GOÁ SÓ͘ CHUN-KÈNG SIÀU-LIAM Ê SU-IÚ
Ông Chiàm-khoe
1963.09.01 P.10、15
6. Ho͘N3 kó͘-chhêng（好古松）.
Ū lâng chèng hoe sī beh thàn chîⁿ, ū ê sī beh khoàⁿ suí, ū hoe-âng liú-le̍k chin suí, ū ê chin phang, nā-sī kó͘-chhêng bô sek-tī ê suí, iā boē-oē phang, chhêng-á nā hō͘ i chū-jiân sī chin kiông, i sui-jiân oá tī sím-mi̍h chhiū, nā i ê kun tah tio̍h toē, bô kú hit châng chhiū chiū hō͘ i chiàm-khì. Keh Bo̍k-su i kā chai tī hoe-khaⁿ iú-hān ê thô͘, oē oa̍h, boē thang chiàu i ê iá-sèng hoat-tián, tio̍h chiàu lâng ê ì-sù kā i tiau lêng, tiau hōng, tiau lâng tiau kó͘-tóng; ū sî hio̍h choè chi̍t-ē kā bán khí-lâi, chhin-chhiūⁿ sí--ê, hō͘ i koh hoat chiah oē soè hio̍h, chiah oē suí; i chèng ū kui pah phûn, ū ê chin ū kè-ta̍t, chi̍t phûn ta̍t-tit kuí-nā pah kho͘, i m̄-bat boē. Goá siūⁿ i ê sim-sèng chiū chit khoán, ēng jîn-le̍k chō͘ thian-kong, chhêng sī pà-sèng, i ēng hoe-khaⁿ kā té-teh, chhin-chhiūⁿ ēng Iâ-so͘ ê kui-bô͘ kā i iok-sok, kātiau-tok, sī ēng Siōng-tè ê kéng-kài kap kàu-hùn, hō͘ i kui-chèng o̍h gī-lí. Bán i ê hio̍h, sī kā thǹg-khí kū ê kiâⁿ choè, oāⁿ sin ê, hoat iù-iù nńg-nńg chiâⁿ-choè kó͘-chui. Só͘-í i tuì i ê chú-lú, tuì kàu-hoē iù-jî, Iù-tī-hn̂g, Chú-ji̍t-o̍h, Siàu-liân thoân-khè, Chheng-liân thoân-khè, i ê ēng kang iā án-ni, "Gio̍k put tok, put sêng kì, jîn put ha̍k, put ti gī." I tuì chèng chêng, Tâi-oân sǹg ū tio̍h, i ê ka-têng kàu-io̍k, i ê bo̍k-hoē iā ū sêng-kong.
7. I ê iú-gî sī sêng-si̍t.
Goá siog5-siông khìpài-hāu i, i siông-siông tuì i ê kiáⁿ-jî, sim-pū kóng, goán che sī 50 nî ê hó pêng-iú, sī tông-chì ê, sī khek-khó͘ nāi-lô ê thoân-kàu-ka.
Tī 1930 nî ê 5 ge̍h 12 ji̍t, ka-bú tī Chiong-hoà i-koán ji̍p-īⁿ tiong kè-sin, goá tī Po͘-lí, tong-sî bô chū-tong-chhia, goá chhut-lâi hù boē tio̍h sàng-chòng, boé siū-pán, kng, tâi, toē-tiám, lóng Keh Bo̍k-su thoè goá siat-hoat; nā m̄-sī ti-kí, i ná beh án-ni choè, ún-tàng tio̍h khùn teh thèng-hāu kàu goá kàu, tio̍h bān chi̍t ji̍t, hit sî i tī Chiong-hoà kàu-hoē choè thoân-tō.
Koh goá beh lī-khui Chuí-lí-khiⁿ kàu-hoē, i ti̍t-ti̍t kó͘-bú goá lâi Tāi-lí kàu-hoē, hit-sî i choè Sió-hoē ê gī-tiúⁿ, thang thoè in siat-hoat khí pài-tn̂g.
I chin chheng-pe̍k, i koat-sim m̄ kā lâng chioh chîⁿ, sui-jiân bat chin khiàm-kheh ê sî, i ēng khiām, koh iā m̄-ài kā lâng sia mi̍h, m̄ èng-tit ê chîⁿ, tiāⁿ-tio̍h m̄ sêng siū. I bô choè seng-lí, á-sī sím-mi̍h hù-gia̍p, in-uī lán lâng bô siang-têng châi, i ài chhin-chhiūn sù-tô͘ choan-bū kî-tó thoân-tō.
Chhoā 5 ê sim-pū, kè 5 ê cha-bó͘-kiáⁿ. Lâng kóng, ū--lâng kè cha-bó͘-kiáⁿ, bô--lâng boē cha-bó͘-kiáⁿ; i sī kán-sò͘-hoà m̄-sī beh thàn chîⁿ, iā m̄-sī beh kè miâ-siaⁿ, hi lé bô ēng. Toā ah! thoân-kàu-chiá, i bô khiā bú-tâi, i tī Chháu-tun toà 25 nî, ke-tiúⁿ, hāu-tiúⁿ khiâ kha-ta̍h-chhia sio tn̄g-thâu tio̍h lo̍h chhia kā i kiâⁿ lé, toē-hng ê sin-sū siông-siông lâi pài-hāu i, ha̍k-hau siông-siông chhiáⁿ i khì hùn-sī. Hoē-lāi, hoē-goā hó miâ-siaⁿ, 25 nî oāⁿ uī ê sî, sàng nn̄g bān gō͘-chheng kho͘ kā i kám-siā.
iáu chi̍t kù m̄-thang boē kì-tit, chiū-sī tī Oân-lîm kàu-hoē ê sî, hū-jîn-lâng sin-khu teh kan-khó͘, tú-hó Muî Bo̍k-su khì Oân-lîm beh chhut-khì pò͘-tō, Muî Bo̍k-su kā Keh Sian-siⁿ kóng, pò͘-tō phah-sǹg lí bô êng, in-uī sian-sin-niû phoà-pīⁿ, lí ài kò͘ sian-siⁿ-niû, Keh Sian-siⁿ kóng i sió-khoá khah-hó lah, lí tī Eng-kok hiah hn̄g lâi kà goán chia beh pò-thoân hok-im, goá ná ū sím-mi̍h thang chó͘-tòng goá. Kó͘-chá Ú ông tī chuí saⁿ-pái kè mn̂g-kháu iā bô ji̍p chhù-lāi, in-uī khoàⁿ kok pí ka khah iàu-kín. Keh Sian-siⁿ khoàⁿ kiù lêng-hûn pí ka-têng khah iàu-kín.
Keh Bo̍k-su i thoân-kàu 52 nî, sí-chiong it-koàn, tiong-kan bô hioh-khùn, kàu-hoē chi̍t nî ū chi̍t lé-pài hō͘ thoân-kàu-chiá hiu kà, Keh Bo̍k-su 52 nî m̄-bat hioh poàⁿ lé-pài. I lī-khui Chháu-tun chiū-sī thè-hiu, sui-jiân thè-hiu lâi toà Bū-hong kap toā-kiáⁿ Keh Tông-êng Bo̍k-su choè-hoé, m̄-sī thoân-tō hioh-khùn. lūn kàu-hoē ê kang m̄ choè to bô kóng, beh choè saⁿ ê to iáu ū kang thang choè, i ê sin-thé iáu chin ióng, tuì liān kiâⁿ soaⁿ lō͘, lâng tio̍h khan goá ê kiáⁿ, goá m̄-bián lâng khan. Keh Bo̍k-su si̍t-chāi ū cheng-chiàn hó ê cheng-chiàn, ū siú só͘ sìn ê tō, chiâⁿ-choè hó koh chīn-tiong ê bô kiàn-siàu ê lâng.
I ê chòng-sek tī toā-kiáⁿ ê kàu-hoē Liú-goân, chin sēng-hóng. I ê chheh-miâ國原，有弔詩：
國原八十老將軍。
傳教安貧好學文。
義戰忠程守善道。
神頒樂土賞吾君。
（實在79，別世時要添一歲）.
