是6箍，一年10月日60箍，冊佮制服是大漢的予細漢的接，換新的是小寡。人teh食魷魚，鹿肉，叫伊的囝買5仙果子來咬；人teh食，咱也teh食；人喙teh振動，咱也teh振動。伊的囡仔攏得著上帝祝福，攏優秀，佇附近讀攏是省立的，毋免讀私立。讀省立佮私立一年差不少，毋nā按呢，閣通得著獎學金。佇台北大學的時，閣得著牧師的紹介，有的佇教會活動，有的介紹做家庭教師，食，蹛攏免錢；所以伊常常teh講：讀大學紲比中學較省。

  伊對金錢有知足，佇學裡就念，伊若偆上一千銀就到額，我問郭--的，taⁿ一千銀袂？應講，taⁿ的錢，若人teh燒的銀紙。伊也真畏錢，我常常teh募集錢，嘉義中會的慈善會，新樓病院的後援會，也是從事員，tó位起拜堂就叫我共in題，伊定定共我講：王--的，你無論去到tó位，人攏驚講：題錢的又來lah。我thái會欲擔任這，毋是有抽分，抑是拈捻，是報人有份這个恩惠，積聚財寶佇天裡，所以我毋是愛做，是無推辭。郭牧師伊看金錢的魔力真大，會得無交插是較好。但是伊奉獻是真甘，我欲題錢到伊遐，我毋捌對伊募捐，只有講我來的目的，伊隨時提30箍，抑是20箍來奉獻；閣一項，人欲共伊借300箍，抑是500箍，伊較常提30，抑是20箍予伊講：500箍我無，只30箍送你，按呢心較平安，有做好事，也毋免掛慮500箍予人倒去。

  4.  伊教子有義方。

  三字經講：「人遺子，金滿贏，我教子，惟一經」，意思是人留規櫃的金予囝，若是我是教囝只有一本經冊)。所講的經是指易經，書經，詩經，禮記，春秋；咱有較寶貝的經，就是新舊約聖經，是上帝默示的經，有利益佇教示，佇督責，予人歸正，引chhoā人學義理，予服事上帝的人練達，便便來行攏總的好事(II 提3:17)。

  郭牧師按怎教囝，是用聖經，就是主的警戒佮教訓來培養in。近來學校的學課真急，真濟家庭紲無致意禮拜，父母關心學課，學校的成績，無關心佇靈命。郭牧師致意靈性的較要緊學校。早起時無禮拜，無食飯；暗時無禮拜，無去睏；若慣勢就毋是重擔，伊若赴無著禮拜，也家己讀彼chām聖經，讀了會好睏，有時睏一醒才想著伊的昏無禮拜，著起來家己禮拜，就真好睏。教囝著會記得，雖然是咱生的，猶kú是上帝交代咱培養，著予伊捌天父，信救主。

  伊對囝兒新婦是親像人客。佮大囝相佮食，一月偌濟米，偌濟菜錢，無hàm-hàm，父母食囝是應該，伊無愛連累囝，因為伊有獎委會一月日6斗米 通領，伊佇霧峰教會做工，教會也有予伊，物件也隨人用，伊真明白。對按呢伊的囝攏是教會，社會的棟梁，大的，第三--的，攏做有為的牧師，第二--的做霧峰正峰化學工廠的技師，第四，第五--的做中等學校的教員。

有人攏是將本身做標準teh教示伊的囝，所以親像行坦橫的毛蟹母，當然教毛蟹囝行坦橫。  郭牧師，伊毋是用家己，是用主的警戒佮教訓來培養in ( Hut 6:4)。參考創18:19講：著命令伊的囝佮家眷長長守耶和華的道理(也看申4:9, 6:7, 11:19;詩 78:4；箴19:18, 22:6, 29:17；II提3:15)。人若用上帝的真理來教督伊的囝，伊的囝就欲予你安心，予你歡喜；到老也無歪chhoa̍h。

家庭教育做好就是守家庭禮拜；夫婦，男女，少兒攏聚集，不論甚麼工，會歇得的攏歇，吟相像的詩，讀相像的聖經，齊讀，雖然有甚麼無稱意的事，抑是甚麼鬱卒，會改世間苦痛憂悶，予人福氣滿滿，做一日的原動力。

細囝照伊的年歲，照伊所會的工作，攏分工予in做，掃廳，掃房間掃埕，筅椅桌，揉椅桌，對4歲就訓練起，隨人的物隨人收囥，別个愛用愛共伊借，父母也毋通替伊主意，會通替伊借，毋通用命令。物若用了閣勸原位，別人毋免揣物的麻煩。的確無溺愛，無偏愛。

我順機會報咱知一个實例，就是佇20外年前，東京都的不良少年，少女有13218名，其中有父母的最濟7084个，無父的2050，無母的是1764，無父母的1394，養母的455，養爸的331，其他100。照這个比較看，有父母通教示的不良煞siāng濟，這通知是溺愛佮偏愛。 毛蟹母teh教毛蟹囝。郭牧師是chhoā子女就近主。大家會記得子女是上帝賞賜的，咱愛好好chhoā in歸佇主，毋通虐待，毋通轉賣別人。

  5.夫婦愛情真深。

  伊gâu疼婦人人，也是好某命，自然是耶和華賞賜的前妻蕭氏實在是難得的女子，對丈夫真gâu幫贊，對囝真gâu整理，毋敢勞煩丈夫的祈禱佮傳道所以郭牧師看著伊遐無閒，伊共伊鬥做，呼轄遮的囝共老母鬥跤手。勇健的時較無看出伊的愛情，佇患難的時才看見婦人人欲生產頭上囝，無序大人佇身邊，兩人攏未捌經過大事閣拄做大水，厝攏入水，無眠床通生囝(佇岡山)，著坐竹排去高Chài-chiok醫生遐生，腹肚jī疼，大水jī驚，郭牧師扶插牢牢，對上帝祈禱，對產婦安慰同情。也得著高Chài-chiok先生in夫婦非常的照顧好款待。閣一擺佇和美，婦人人無拄好跋倒，喙齒摃斷幾若支，郭牧師看一見，非常的毋甘，袂食飯，著用毋免哺的流湯質予伊食。遮好的賢妻紲予上帝召伊轉去，10个囡仔郭牧師thài有法度通io，所以著續絃，得著捌做女傳道的嫁予伊。  新牧師娘對傳道的苦杯有試過，歡喜來幫贊郭牧師，所以將10个囝的擔就交代續絃。  陳氏經過真完滿，無拍算婦人人身軀毋做主，致胃下垂袂食，自然就袂做工。事先有查某囝通做，後來郭牧師著體貼夫人，早起時著伊煮，予婦人人睏較晏，猶原歡歡喜喜來做。感謝上帝，佇這个胃下垂22年久，後來人報用藥縛肚臍來灸，灸了就好，gâu食飯，就勇起來。無拍算換郭牧師致病，牧師娘勇lah，會服事牧師到仙終。

(待續)。

 
數位典藏國家型科技計劃
拓展台灣數位典藏計畫
版權所有 國立台灣師範大學 台灣文化及語言文學研究所©2008
10610 台北市和平東路一段162號│TEL 02-7734-5516│Fax 02-2358-2461